宜蘭縣教育支援平台 會員登入 會員註冊 我的i教書

« 上一篇 | 下一篇 »

海翁台語文文學        第十二期                                                          

夜暝              陳玉華     作    2002/12/01

 烏寒兮冬天

天星佮月娘互一重烏雲閘稠咧

看勿會清光亮兮夜色

夜色深沈

更加互儂感慨冷淡兮世情

深夜我行佇冷冰冰兮街路

佇這冰冷兮世界

看勿會著儂兮影跡

聽勿會著車兮引擎聲

我輕輕仔算著家己兮跤步聲

一陣霜風穿過我兮頭毛

鑽入我兮頭殼皮

激起了我頭殼內一陣兮疼痛

規排兮電火柱

恬恬徛佇街路上

關門閂戶兮厝宅

聽勿會著儂兮聲息

我更加寂寞行佇街路上

跤目已經擋勿會稠冷風兮侵蝕

暗淡兮月色

思鄉兮情

呣知遠方兮爸母

親儂佮朋友

現此時兮燈火

是呣是抑開開

全家圍佇電視邊歡樂講笑

抑是佇店頭選買物件

抑我即時

卻是佇他鄉外里

孤單

寂寞佇街路咧徘徊

厝內兮電火花矣

窗外兮燈火

照入厝內

客廳兮冊本

電動

東一個

西一個

囡仔一個一個

攏入去伊家己兮房間咧睏

翻一個身

棉績被

踢唯塗跤兜

鼻仔嘓嘓叫

無停咧歕氣

呣知啥乜時陣開始

即間厝已經無話題矣

踏入房間

一領冰冷兮棉績被

埋著我十幾冬兮青春

鐵門開

關兮聲音

擾亂我兮思慮

我恬恬倒佇床頂

沉重兮目睭皮已經展未金

呣過我兮頭殼清醒

不知不覺雞角仔啼

路頂兮跤步聲

已經漸漸來響起.

 

 

 




 
 
 
用LINE傳送