母 淚 滴 滴 愛 / 李啟明 /

星期三, 9th 三月 2011

                / 李啟明 /

          慈母在世顧阮穿、為囝長大做犧牲

          無想家己兮性命、一生有緣萬世情

    日據時代大東亞戰爭彼時陣,阮嘛閣是囡仔nia nia,毋捌世事戇戇嘛毋知天仝地,單單知影顧耍全然無了解老母心,彼時天頂定定有飛行機puepue去,看大人傱出傱入,in是緊張kah欲死,喙口佇喝「較緊、較緊飛機來啊!」阮ia毋知半項予爸母牽入去防空壕底宓牢,叫阮毋通出聲,講是阿啄仔(美國)B-29飛行機真厲害,看著人會ka人掃射拍死,聽著予阮囡仔驚kahkiu去,攏毋敢哭毋敢哀,只有等待阿啄仔飛機pue走才敢出洞口喘一下悸,過無外久閣「陳水螺」(防空警報聲音),趕緊閣宓入去,有時陣宓幾若遍,驚去予飛機下炸彈爆炸著,逐家顧生命kah要緊,規條街仔路攏無人佇行徙,大多數e百姓早就逃e逃、走e走,日子並毋是遐爾仔好過,逐家攏是佇度時機,每工三頓飯總是過kah不接一(不接續)毋成食閣毋成睏,真正是悽慘落魄,這時若閣來想起早前e代誌,心肝頭就真艱難矣,毋閣無講出來,囥蹛心肝底煞愈艱苦。佇當初時五十年前,咱台灣是殖民地被日本統治e時期,庄跤e所在,百姓攏過著非常艱苦e生活,食kah不答不七e物件,日食總是糙米糜參蕃薯簽khah濟,人講號做「蕃薯簽糜」,逐家口仔生活真困難,食kah枵饑失頓,面肉帶黃酸,看起來每一个人生著毋成猴仔阿毋成猴,瘦枝落葉,烏焦瘦仔烏焦瘦,親像營養失調彼款模樣,予人感覺真恐怖,饑荒情形相當嚴重,破病人非常濟,戰亂時期醫藥匱乏,時機又閣無好,日子一工比一工歹度,彼當陣拄著非常時期,為欲顧家己全家大細平安順利袂出代誌,信佛e人真普遍,所以,阮老母逐工透早攏泡一鈷茶佇等候阮老爸起來e時,同齊點芳香敬神拜佛,祈求厝內大細漢身體平安。我會記哩,佇日本爭霸東南亞地區結束彼个時陣,有聽阮老母講起,我有一个大兄予日本仔調去海南島做軍伕,到現此時嘛閣無消無息。因為彼當時大東南亞戰爭非常激烈,海外一四界烽火連連,人心惶惶,每家有囝兒調去充軍e人,爸母攏是真擔心佇咧!想欲早日知影得著一寡海外新聞e消息,會通來安慰心情,尤其是彼陣仔,海外戰情封鎖非常嚴密,欲知影相當困難,因此消息難得著,掛念心情愈重。阮老母暝日思念著阮大兄e心情,每日心肝頭攏佇吊苦瓜,時常目屎佇做飯吞,想kah毋成食,毋成睏,實在予伊真操煩。伊為著欲愛知影囝兒佇海外做兵e消息,想盡辦法,傱東傱西一直探聽消息,總是無能為力,可惜厝內又閣散赤,ia袂當買一台拉而歐(收音機)來聽,姑不而將家己一个人仔,平常時攏行去對面厝,阮阿姑e店頭,(內面鹽缸頂懸有囥一台拉而歐)。伊若去時就請阮阿姑拍開來聽中晝時仔所報告e海外新聞,逐工攏聽真久才有轉來厝的,若看伊行路無元氣閣面色無清采仔無清采,阮著感覺會出來,伊今仔日一定無得著啥物消息,才會遐爾仔鬱卒

                                -- 1 --

咧?厝內e人看到伊這款情形,阮e心肝頭煞綴伊艱苦起來。日子總是一工一工直直過去,到了彼年e大東南亞戰爭結束,有一工e中晝時仔,突然間,阮大兄唯海外轉來,阮老母聽著伊大囝轉來矣,無顧著洗碗,手放落趕緊三步做兩步走,唯灶跤拚出來到大廳,伊目眶仔紅紅紅,歡頭喜面牽著阮大兄e手,久久仔攏毋甘放去,彼工e暗頓,阮老母心情特別清采,撰寡好菜趕緊煮一頓誠青臊e菜色予阮逐家歡喜一下仔,逐个食kah 笑瞇瞇,歡喜噹噹,順紲慶祝一番全家大團圓。

              望囝成年好團圓、逐个平安敖趁錢

          囝兒大漢愛成持、報答母恩鬥參拑khinn                  

    第二年e春天,經過社會善士推薦紹介我e大兄入去頭城農會食頭路,了後予阮家內經濟kah穩定一點仔,紲落我二兄由宜蘭高等科卒業,一時陣揣無頭路,袂當ka厝內鬥相共,一段期間經過朋友e紹介,才去台北e戲班團當會計,拄開始逐工攏嘛愛隨團出去南北奔波,車來車仔去,這項頭路並無外好,有人講:「行船走馬無三分命」真危險,尤其是這種戲團e性質,出門e時攏愛搬戲籠kah布景同齊疊車閣疊真懸,沿路搖搖擺擺,真使人驚惶失色性命真無保障,伊有閒若轉來厝內歇睏,攏毋敢講這款代誌予阮老母聽,落尾仔時間一下久,煞去予阮老母知影,了後著無啥愛予伊閣去,毋過當時無啥物好頭路倘揣,只好罔度時機過日,一直忍耐蹛心內。等到有一工,探聽著郵局閣無外久欲招考郵務人員,阮老母就趕緊通知阮二兄準備看冊應付這擺e考試,隔無外久伊就將彼个頭路辭掉轉來,參加郵務士考試。結果皇天不負苦心人,郵政總局發表錄取人員名單,公佈出來有伊e名佇內底,是第二名,過了一個月郵局就ka伊採用,編列入去頭城郵局辦理郵務空課,然後一路順利繼續一考再考,一直升等到高員級派去基隆做稽(khe)查員為止。

    隔轉年佇舊曆正月時仔,有一工透早拍殕光,阮大姊夫唯福成庄跤拚出來,佇阮兜門跤口雄雄狂狂拍門叫阮老母,阮一家人攏予伊吵精神起來,聽真假若真要緊e款,阮老爸先趕緊出去開門,一下看,伊e面色青筍筍,雄雄講甲袂出喙,阮老母才問伊是按怎,那會遮雄狂無講話,看彼e情形有可能大事不妙e款!伊e目睭仁紅吱吱,手倚蹛門邊疕疕掣,阮老母牽伊手叫伊慢慢仔講,伊才講出:「阿端仔(大姊e名)佇昨暝臨時腹肚痛,可能是起急性盲腸炎,哀叫無幾聲就恬去矣!」一時陣逐家攏憂愁去,阮老母煞暈倒,阮老爸趕緊ka伊扶起來掠痧根,順紲交代阮姊夫趕倒轉去料理後事kah要緊,到七點左右阮老母才醒過來,目睭一下拭金,隨時交代阮老爸趕去庄跤看阮大姊。結果無法度救矣,「人死總是不能復生」,就按呢ka阮姊夫交代辦理喪事,出山了結,做老母e人只有目屎含目墘,無語問蒼天,日思夜念、望女長嘆,恨命莫怨天而已。仝彼年e年尾,阮三兄伊利用學校畢業彼段時間,充實應付考試e課程,去參加鐵路局考試,伊真聰明,結果考牢第一名,第二年就隨時分配入去服務,伊唯最基層做起,翻過

                                 -- 2 --

第三年:鐵路局閣再舉辦升資考試,伊真認真看冊,想著家內散赤愛拍拚,才有法度幫助家計生活ka內面鬥參拑(khinn),不斷e努力做空課,結果受著頂司疼惜,安排khahe職務予伊做,亦真順利一直考試進升到站長e職位。當時嘛閣真少年,做代誌真有魄力,頂司攏呵咾伊是可取人才,同事真愛kah伊做朋友,事事項項攏真關心別人,因為有這點予阮老母比較khah放心,毋免去煩惱三囝e出路。紲落換阮四兄唯軍中退伍拄轉來,佇厝內一時陣無頭路,好佳哉阮二兄有一位朋友佇開大拍賣雜貨店,暫時性ka伊引去遐作穡,過了第二年e夏天,店e方面生理真好,愛ka客戶做一个服務,決定買一台鐵牛仔三輪車送貨,亦按呢倩阮四兄做司機,順紲加倩一个人來鬥跤手,逐工攏愛載貨出去遠路梗枋彼爿,當時梗枋方面路線全是石頭仔路無外平,坎坎坷坷鐵牛仔三輪車閣無好駛。有一工,車駛到一欉大榕(tshing)樹仔邊,想欲先閃予別台車過,無疑誤,彼段e路基傷軟,規台三輪車煞去予伊翩過,兩个人坐佇車頂攏跋落去,予車硩牢佇車跤,車頭有一箱燒滾水,潑對阮四兄e腹肚邊kah跤大腿去,ka伊下半身燙kah熟熟破皮去矣。好佳哉,就近有一寡好心人kah過路人看著,趕緊ka in兩人扶起來,查出地址報消息轉來予阮厝內面e人知影,阮老母一時聽一下心肝頭磅磅採,隨時叫阮老爸趕去店的探聽狀況。過無外久,阮四兄予別人用計程車載轉來送去病院治療,隨後我kah阮老母同齊趕去病院ka看,彼時阮老母看一下險險仔昏倒去。因為阮四兄伊e身軀下半身予滾水燙kah紅吱吱,有一部份破皮矣,連我嘛看kah會著驚,莫怪做老母e人,看囝兒按呢去予受傷著,伊會毋甘,袂輸佇割伊肉仝款,伊e目屎一點一點一直滴落來,滴kah予阮做序細e人毋知欲安怎勸伊才好,逐工伊攏是愛去病院照顧阮四兄半工以上,伊才會放心轉來厝,紲落才換阮去替顧。經過三個外月傷痕才漸漸治好一寡,隨後院方講通辦理出院,阮四兄才掣轉來厝內療養,隔轉年,伊身體慢慢仔才回復健康,做老母e心才看伊安靜落來。過一段時間,身體完全復原了後,才閣經朋友紹介,前往台北縣政府做臨時工,經考試才晉升正式員工,一直到退休。

              人講紲尾食無奶、兄弟相共鬥牽成

           母心付出伊一生、囝兒協助報恩情

    有一年e春天,經我三兄指引教導,叫我平時愛看冊充實家己智能訓練,等候有機會來時應付公家機關考試,因為我三兄真疼惜我,時常攏佇注意我e未來前途,我攏照起工聽伊c話看冊,拄好彼年鐵路局欲閣向外招考路員,彼時欲揣頭路仝款真困難,經我三兄紹介去參加鐵路局考試,好佳哉,榮幸予我得著錄取。可惜無外久,我接著做兵e通知單,不得已鐵路方面就暫時來保留牢,等候服完兵役轉來才閣做決定。佇做兵二年陸軍服役期間,真佳哉,分配入去第一軍團部工程組做文書e空課,時常受著長官e疼愛真順利佇遐蹛到退伍返鄉,彼段期間內,khah無去予序大人煩惱著,逐工攏嘛像佇上班仝款,寫一寡長官擬稿予我抄

                                 -- 3 --

e公文,有時陣阮部隊調我轉協助寫部內文稿e空課。其實阮指導員真愛我轉去kah伊開講,伊看我親像兄弟咧,三不五時仔借用機會載我轉參加in e加菜月餐或者其他康樂活動,每禮拜日歇睏就轉來走走一下看阮爸母,彼段期間ia就按呢真順利做完二年e兵期,做完兵轉來,早前考牢公家e頭路,鐵路局無隨時通予我入去上班,只好去台北方面私人公司揣頭路,暫時罔度日子,順紲家己趁錢閣再進修讀夜校高商部到畢業。因為職務過勞,有一工中晝時仔我唯外口踏自轉車仔欲轉來公司,佇半途上感覺真喙焦,想欲啉一杯滾水又閣無塊啉,拄好艋舺菜市仔邊擺幾落擔柑仔,我ku落去ka伊揀三粒,買過頭隨手扒兩粒食落去止喙焦,偆一粒留蹛褲袋內,延路趕轉來公司。我到公司門跤口e時,頭殼感覺暈暈一直想欲吐,趕緊ku蹛水溝仔邊,ka腹肚內e物件吐吐出來,哇呀!這馬就害矣,吐出來e並毋是水果e雜物,那會是一塊一塊烏血角e物件,我驚一下,今慘仔趕緊足百起來,想欲行入去公司內底歇睏一下仔,無疑悟,彼時我規身軀煞接載袂牢,行到亭仔跤就去予伊倒落去仔,我人毋知了了。經過第二工透早醒來e時,我人已經是睏佇台大醫院e病床頂。越過頭時,看著阮老母e手提著一條綿巾仔一直佇ka我拭面,伊e目睭眶仔紅紅,帶著一寡仔目屎,喙內毋知佇唸啥物話,聽起來假若佇唸神佛保庇e聲仝款。彼時,我知影伊e心肝頭一定真艱苦,本晟是想著我做查甫囝e勇氣,男人珠淚不輕彈,這時我嘛忍袂牢煞哭出來,佇暗中向阮老母說一聲「失禮了」,那會用得予老母來傷心呢?佇彼時陣我ka伊講:「阿母,我e身體這馬有醫生佇看顧,醫療費用阮頭家可能會ka咱付,汝免閣煩惱了,感謝!予汝唯遐呢遠來顧我。」阮老母聽我講了後煞講:「戇囡仔,我若無來看汝敢會放心咧?汝e身體遮呢仔虛弱佇咧,若閣過一段仔時間有khahe時陣,想欲tsha你轉來厝的療養,以後e代誌才閣以後拍算。」真正過無外久,我就予tsha轉來厝內休養一站仔。第二年e春天,為著欲報答頭家看顧e恩情,我準備一寡衫仔穿e行李再度前往台北去阮頭家e公司作穡,過三年了後有一个秋天頭仔,我接著一張批是阮厝e人寫來予我,講叫我佇八月中旬愛趕轉去宜蘭鐵路局運務段報到,若無者,錯過這擺e機會無閣再有的,你著慎重來考慮才好,一時陣,想著真為難,雙跤踏雙船、心頭亂紛紛,毋知欲按怎來做決定khah會好勢?若是閣留蹛台北繼續食頭路是比較khah有出路,假使仔轉去故鄉食公家頭路,著愛忍耐一站仔艱苦e適應生活,毋過若比較起來,欲照顧爸母khah會著,khah溫暖淡薄仔,想閣再想,最後e日子總是來臨矣,我就決心ka頭家請辭,轉來故鄉報名,隨後入去鐵路局食頭路。

           老母在世晟咱大、人生慈愛留一寡

           模樣做予序細看、親像演戲彼一般

    鐵路局宜蘭運務段當初分配我佇福隆站,,逐工攏當日班,每暗七點才會通轉到厝,阮老母自從我轉來食公家頭路以後,逐工總是等我到厝e時,才會放心

                                 -- 4 --

同齊去食暗頓。有一暗,因為我ka別位同事替做khah暗一下仔,到厝的已經是十一點外鐘仔,佇規路暗唆唆e街仔路頂,只有遠遠仔看著一道電火光影佇等我,我三步做二步走,趕轉到厝的,看著阮老母猶閣佇遐坐等候,我規个心頭攏酸起來,望著伊e頭毛一頂白色色,老大人猶閣遐爾有精神佇等囝兒轉來厝的,我感覺親情可貴啊!尤其是佇下冬天仔,霜風冷冷、夜色沉沉,留著彼道柑仔黃色e燈光,予我感受著母愛e甜蜜kah溫暖,我講:「阿母你na會毋khah早去睏,等到這个時陣呢?」伊反講:「阮睏袂去,順紲留電火光予khahe過路人倘行路khah好勢,反正你亦袂轉來到厝的,做一寡公德嘛真好。」聽了這句話,予我深深e領悟著序大人e人生哲理。隨然我e老母伊是做人養女仔,khah無機會通去接受著正統e漢學仔教育,毋過伊是一位逐家尊重kah敬愛e老大人。平常時攏有督責阮兄弟姊妹,做人e道理kah出入社會應該按怎來kah人鬥陣,謙虛待人,禮貌恭敬e訓言。予阮踮蹛社會上kah人鬥陣攏受著真大e好評kah回應,這亦是上好報答伊序大人e禮物,予伊有一絲絲e精神補償,表彰回報伊做老母佇一世人當中所付出心血e代價,並無了時。

    如今,人海茫茫、世事蒼蒼,伊e一生亦過去矣,做人e囝兒佇世間上只有懷念e心,知影伊佇這个過程當中,伊是一个三從四德e查某人,相夫教子盡心盡力,度過一段慢長真艱難e日子,忍受著風霜勞苦e慈母角色,生阮這陣囝兒來這个世間負責晟阮大漢e任務,現此時只有留落阮kah厝邊頭尾大大細細難忘e回憶,偆著永永遠遠袂當放袂記伊予阮偉大e母愛親情。

 

 

                             李 啟 明   寫 作

 

                        2008年3月12  于宜蘭 冬山