宜蘭縣教育支援平台 會員登入 會員註冊 我的i教書

« 上一篇 | 下一篇 »

 

幸福王國           黎明國小四年級張詠晴

    今年歇寒,阮一家伙仔到木柵動物園看貓熊團團和圓圓,歡歡喜喜的耍規工,喙笑目笑,規身軀齊振動。轉厝了後,我忝甲摔siàng落眠床,就隨鼾鼾叫,睏去矣。過了無偌久,團團、圓圓來找我耍,我就綴走矣,我來到一真特別的! 真特別的所在。

  拄著一隻水牛兄,我好奇共問:「遮是啥物所在啊?哪會遮爾仔閣進步呢?」水牛兄笑笑仔共我講:「遮是幸福王國,因為阮遮的人攏真守法,也會按照時間納稅,所以才會有遮爾仔美麗的環境。行啦!我帶你去參觀。」我暢甲!綴著水牛兄慢慢仔行,突然間有一列車對我頭殼頂咻一下過去,我舉頭看一下,喙仔開開開,呵咾甲大聲叫:「哇!足讚的車喔!」水牛干焦kann5講:「這是阮遮的捷運系統,你看著的是『天頂飛磁浮』列車,毋通看它無,它是電腦全自動控制,毋若速度緊、零車禍,閣較袂會製造污染,誠環保喔!遮爾先進的設施,攏是利用遮的人民老實繳稅的稅金所來建設完成的。」我擋袂牢舉大姆翁呵咾講:「恁的人民足守法喔!逐家攏會當老實的繳稅來建設恁住的家園,我真欽佩喔!」水牛兄驕傲的講:「猶閣有呢!我閣再帶你去其他所在開眼界啦!」             

    水牛兄才講完,我早就走到對面公園聽候水牛仔兄矣。我共手展開,吸一大喙空氣講:「嗯--是春天的香味呢!百花開甲滿滿是、鳥仔佇唱歌,花蕊香貢貢,閣貢貢仔香,空氣足好喔!」我足歡喜和團團、圓圓在青粼粼的草仔埔拋車輪。那飛那唱歌的雀鳥仔共我講:「遮爾的公園毋是家己變出來的喔!遮是用人民的稅金來建設的。」

    煞落來,水牛兄帶我去一棟懸懸懸的建築物頭前,我雄雄狂狂傱入去。水牛兄勻勻仔的講:「遮是阮的病院,有先進的設備佮醫療技術,如果是嚴重的疾病,國家猶會有補助喔!遮的嘛是利用人民納的稅金來支付的。」我足欣羨的講:「恁王國的人民真正足幸福喔!假使我是遮的人民,攏毋免擔心破病的問題了。」水牛兄笑笑仔講:「喔!你閣真天才呢!」

   予水牛兄按呢一指,我雄雄精神起來,想起這一逝趣味的行程。我決定要做一個鬥宣傳愛老實繳稅的放送頭:

 

 

逐家同齊認真拚,老實繳稅好名聲,

建設國家真奢颺,「幸福王國」第一名啊第一名!

 

8-晴.WAV

朗讀-8錄音檔=**晴9/23

026 細漢我上愛去的所在 //莊雅媚(bî) (17/04/07thk改寫)

細漢我上愛去的所在,就是庄跤阿公阿媽的厝;佇遐(hia),空氣好,風微微仔吹--來,路邊青翠的草仔,不時咧對我揕(tìm)頭,樹葉仔親像海面的水湧,輕輕仔搖過來閣搖過去,燒烙(lō)的日頭光,照(tshiō)佇我的身軀,彼種感覺,實在真爽快。

經過無偌久的時間,阿爸的車,就駛到阿公的厝--矣,小弟仔、小妹仔隨走--出來,歡迎阮一家伙仔,閣佮阮同齊佇大埕走來走去,你掠我,我嘛掠你,耍(sńg) kah真歡喜,大人坐做夥咧泡茶、開講、看報紙....,阿母佮阿姆佇灶跤咧攢(tshuân) 中晝頓;耍忝(thiám)--矣,嘛枵(iau)--矣,這時陣,阿母來叫阮食飯;才一喙niâ....,哇!足khiū、足芳--的,庄跤的米,實在真好食,連水果嘛誠甜--呢!

食飯飽,阮佇房間耍牌仔,逐(ta̍k)个攏是高手,一个比一个較厲害,耍kah真刺激,啥人嘛毋認輸;有時陣,阮嘛耍棋子(jí),喝(huah) 聲一陣閣一陣實在真鬧熱。

欲暗仔,阮去大埕騎鐵馬,踢跤球,閣去溪邊欣賞日頭欲落山的光景,滿天的紅霞(hê),講有偌媠就有偌媠(suí)!

庄跤的暗時,閣較無仝款,田蛤仔「嘓!嘓!嘓!」的歌聲佮杜蚓仔「tsut !tsut !」的叫聲,親像挨弦仔低音的演奏,實在真好聽,予阮聽kah沓沓仔(ta̍uh-x~)睏--去。

阿公、阿媽的厝佇庄跤,是我上愛去的所在,逐擺放假,我所想--的,就是趕緊喊(hiàm) 阿爸佮阿母,tshuā 阮去阿公阿媽的厝,上好閣tuà幾工矣,按呢,我就心滿意足--矣。 --

猶有部分毋著(錯誤)愛改進

親像:評審(sim)老師

你會當閣揣出其他毋著的所在無?




創用授權(CC)-姓名標示-非商業性-相同方式分享 2.5 台灣版
 
 
用LINE傳送

  1. Re: 宜蘭腔朗讀-8-錄音檔=**張詠晴晴9/23

    學生好有朝氣喔!肢體語言也很吸引大家注意的目光

    [回覆] Claire3115 迴響於 08 十一月, 2010 20:09

      莊文龍 Re: 宜蘭腔朗讀-8-錄音檔=**張詠晴晴9/23

      詠晴佇厝真少和阿公阿媽講台語,學台語講演了後,較會開喙用台語講,而且宜蘭腔學了真好!第四台做校園小主播,嘛真大範!雖然話音有一寡仔毋著,比以前進步真濟!

      [回覆] 莊文龍 迴響於 09 十一月, 2010 11:58

  2. 莊文龍 Re: 宜蘭腔朗讀-8-錄音檔=**張詠晴晴9/23

    詠晴在厝真少和阿公阿媽講台語,學台語講演了後,較會開喙用台語講,而且宜蘭腔學了真好!第四台做校園小主播,嘛真大範!雖然話音有一寡仔毋著,進步真濟!

    [回覆] 莊文龍 迴響於 09 十一月, 2010 11:17