宜蘭縣教育支援平台 會員登入 會員註冊 我的i教書 發表新文章

三月 15, 2011, 11:09

李啟明老師 2011/3/15暗時九點佇冬山河電台FM105.5發表新歌=養女,敬請準時收聽。

Posted by 莊文龍 | 迴響 (0) | 引用 (0) | 閱讀 (1020) | 李啟明老師大作 | 推文 (0)
 
 
 
李啟明老師 2011/3/15暗時九點佇冬山河電台FM105.5發表新歌=養女,敬請準時收聽。歡迎多多CALL IN 鼓勵李老師感謝大家。TEL:9556699主持人阿真

三月 10, 2011, 23:33

台語 李啟明

Posted by 莊文龍 | 迴響 (0) | 引用 (0) | 閱讀 (1461) | 李啟明老師大作 | 推文 (0)
 
 
 
  1. 台語相褒歌教學站--歡迎逐家相招來相褒- Yahoo!奇摩部落格

    2007年11月15日 ... 台語相褒歌班的七字仔&四句聯! 請注意!!!在您瀏覽本網內容前,請先安裝 ... 台語歌曲李啟明作詞李晉義作曲. 分類:李啟明老師作品-感謝提供精彩大作 ...
    tw.myblog.yahoo.com/jw!r6IyhSaFGRkSOR5.3PM4/archive?... - 頁庫存檔
  2. 台語歌曲李啟明作詞李晉義作曲- 台語相褒歌教學站--歡迎逐家相招來相褒 ...

    台語歌曲李啟明作詞李晉義作曲. 分類:李啟明老師作品-感謝提供精彩大作. 2007/11/15 12:38. 第一首 成功著愛靠自己 第二首 問 君. 咱人若有不如意 無啥麼通好傷悲 ...
    tw.myblog.yahoo.com/jw!r6IyhSaFGRkSOR5.../article?... - 頁庫存檔
  3. 101-109 - 歡迎來到海翁台語文學網

    龍宮遊記(日本童話故事) 李貞改編. 答喙鼓, 俗語答喙鼓蔡連真. 演講稿, 我的心願. 我佇學校的一工吳美珍. 母語教學交流道, 台語認證彼段前後李啟明 ...
    www.slion.com.tw/king-an/books8-5.html - 頁庫存檔
  4. 國立教育廣播電臺花蓮分臺- 公共論壇

    2009年12月19日 ... 98年12月漢文easygo 廣播資料歡迎下載~~台語老師作品採擷~(宜蘭縣陳玉華老師與李啟明老師創作訪談)~~台語演說決勝分享~~光華40~東鐵再現~光華號小姐 ...
    www.nerhl.gov.tw/nerhl/modules/.../viewtopic.php?... - 頁庫存檔 - 類似內容
  5. 宜蘭縣台灣語文學會

    李啟明老師作品-感謝提供精彩大作( 30 ) · 歡喜相褒學台語---教學網站---莊文龍 · 我手寫我口--台語讀寫班=講師:賴淑玲 · 台語教學巧奇妙 ...
    blog.ilc.edu.tw/blog/index.php?op=Template&show=links... - 頁庫存檔
  6. ---烏石港時雨地--- - 台語相褒歌教學站--歡迎逐家相招來相褒- Yahoo ...

    台語相褒歌班的七字仔&四句聯! 請注意!!!在您瀏覽本網內容前,請先安裝台語字形,若無有些字無法呈現 ... 分類:李啟明老師作品-感謝提供精彩大作. 2007/11/15 12:47 ...
    tw.myblog.yahoo.com/jw!r6IyhSaFGRkSOR5.../article?...l... - 頁庫存檔
  7. 下一頁- ChiLin v0.88-a9e8

    台語信箱. 篇名, 1.一樣米飼百樣人2.鄉文來函. 著譯者, 1.阮素娟. 日期, 1993/2/1 .... 李啟明來函. 著譯者, 1.陳柏壽. 相關人士, 伊藤聰美. 日期, 1993/3/1 ...
    chilin.lib.ntu.edu.tw/RetrieveDocs.php?...文通訊}... - 頁庫存檔
  8. 台語教學巧奇妙| 九十八年度宜蘭縣母語教師專業研習

    2009年10月7日 ... 李啟明老師. 山歌教唱. 謝其國老師. 宜蘭母語. 教學展望. 許宗義老師 .... 高雄市第一社區大學【台語俗諺讀寫,台灣文史欣賞】課程開始報名--a! ...
    blog.ilc.edu.tw/blog/blog/4171/post/11990/76304 - 頁庫存檔
  9. 台語雜誌群文章欣賞

    李啟明 自從一九九九年咱台灣各所在的廣播電台,開放民營以來,四界攏佇成立民間 ... 五的所在,聽著一個查某的主持人佇唱早前的台語老歌,伊的聲音真優美,袂輸歌廳的 ...
    210.240.194.46/TwLrWeb/MContents.asp?M=4&P=37&A=5

三月 09, 2011, 08:49

母語e心聲 / 李啟明 /

Posted by 莊文龍 | 迴響 (0) | 引用 (0) | 閱讀 (793) | 李啟明老師散文 | 推文 (0)

母語e心聲         / 李啟明 /

 

    我是一个半籠司e母語支援教師,佇幾年前我ka人媵(thin)伴,參加母語師資考試,無疑悟煞予我考牢,tse ia算是一个幸運,過無外久ia無簡單拈著錄取e証書,自按呢開始較有信心對母語來研究,引起袂tsio e深入kah探討。雖然母語講起來是真簡單好學,咱tiann-tiann佇講,毋過,論真並毋是遐爾仔好讀e課門,總是台灣人嘛愛認真去學習就著,對伊(台語)有關心抑無nia-nia,到落尾嘛予我學一寡仔。佇這幾年來,我有去學校kah社區大學教冊,毋閣,學校方面依我所知影e,學生攏真肯欲學台灣e語言,親像課程中忽然間有一位查某囡仔學生ㄔ奇起來對我講:「我是台灣囡仔嘛,所以愛講台灣話則會用咧!」一時我亦驚一趒,這个查某囡仔真有勇氣,全班攏ka伊拍噗仔,同時我嘛拍才參落去閣ka伊呵咾,可惜時間賰無外濟,課程我感覺傷tsio,只有一節nia-nia,教著無tap sap,真無彩,講起來袂輸佇搶食仝款,想著就真怨嘆。我佇想,假使a

教育部會當安排閣較濟節e課,he毋知外爾仔好咧?尤其是佇一節課五十分鐘內感覺一時仔就過去,教亦無啥貨,袂輸佇田底kuann菜鴨仝款,予in食無飽就ka in kuann走,真可惜呢?若按呢叫in那會肥咧,所以這點我有淡薄仔意見欲提出來講,予逐家做一个仔參考,看恁有同感無?

    這馬,我年紀有較濟淡薄仔,也愛顧家已e身體,無想欲kah少年仔相爭學校e課程,因為佇糜tsio僧濟e情形之下,我無愛kah人拚彼落老命,予少年仔老師較有發揮閣有通趁錢e機會,避免予in減少收入,失去教母語e信心。因為這款代誌是真現實e,事實是排佇眼前,少年仔欲顧一个家庭也真困難佇咧,人講一句成語:「人若無先顧腹肚,那有法度顧佛祖」,tse是千真萬確e真話,若照過去阮宜蘭e經驗情形來講,少年仔有欲出來參加考母語e人,濟tsio攏嘛有想欲愛一个頭路,看會通外內兼顧iah袂。當初我佇擔任宜蘭縣台灣語文學會e主任委員彼陣,亦有人向我提議,想欲加一點仔有鐘點費通來彌補in e家庭收支平衡無?若無者,伊就無法度通蹛tsia生存落去囉,姑不而將愛另外去別單位e機構求職謀生則會用得,對我講一聲真失禮,將此in就離開教母語e行列,佇這種情形之下,阮宜蘭方面就失去袂tsio e生力軍,經我一再e苦勸,也是無路用,只好聽(thing)天由命任其安排。

    最近我有去參加開會幾落擺,看著iau有二、三十个少年仔閣真堅持教母語e老師來佇參加這个會,逐家攏講kahphut-phut,有講有笑,各人擔任部門e空課真起工,一點仔都無去予精差。尤其是謝理事長扮演主要e角色亦扮kah有聲有色,人人攏呵咾伊,辦代誌真有責任心,若無者就真悽慘囉,這个會早就流會去呢!到現此時,阮這个會iau閣算袂禾黑,因為有一寡仔查甫kah查某少年仔老師佇共力護持牢咧。話雖然按呢講,毋過,我iau閣真擔心一件代誌,聽講,最近學校方面欲閣再一擺重新師資資格鑑定考試,in e範圍是按呢指定,第一:

                               1

規定在學內教冊e老師kah咱以前學外參加母語師資通過認證e老師合併考試,第二:必須經過這擺學校舉辦e考試通過認定則有資格在學內教冊。因為有這種e風聲傳出,阮所有母語支援老師,逐家攏真擔心,萬一若考無牢e話,彼就真食力囉!不但是失去飯碗,嘛會失去團隊e精神,將來有可能對阮ee組織,變成相當e打擊,嚴重e話,規盤就攏去夆(hong)搶去,喟力就慢慢仔消失去。因為有這點原因所致,阮真向望教育部替阮這陣無命囝留佇這塊生存e土地上生根落地,做一寡種籽啥款?

    台語是咱台灣語言e性命根,亦是民族傳統e寶貝,若無講這落話,一點仔氣味都無e感覺,依我本身有受著感應,毋知別人頭殼底生做啥物款我都毋知,毋過,我真寄望有想欲生存佇這塊可愛e土地上e人,恁著愛提出良心來照顧咱囝囝孫孫傳承香火e使命,若有一工,咱欲轉去祖公遐則袂予祖公仔摃薰吹頭,恁講是毋是?所以,我是對母語教育真重視e一份子,毋管別人按怎想,按怎講,彼是ine代誌,希望在學教母語e老師,會通用心教育下一代e囡仔,予in佇頭殼底永遠留牢祖公仔e智慧kah感情,彼敢是真好e代誌,毋通用政治手腕來謀殺母語,對你、對阮攏有傷害敢毋是咧?有心有血e老師仔恁著想予真囉!再會,再會。

 

 

 

 

 

                                                  寫於  宜蘭縣 冬山

 

三月 09, 2011, 08:48

彙編鄉音苦行者 / 李 啟 明 /

Posted by 莊文龍 | 迴響 (0) | 引用 (0) | 閱讀 (634) | 李啟明老師散文 | 推文 (0)

彙編鄉音苦行者          / 李 啟明 /

 

    地球上各所在攏有一種地方e鄉音存在佇哩,「鄉音」講起來是佇較偏僻e庄跤所產生e,久年所留落來e寶貴腔口音,尤其是佇台灣e東北部tsit方面,有懸山kap別縣市隔離e因素,造成宜蘭地區保存了袂少e腔口音,ia就是別位人咧講e宜蘭腔:「食飯配菜脯卵、鹹菜黃酸軟舌允」,(tsiah8-puinn7 phue3 tshai3-poo2-nuinn1 kahkiam5-tshai3uinn7suinn7luinn3tshuinn2tsite口語出來,久年以來煞佇宜蘭縣各鄉鎮市e百姓頭殼內,攏隨著地方鄉音e習慣咧相傳交流,保持著親切熱情安定感e一種語言文化,tsite文化引起了縣民e重視,愛到每一人攏咧珍惜咱母語e推展,可惜m koh有聽著樓頂人佇喊聲,卻是無看見落樓e人影,ia就是按呢生,教育部有咧拍算想欲愛tsit項腔口音e物件,所以宜蘭縣政府tsiah特別指命光復國小做為編輯鄉音中心來發展母語e地方音。

    Tsit擺光復國小e林校長添財先生接受著縣府e指命,擔任彙編鄉音(宜蘭腔口音)認為責任重大,因為伊iau koh年輕e校長m敢試膽大意隨便做代誌,為著慎重其事起見,特定指派該校李政原主任擔當tsihkhang-khue,隨後koh再邀請該校前任退休e黃校長錦村先生做總召集人,因為黃校長對母語有深入e研究嘛也有重視,漢文方面ia相當高深,地方聲望ia真懸,憑伊做事e能力kap經驗攏真穩重,有可能通來完成tsit項任務tsiah-tiohm koh黃校長做人謙虛客氣,事事項項考慮khah清楚,過一段時間tsiah敢做決定接受落來,起先伊有思考周密e計劃,想欲按怎來聘請地方人士,通來鬥跤手做編輯委員,想ia想,若有請伊無請你,到時陣嘿叨會hoo人講話是大細心看人無起,伊著遐有才情tsiah聘請,m koh做人真歹辦代誌,真難以做決定,只好順其自然,tsiah開始邀請地方耆老長輩三位、退休校長三位、主任一位、老師六位做為編輯委員來設法khang-

khue,當時阮tsit陣人攏真擔心接受了後,是m是會通順利來完成tsit份任務,真正苦惱難以論斷,經過幾a擺開會結果,總是意見參差不一,有e人對漢文是相當e興趣kap深入,可惜對羅馬音標無好e印象,khah有排斥e意思,也有人是過去有學過各種音標,卻是無愛koh接受台羅音標e原因,只好自動退出tsit个編輯行列,結果呢?hoo黃校長頭殼moh咧燒,一聲就減去四位矣,欲如何是好呢?最後koh再開會決定,將賰e留落來家己認命蹛遮繼續拍拚,首先由黃校長帶前弄龍頭,我khah頇慢來弄龍尾,中央有楊文通老師、陳素卿、黃麗葉、黃秀枌、林月霞、朱嘉莉等幾位女老師合作來弄tsit尾母語e龍身,負責看會通將tsit尾龍弄hoo khah起色behmaih hoo變成弄ka不答不七,到時陣嘿叨真正漏氣hoo人批評指責就m好囉,佇遮我欲順紲來對各界前輩請願,到時出冊若有欠缺e所在,請諸位愛好母語心聲e同仁多加寬容大量,向望恁指引牽教。

    tsit陣人跤步tueh著黃校長引領之下,各人開始分配著一寡khang-khue來做,黃校長做代誌特別謹慎,伊真骨力去走傱宜蘭文化中心kah縣府過去有存檔

1

e文獻資料,了後kohtshue各所在耆老長輩所編出來e冊,一一將伊編排順序寫出宜蘭腔e特有音字,hoo阮逐家來做參考kah想一寡仔過去所聽著e腔口詞、例句寫出來釋義,我kap楊文通老師也有去庄跤採集,過去老阿伯仔、老阿姆仔in所傳落來e腔音kap語句做伙同齊來參考,尤其是幾位查某母語老師參差佇陣容內底,增加了袂少e活力kap幫手,互相探討互相求正,tshue出困難所愛排解e問題,頭一工第一項去拄著e代誌是聲調符號欲按怎來照教育部定訂方式拍入電腦檔案,經過黃校長kap陳素卿老師兩人一番研究結果tsiah知影輸入e方法,第二項去拄著是新字真濟,比如講:「因、勿會、禾黑、口允、口玄、足歪、卑頁、圭頁、艮頁」(in1be7bai2tsuinn7hng2uainn2phe2kui1kun2),koh有真濟無舉例出來e字,須要tshuekap造字來決解,經過討論了後由林政原主任負責,因為伊對電腦方面ia khah有經驗,了解一切抄作方法,第三項去拄著是有e老師佇教冊khah無閒無時間通來開會,結果一再拖延,到了落尾a,上方指定e日子ia漸漸迫近,姑不而將逐家咬牢喙齒根,軋盡腦汁費心苦力,將按呢各人所有e編寫資料全部交hoo齊備,互相對照,若有失誤e語句、語詞重新編排完整,一再修改內容幾若擺,將其尾tsiahhoo總編輯核對做成完稿階段,koh再拈去hoo印刷廠排版對照,了後tsuah會通等候出冊。

    下面我來舉例簡單幾字e宜蘭腔特殊音字,比如講:「uinn」(huinn1昏、荒、揮、huinn5huinn7遠,kuinn1光、kuinn2卷、捲、管、廣、kuinn3劵、貫,khuinn3勸,muinn2每、muinn5門、muinn7問,nuinn1軁、nuinn2軟、nuinn3趡、nuinn5圇、nuinn7卵,puinn1方、楓、puinn7飯,suinn1栓、孫、酸、痠、荽、suinn2損、suinn3算、鐉,tuinn2斷、轉、返、tuinn3頓、tuinn7斷,thuinn3褪、thuinn5傳、thuinn7熥,tsuinn1磚、tsuinn2鑽、tsuinn5全、tsuinn7口允、漩,tshuinn1穿、川、tshuinn2舌允uinn1有、掩、uinn2阮、綩、捥、鈗、uinn5kah

ng」(ng1央、秧、tng5腸、tng7盪、tshng5kahe」(e1挨、e2矮、e5鞋、e7會,be2買、be7賣、勿會ge2嚙、ge5倪、ge7藝,he7蟹,ke1雞、街、ke3疥、界、ke7膎,khe1溪、khe3囓、契,le2詈、禮、le5犁,phe1批、phe2卑頁,、se1梳、疏、se2洗、se3細, te2底、抵、短、眝、te3地、te5蹄、題、te7第,the1推、te2體、te3退、替,tse3祭、晬、tse5齊、tse7濟,tshe1叉、妻、釵、初、tshe3脆、粞,ue1鍋、ue3穢、ue7畫、話)以上,另外iau koh有真濟無法度佇遮全部列出來,期待出冊再請詳細查看內容。

    最後tsit份編輯鄉音e khang-khue ia欲完成出版矣,到時陣若有欠缺e所在,期待逐家寬諒用慈慧e心腸,來鬥跤手推sak,莫用另眼看待hootsit陣忠直人失去信心,向望逐家徛佇tsit塊台灣e土地上欲生存落去e百姓,做伙來交陪一个仔好朋友啥款,希望同齊來關懷提出愛心來疼惜咱e傳統語音,tsit本冊ia著是「常用宜蘭腔彙編」,阮佇遮順紲來ka諸位各界e賢達說一聲多謝費神關注,再會、再會。

 

                                     李 啟 明  佇 宜 蘭 縣 冬 山  

                                      2009年5月3    夜 暗 寫作

三月 09, 2011, 08:47

有心拍石,石成磚 / 李 啟 明 /

Posted by 莊文龍 | 迴響 (0) | 引用 (0) | 閱讀 (604) | 李啟明老師散文 | 推文 (0)

有心拍石,石成磚       / /

 

    彼一年e九月四日這一工,宜蘭縣冬山鄉公所有舉辦九十七年度母語(閩南語)朗讀kah4演說比賽,分為國小組kah4教師組以及社會組等三項,各學校攏真拚命揣老師來教學生囡仔,為欲爭取著學校e名聲keh功名,各位學校攏有派出學生去參加比賽,尤其是東興國小這个學校有派兩位學生出來,一位是查甫學生,伊號做「吳宸森」,另外一位是查某學生,號做「曾夢筑」,兩位攏是六年級學生,in學校黃校長秋菊女士,真重視母語傳承e這項使命工課,ia真期待著在校好e學生,會凍栽培出通得著好名次,替in爭取校方e一寡光榮,因為學校有心想欲培養母語學生,所以學生e厝內家長嘛真出力配合著鬥跤手,揣老師來厝裡教導囡仔。有一工,透早我去山頂足百山做運動e時陣,拄著「吳宸森」e阿媽,伊ia是去足百山做運動,伊看著我,一時真歡喜,隨喙著ka我拍招呼,講:「李先生,真久無去拄著你矣!這馬好無?毋知有閒無?阮翁有咧交代,若有拄著李先生,趕緊請來去阮兜一逝,伊有話欲kah你講代誌,若有閒者,上好是佇這幾工內」,我應講明仔再好無?若會使者ka7恁翁講一聲。第二工e早起時仔,我去做運動轉來,將ka7厝內工課做完了後,大約佇十點外我去in兜揣吳先生,一下入門,吳先生著坐佇大廳內等我,伊講:「李先生入來遮坐,我泡茶請你,好佳哉,阮某有去拄著你,ia2無我揣你幾落工,攏揣無著你,著急ka欲死,就因為阮孫仔佇東興國小讀冊,予學校派出欲參加今年度(台灣閩南語)朗讀比賽啦,校方老師kah校長攏真注重伊參加,所以這擺需要請高手來指導阮孫,朗讀母語e各項要領kah音韻運用,希望會通請你來教伊」,我綴後回答伊:「不敢當歹勢了,吳先生你對我過頭呵咾去啊!我只不過是一个普通e臭跤仙仔nia-nia,毋通ka我捧傷懸去,是會ka我摔死咧,這馬愛看你e孫仔才情tsiah著矣,萬一若教了無好e話,若袂入名次,到時陣嘿叨真歹交代囉,吳先生請你高抬貴手,毋通褒獎進前好無?」過了後,我坐落去伊對面e大板床椅,順紲請伊e孫仔出來,一時仔,伊eui二樓走落來,問in阿公講欲創啥?吳先生講:「我請李先生來教母語做你e老師,趕緊去拈這擺欲參加冬山鄉國小組朗讀比賽e文稿出來,隨後in孫著足百去二樓拈文稿,將稿紙拈落來交予我,我接手掀開看內底,哇!這e資料總共有十二篇」是作者e精粹作品咧,隨後我tauh-tauh-akah伊看一遍,順便請「宸森」讀一遍予我聽,唸了後,當時我看伊e動作kah語音發覺煞有淡薄仔走精去,字音咬了無啥準,動作嘛怪怪,lan-si lan-si無元氣,若依我平常時做過評審e經驗來判斷e話,親像按呢是真難以入選著三名在內,予我真擔心佇咧,既然,逐家若遮有心欲ka伊雕琢拍石e話,石頭嘛是愛來ka伊琢磨,看會通磨成一塊好磚仔袂?毋過,我思考一睏仔,噯呀!不如做焦柴打辦,我嘛愛加減來出一點仔喟力ka伊磨練才著,若無者,到時陣就真歹交代囉,對整個方面來考慮,ia真難以推卸佮失禮,只好我忍受求全來ka伊接納。

                                1

    ui頭一工起,我著當場佇in兜用較輕鬆e心情,ka「宸森」e動作kah音韻教過一、兩遍予伊看,袂予伊感覺有啥物壓力仝一款,隨後看伊真歡喜e心情,iakah4我接近開講,我認為這个囡仔膽量真大,智慧ia真懸是袂禾黒,是一个可取之才e學生囡仔,我隨喙著答應in阿公(吳阿篙先生),過後也真緊到了e黃昏時刻,就kah in兩公孫仔揮手來告辭,我講這暫仔有較閒淡薄仔,第二工我會閣再來教伊,交代恁阿公,叫in孫仔會通踮厝內等我來,因為這暫仔iau是佇歇暑假期間,若是囡仔較mai2予伊出去耍,我會通專心連紲來教伊,被免閬縫(lang3-phang7)教無連接失去注心讀文稿,閣講嘛,賰無幾工通練習矣,過了第二工透早我著閣去in兜,in兩公孫仔真正踮大廳等我,我看in tsiah認真,予我真感動,煞責任愈來愈重一點仔,彼工我就將過去所學e功夫,無囥步來傳授予in孫仔,步數無偷工減料,予in感覺有趣味閣ia禾黒e款,in阿公聽著嘛感覺母語e語詞ia有這遮呢仔好,句句攏真會拍動入去人e心肝穎仔,真有鄉土e氣味kah感情,in阿公一時陣煞熱噗噗,參我足尞落去教in孫仔調整音韻,一句一句教in孫仔愛唸予準,愛按照老師教e標準,毋通走逝去,tsiah袂去予失誤,in孫仔ia無予我失禮著,真認真佇學,起步上台頂e架勢kah禮貌,各種e動作攏做一擺予伊看,伊真聰明乖巧,一屑仔都無去予漏掉,予我嘛教了真有信心,過後連紲五工e調督,有了去死回生e氣勢,佇練習e中間有一工早時十點外,東興國小黃校長有拍電話來in兜咧問,講:「宸森你讀了有好無?」首先伊毋敢回答,等in阿公tim3頭,伊tsiah講:「阮阿公有請一位老師來佇ka我教」,校長問伊是啥麼人?伊煞講袂出喙,當時伊猶閣毋捌我e名,隨手就ka電話接過予in阿公,in阿公知影我kah伊真熟悉,就回答黃校長,是李先生啟明仔兄啦,黃校長應喙講:「是伊喔!我捌伊真久矣,我知我知,真好我放心矣」,電話掛掉了後,過無外久,伊ia隨時叫「夢筑」過來這爿,參落來學習,「夢筑」膽量ia真有,可惜先天性e音質發袂大聲,發出e音量無講介好,我一直擔心伊音量受阻礙,真難以會進入三名在內,何妨這段短時間內,更加袂通調整ka真順序,只好呢?儘量ka伊教,好歹由另日評審人員去做決定。

    隔第三工比賽進前,in學校ia已經開學矣,總是,只有我利用暗頭仔等in轉來厝裡,我才閣去inka「宸森」總複習十二篇e文,看伊所唸過會順序無?結果ia算袂外禾黒,到第五工是九月四日比賽日,我kah in阿公同齊相招去比賽現場,關心in兩个學生,隨時指導in到時愛注意家已e音韻、音質、咬字愛會清楚,動作表情各方面e表現,一一交代予in,經過現場抽籤結果,「夢筑」抽著第三號,「宸森」抽著第八號,比賽一下開始,「夢筑」一直斡頭來看我,我ka伊比手勢搭心肝助膽,叫伊免驚惶,心肝頭掠予定,聲音唸較大聲一點仔,有一睏仔,到了第二號唸煞落台跤了後輪著伊e時,伊ia上台頂,首先伊e動作kah架勢攏真自在,結果呢!果然無錯,聲音有比別人差一寡仔,只有呢?等候評審委員做評分囉,等到第八號「宸森」上台朗讀e時,我看伊袂驚場,閣表現ka真自然,音韻、音質、咬字發聲,動作攏真準確,彼時我e心肝頭攏放鬆落來,

                               2

毋過,擔心猶袂經過評審委員評分出來,猶毋知影結果按怎咧,一時陣,「宸森」in阿公坐倚來我e身軀邊,問我,你聽了啥物款?我應講:「袂禾黒、袂禾黒,可能會通進入第三名以內,因為閣賰兩、三个nia-nia」,東興黃校長坐佇倚in阿公e隔壁,順喙問我,李先生,你聽in兩个啥款,我用手ka伊暗示一下,等煞tsiah閣講。煞了後經評審委員評語過一陣仔,我就ka in回答,我較擔心「夢筑」伊啦,若是「宸森」依照評語e結果,伊應該會入選第三名以內可能無問題,等幾分鐘了後評語全部結束,評審e分數攏送過公所經辦人員遐去做計算,合併評審總分數,到中晝過後,評分就公怖出來矣,果然呢,皇天不負苦心人,無予阮來失望去,「宸森」得著國小組朗讀第一名,「夢筑」得著第六名,宣佈出去,in學校全校師生,校長kah「宸森」阿公、阿媽逐家攏歡喜ka毋知欲按怎講,校方kah in阿公第二工拍電話來阮兜會「多謝」閣講一寡仔好聽話,呵咾我,講教導有方,囡仔tsiah有予伊今仔日e成就,我順便ka in回答:「這總是逐家e力量對母語有咧關心所致,有咧注重咱祖先所留落來e珍貴語言kah文字因素啦,若無者,下一代e囡仔ia毋知通保惜,想欲學咧」,我閣接落講,這完全是像古早人有一句俗語所講:「有心拍石,石成磚」e典故啦,ia是愛靠著恁逐家齊心協力,tsiah有法度會予囡仔保著永遠e記憶啦。第二工我去吳先生in兜,將這e話閣再講一遍予in聽,當時「宸森」ia在場聽阮長輩佇講,伊e目箍仔規个紅起來,煞感動ka流目屎,講以後伊會閣再加強拍拚前進縣府舉辦e比賽,為著校方kah阿公、阿媽以及校長、老師恁爭取功名,看通來補償老師用心e教導kah栽培。過轉工,我送一張紅紙賀聯去in兜,結果,in厝前規个壁面攏貼滿各方來e賀聯,尤其是in本村e舊村長李錦豐先生專工委託我,替伊買一本咱金安公司出版社李勤岸教授所編著,最新e「台灣羅馬字拼音圖解」去送予伊,表示通對囡仔有一種愛護母語e鼓勵,希望伊長大成人了後,tiann7-tiann7會記得這擺e光榮,永遠在學耀揚,久留長存門風。

 

 

                                                         秋 夜  寫 作

 

                                宜蘭縣冬山鄉南興村照安路

三月 09, 2011, 08:46

童玩回春想當年 */李啟明 寫作

Posted by 莊文龍 | 迴響 (0) | 引用 (0) | 閱讀 (484) | 李啟明老師散文 | 推文 (0)

童玩回春想當年

 

    舊年e熱天ui七月三日到八月十五日止,又閣開始回復著宜蘭童玩節鬧熱e彼種場面起來。想起當年  陳縣長佇執政e時代,伊就有遠見e眼光,有想欲將冬山一帶地區,每年風颱e時期,若會拄著災害時,khah低窟e所在,一四界水淹ka足嚴重e問題,時常會造成水鄉澤國仝一款,有時陣,連紲落雨危害到冬山火車路線一帶,致使到佇行駛中火車受阻礙,結果停駛袂凍通過,因此,這个地區農作物損害也相當厲害。了後,伊將這个所在規劃做成一條非常有效率e排洪水道,這條水道號做「冬山河」,當時也將該河ui頂懸山頂直透到下爿海口,分做三段式上、中、下游,周邊增添觀光設施計劃,一一做到盡善盡美e作用,將爛塗變做黃金、廢地變做貴地e目的。

    冬山河水源本來著真豐富,一般下游地帶也有比較其他所在,水勢khah旺盛淡薄仔,因故,將下游建設分做二位觀光地點,南爿勢方面魚塭仔附近,設做古色古香e「國立傳統藝術中心」,內底設施是屬於古典式e台灣古厝貴族庭園以及閩南式e街路精華店舖,古典廟宇、戲台,路邊有賣四秀仔佮小食店,閣過對面下崁跤彼爿有設遊艇小港澳,等待人客欲坐船通往對岸親水公園去沿途遊覽景色,一路上大小遊艇來來去去,交雜無停,遊客不斷e前往親水公園迫迌、樹跤訥涼、池窟仔耍水,看一寡仔外國人佇舞台頂獻歌藝、表演舞蹈劇。

    回想當年,  陳縣長接手予游錫堃先生辦理縣政了後,  游縣長便細心運作依照計劃,將冬山河親水公園各項措施,著手公園內開始設備有遊艇港澳,眾人耍水e所在,周邊四圍屯滿懸低e山坡,培植樹林,另外綠地凹窟所在設有一座野外表演舞台,專門欲予遊客觀賞外國來e各種民族舞蹈佮歌唱演技。過去頭幾年仔我會記持開始辦理e時,遊客是人山人海,名聲嚮應海內外,遊覽車、自家用e車輛,規个大型停車場全部爆滿,園區內耍水窟仔獻出多彩花樣,遊客大膽裸出熱天e風格,查某人穿著比基尼e衫仔褲佮三點式e游泳裝、查甫人裸出原始e身材,穿著清涼衣夏e褲,大人囡仔耍ka歡頭喜面、興忘掠狂、暢樂不休、毋知自我e境界,彼幾年仔將安呢規个冬山河帶來無限e聲望四處遠播,宜蘭人開始拍出一條國際路線,將咱台灣國民佮外國朋友做一个友善交流,由安呢奠定了良好e基礎。

      劉守成縣長執政時,這个冬山河也有辦過真奢颺e角色,伊佇游縣長退任接過來e工課也袂少,所有園區內e公共設備嘛有沓沓仔完成,尤其是一寡仔遊艇部份,就增加了袂少隻,嘛有太陽能設備e遊艇二隻,小型e遊艇幾若十隻,遮个遊艇對「國立傳藝中心」佮「親水公園」兩岸河面中間,增添了袂少e光彩,對遊客來講,兩岸河內一切交通也真方便,若是坐佇遊艇內也通欣賞著大自然e風景,予遊客飽受眼福、心情清爽,過著熱天清涼一下e好所在。

    可惜冬山河有彼種驕傲e聲望,得來是無彼呢仔簡單咧!毋過有一暫仔佇三、四年前煞來停止辦理,嘛予縣民帶來悶悶不樂幾若年,規个冬山河強欲變成無作用e廢園去,園區內一片冷靜、氣色消沉,外口各行各業e商店、民宿區也難以經營落去。好佳哉,佇舊年有了  林聰賢縣長開始接辦,就有按步為營,依照  陳縣長e遺囑交待,將冬山河過去應該做么袂完成e代誌,一一重新做起,起死回生,閣再回復整頓,ui一座失落e表演廳重新搭起鐵架崁帆布,耍水窟仔佈置一寡仔水迷宮、水戰車、水滑梯、水陀螺、迷幻霧宮等等,予大人囡仔興e噴水池來耍,園外冬山河水面頂懸,另外搭一條跨河面兩層e吊橋,下面設置幾若區農村景色e庭園,將河面頂配置到多彩多姿e美景,吊橋頂、吊橋跤,予遊客帶來歡喜心,滿面笑容行過吊橋佮坐自轉車仔來來去去,挨挨陣陣耍ka毋知通煞,這个熱天e氣氛將這个冬山河帶動了空前未有e活熱起來,這就是予宜蘭童玩節將安呢閣再回復了過去失落e風光,揣倒轉來。

    這个童玩節自開辦以來,毋但拍開了國際上e知名度以外,對著宜蘭縣也有帶動袂少e經濟繁榮,予經營各行各業e生意人攏心情好kah喙笑目笑,大街小巷鬧熱滾滾,有時陣嘛會予人有一種感覺著,另外變成新e社會不斷佇進步、繁榮。尤其這个童玩節有特別e意義存在,親像園區內有設一座野外劇場,這个劇場通予國內外舞蹈團、歌唱家來表演,發揮著in十七國十八團e民族舞蹈藝術才華,嘛通予遊客飽滿著觀賞e眼福,閣khah通好去靠近外國來e朋友做一份親善友誼,予外國人感受著有一種台灣是豪客之邦、自由國度,人人接受、人人呵咾,有相當國際水準生活e一个好所在,予in轉去通永遠懷念,順機會傳播予逐家知影。

 

 

                                         文稿寫于  宜蘭  冬山

                                                         李啟明  寫作

 

                                       

 

俄羅斯2團、英國1團、蘇格蘭1團、斐濟1團、斯洛伐克1團、

 

日本1團、韓國1團、墨西哥1團、阿根廷1團、芬蘭1團、   

 

印尼1團、土耳其1團、玻利維亞1團、立陶宛1團、古巴1團、

 

斯里蘭卡1團、馬來西亞1團,等十七個國家來冬山河親水公園表演。

三月 09, 2011, 08:45

龜蛇把海口 文:李啟明

Posted by 莊文龍 | 迴響 (0) | 引用 (0) | 閱讀 (1584) | 李啟明老師散文 | 推文 (0)

龜蛇把海口        文:李啟明

     佇宜蘭這个所在,對各位角落攏看會著伊的精神地標,

這座(龜山島),伊到這馬一直浮佇海中央把守海口,尤其是佇蘭陽溪口望去海邊勢彼爿,伊的形體就予人看會出一隻親像活靈靈的海龜仝一款,真活寶佇遐泅水,予宜蘭人出外的子弟,有機會轉來到蘭陽的雪山隧道口,也是坐火車出石城的磅空口,就看會著龜山的形影,予人會感覺有一種講袂出喙,歡喜的心情留佇心肝底。

    火車若行到頭城站閣過來南爿的時陣,目睭望對海墘仔彼爿去,對竹安里起一直到壯圍、蘇澳的無尾港沿途沙崙這爿,規路有一條真長真長的沙崙仔,聽早期的人咧講:這是一尾蛇形的地穴,因為佇古早頭城的大坑罟,逐年攏有咧跳過火做年祭,火氣過旺將這尾蛇煞來燒死去,變成死蛇活尾溜,落尾仔這條沙崙煞失去作用,予海水一直侵蝕割走去,到現此時猶原留一寡仔蛇形遺蹟佇咧,所以蘭陽地區有這兩種動物的地理,對保護海口的威力是相當大的作用。               根據過去舊時代的傳說,台灣予滿清政府戰敗無條件割讓予異邦日本的時,日本欲來接收台灣進前,起先想欲對宜蘭上陸,結果有考慮著這兩隻地獸佇做屏障,毋敢輕易入來遮侵犯,了後日本的海軍艦隊才閣踅方向,彎路踅對福隆去,將按呢對宜蘭方面減輕了袂少的損失佮傷亡災禍,就是按呢的原因,龜蛇把海口的威力作用一直留落來傳說到現在,永遠記憶佇在地人的心目中。

 

 

                                       寫於 宜蘭縣 冬山

 

三月 09, 2011, 08:44

台語認證彼段前後 / 李 啟 明 /

Posted by 莊文龍 | 迴響 (0) | 引用 (0) | 閱讀 (754) | 李啟明老師散文 | 推文 (0)

 台語認證彼段前後      / 李 啟 明 /

 

  話若是欲講透機,目屎就會掰袂離,為著「台語」這兩字,我嘛用心疼惜伊,真誠對待做代誌,煞夆掛名背骨氣,這是心理e狹疑,哪有這款歪道理,大人冤枉我毋是,在此澄清真心意。這段漫長e日子,受盡苦楚ia真濟,行過e路途是坎坎坷坷,真歹行,毋過,我嘛行過來矣,應該逐家有試探過e人士in攏知影才tioh,這擺經過風風雨雨e結果,受盡關懷台語界e一陣愛心前輩,佮各地所在諸位熱忱護航台語e人士拍拚,今仔日才有這个影跡機會,通來推拺出遮爾難得e台語認証考試舉辦,這應該會通講是一種福音才tioh,逐家攏感受會tioh,尤其佇我本人e心內底,有一種真難講會出喙,感覺真好e代誌,予人有溫暖、有精神e氣氛咧寄望,這份愛心就愛感謝諸位e骨力,所得來e成果。

    我會記得佇兩冬前,有一擺機緣佮一位  貴人相逢,佇台北開會e時,我佮陳先生明仁兄談起咱台語到今猶是真落魄,將近欲予人消聲袂記得去,這个問題,

希望伊通出一喙金口ka逐家講,看會通閣再來舉辦考試無?若無者,咱一寡仔咧用心計較,欲推廣台語一寡e門路,煞強強欲窒(that)去ah,予人封殺掉囉,將來毋知欲何去何從才好咧,到路尾仔無的確會予人來自然消滅掉,變成一陣風消聲無影去就害矣!我問伊,你敢袂煩惱這點?話雖然是阮兩人按呢咧講,毋閣,無遮爾仔簡單就通做會起,當時伊煞停頓一時,無法度回答我這个問題,彼時有感覺一點仔困難佇咧!因為這个代誌我必須要提出來討論,才袂予我激死蹛心肝底,過去我也曾經有用台語課程教過在地社區大學學員,ia受一寡仔學員e反應,彼時陣借機會不得已才共明仁兄提起這件問題來罔談,結果伊一時ia無法度大膽來回應我所要求e問題,ia就按呢就做準煞去。日子ia真緊佇不知不覺當中過去兩冬外矣,無疑悟,做夢想罔想,,佇今年真正有影煞來實現這件代誌,這講起來是明仁兄佮一陣有心e人士拍拚之下,予阮下跤層e人,有福份通來得著這份溫暖e甘露,我佇這个一生中感覺是真萬幸e好代誌,深深感謝逐家,將咱台灣閩南語拍出一條生路,親像有一道陽光照落,開始通看見真媠e花蕊咧開矣。

    本成今年舉辦台語認証考試,我ia無機會閣無想欲去參加,因為當初聽阮語文學會內底老師有咧講起,這擺考試是欲予在校教冊e老師in應考e,閣再講,我拄好身體無啥順序,有欠安咧咧,蹛長庚醫院,佇等待心臟通血管e代誌愛辦理治療,ia無心情通去管遮e代誌,就按呢想欲共伊囥一邊,結果我過無偌久出院矣,阮會內e老師ia真無打緊,隨時共我通知這層代誌,講咱台語認証考試欲閣第二擺報名招考,是會通開放予「一般民眾」參加應考,彼時予我知影遮爾好e消息,我一時無去想著家已身體猶咧療養中,隨時就半暝半馬上敲電話通知以前我所教過e學員,予in有機會通去參加報名考試,當時我嘛無去想著食老無認老,就佮in陪伴同齊紲落報名,我想,借這个機會通試探考驗我家已,對台

                                1

語看有幾分e實力,人講,人生過程是無偌久長,為著咱e祖先所傳落來e母語,

無論按怎嘛愛thinkah到,毋才,這擺我想著較早e人咧講:「人食到老,愛學到老」e精神這句話,所以無認老e我,毋管別人有按怎批評,我就毋管三七、二十一港e ka足尞落去,予人笑嘛無要緊。

    今年拄好縣府閣再指定我佮鄭安住、楊文通兩位老師,三个一組負責閩南語朗讀部分,欲擔任宜蘭縣內語文競賽評審委員工課,真可惜,ia無時間閣再共遐个進前教過e學員補習一遍,只好阮會內做決定去外聘教授來共in做研習課程,in是專家,嘛較了解這擺台語認証考試e內容佮程序,閣再講,順紲我嘛通來充實家已e一寡仔模擬方式,試題學習應付考試。可惜,時間ia真迫近,只有用幾工仔研習佮模擬課程安排,到了考試彼一工,有的為著「台羅音標」e問題,心內真緊張驚惶,驚無熟手聽寫應付袂來,結果煞毋敢去參加考試,只好來放棄,我感覺真可惜,落尾仔我共in遐的有來考e學員講,親像按呢無來考就失去機會ahah若參加嘛加減有機會敢毋是,in逐家攏認為著矣,其實,照看起來試題並無遐爾困難,只要有信心佮細膩看題聽寫,可能加減嘛會寫一寡仔才著,萬一若有較深e題目,就暫時mai作答,等到落尾仔,選擇題才閣來覆一遍,比較khah穩,避免答題差錯煞夆扣分,這是一種考試e秘訣,請逐家著愛記牢咧。

    彼工考試了後,出來場外,我有問in逐家考了啥物款,有人講嘛袂禾黒ia有人講普通普通,ia有人講真慘ah,愛款pau-hok-a轉去食家已矣!我閣問in到底是啥情形,in講選擇題到尾後段有較困難淡薄仔,煞落寫袂赴對答,有真濟條無法度做,閣再講是「台羅音標」練無真熟,寫ka不答不七,寫毋tioh真濟,遐e就無可能得分數矣,毋過,嘛有人歡頭喜面咧笑,這个代誌是真正心適,ia有歡喜ia有煩惱。總是,這个問題在我想,這應該是愛講,各有千秋,隨人造化,所以,這擺e考試過程ia算真平順,彼工佇逐家歡樂e氣氛中做一件好代誌來完滿結束。

 

 

                                                    佇 宜蘭 冬山 夜暗

 

                                                    201011  寫作

三月 09, 2011, 08:44

外籍新娘e教學過程 / 李啟明 /

Posted by 莊文龍 | 迴響 (0) | 引用 (0) | 閱讀 (1007) | 李啟明老師散文 | 推文 (0)

外籍新娘e教學過程          / 李啟明 /

 

    佇西元二000年以前,我是拄佇開始tsiah學一寡仔羅馬音標e概念nia-nia,半項嘛m捌,初入門e新跤數,彼時陣會通講是羅馬音標佇論戰e時代,有幾若種e版本出現,比如講:「有教會羅馬音標、也有TLPA抑是TLPA改良式e音標、通用拼音法以及台語現代文書法」等等幾若種音標佇市面發行,我當時ia有去學tsit幾若種e音標,結果煞hoo捲入內底,舞kah強欲袂喘氣頭眩目腫,m知欲行對佗一條出來khah好勢,聽講tsitkhah好用,khah標準,ia有人呵咾彼套khah讚,khah穩當行會久,hoo我聽kah霧嗄嗄,強欲檔袂牢,tsit款原因是各據山頭咧作怪,總是攏咧買花講花芳,無一項會準算,上好每一項攏ka伊學hoo徹底,m管佗一項我攏通隨時應付伊,可惜到落尾煞無學真熟手,因為拄著有一擺e機緣,我去台中參加台語社推展協會in開創辦會,首先in hooe好印象是有來自各地方e有志之士真濟人,ia koh印一寡仔雜誌咧hoo人參觀購買,親像(台語世界雜誌)、ia有(茄苳社雜誌),kap幾若種e冊本排佇遐,十花五色攏有,聽講ia有設立雜誌園地咧hoo人投稿,場面相當氣派熱滾滾。彼當時我tsiah去熟似著吳先生長能兄,兩人講kah熱噗噗,有講有笑袂輸親像至親e朋友仝一款,伊待人熱情、和善客氣,當時ia tshua我去kap林先生央敏兄熟似,三人佇會場鬥陣kah形影不離,in彼工請我食中晝飯,會使講是我ui遠方去相tng頭,上歡喜e一件代誌,永遠留蹛我e心肝內真甜蜜。

    日子ia真緊過,已經有兩年外矣,有一工我佇局內上班,同事對我講有一通電話是外口小姐拍來,講話真幼齒,敢是有好空e?伊真愛滾耍笑,我對同事講khahkhah無蠓,亂來是會害死人咧!逐个笑笑一下著準煞去。我去接電話過來聽,結果是一位kap我無熟似e小姐ui宜蘭拍來,伊講伊是宜蘭縣生命線e辦事人員,tsit幾工奉命宜蘭縣政府民政課委託,in蹛縣內愛舉辦外籍新娘台語講習班,欲倩一位台語e教師來替in教學。我反問伊,你哪會知影我是會曉教台語?伊講幾a工前有去外縣市物色倩人來教,結果有一位林老師央敏先生替我介紹你,順紲留你e電話,hootsiah知影tshue著你,希望會通來共阮幫忙,一時陣我嘛m知影欲按怎來回答伊,了後等過兩工又koh拍電話來,想欲ka伊推辭又koh歹勢,袂輸真khoo咧,伊煞講真要緊愛倩人教,彼時,我心內ia真著急,我現此時無教材是欲按怎教起,又koh考慮in逐个人攏是ui外國來e新娘仔,一國一款語言是欲按怎準備教材khah好?伊煞教我開一條路來行,伊講你是m是會曉羅馬音標嗎?我講是啊,有學淡薄仔,若按呢就好辦矣,ine人欲嫁來咱台灣進前攏有學過國語,又koh你會曉音標,將按呢用音標做教材編hoo in去學就好啊。我一時想想一下,嘛是會使咧!可是我佇上班無啥物時間通安排課程,伊koh ka我講上好愛分配南北兩爿去教,m koh我真正難以分配,只有答應in一爿就好,另外北爿方面hoo 別人去教,了後伊講欲去問看覓一下。

1

M koh經過一段時間無消息,m知是隨人客氣ah是無人去學著羅馬音標e原因,煞tshue無人通教,拄好hoo我抾著好康,in koh回頭來tshue我,交代講就按呢兩爿e人來合併做伙一个所在,場所in ia tshue好勢矣,是佇南爿靠近羅東地區,請我著愛答應in隨時來編教材,事實上,我彼站仔工課ia真無閒,局內底身兼重務又koh愛去北投受訓鐵路電腦,逐項代誌攏迫近矣!想a想,欲按怎khah好咧,結果hoo我想出一條通路,將上近e時間安排hoo in,利用欲去訓練所進前先寫一寡仔教材草稿方案出來,然後koh再修改完整,用傳真聯絡蹛佇桃園e吳長能老師幫我做工課,將我所編成e台語教材全部攏翻譯做羅馬音標,伊ia真好央叫,跤手真meh掠,翻譯功夫ia真懸,佇兩、三工中間就用電腦拍好勢矣,順紲替我閣E-mail過來hoo宜蘭縣生命線家己去印教材資料,煞hoo我方便真濟。下面是我用簡單編輯e教材捧手出來做參考,若有欠缺e所在請指教,我將最實用e語句編寫,比如講:「老師早安、(早安、午安、暗安)、逐家敖早、我欲學台語、爸爸(阿爸)、媽媽(阿母)、老師、學生、阿兄、小弟、阿姊、小妹、先生(翁)、太太(某)、牽手、囡仔、查甫人、查某人」。第二頁編寫是至親家族,親像(阿公、阿媽、阿伯、阿姆、阿叔、阿嬸、伯公、姆婆、叔公、嬸婆、阿舅、阿妗、阿姑、姑丈、阿姨、姨丈、阿嫂、弟婦仔、外公、外媽)kap咱有時常愛用e新台幣ui十、百、千、萬e數目一一列出。iau koh有咱台灣日常生活e語詞,比如講:(我欲去市場買豬肉、雞、鴨、魚,我欲去菜市仔買菜,你欲買啥物菜,我隨便看隨便買,我欲去水果店買水果,你欲買啥物水果,我欲買王梨、弓蕉、紅柿,太太你欲去佗位,我欲kap阮囡仔去學校,多謝、多謝你)koh有一寡仔地方名,比如講:(我欲去台北,我欲去台中,我欲去高雄,我欲去花蓮),以及宜蘭地區e地號名,比如講:(頭城、礁溪、四城、宜蘭、員山、壯圍、羅東、二結、五結、冬山、三星、大同、蘇澳、南澳、南方澳)等等。另外koh編一寡仔俚語(人講俗語),比如講:(一鄉一俗)=風俗各異,(一喙唅一舌)=木訥、不善於言詞,(一名透京城)=名聞到京城去、很有聲譽,(一念感動天)=人有真誠、天方能助之,(一丈差九尺)=相差甚多、事不容合,(一支草一點露)=人各有生活之路,(一理通萬里徹)=一通者百通,(一下雷天下響)=一鳴驚人,(一句話三角六尖)=話鋒尖利,(一樣米飼百樣人)=人有各式各樣、好壞有幾百種,(七做八毋著)=七做八錯,(七呼二萬五)=胡言亂語,(七坐八扒九發牙)=嬰兒七個月能坐、八個月能爬、九個月會長牙齒,(七拄八毋著、串拄咾咕石)=事事差錯,(九籠糖十一人頭家)=粥少僧多人多語雜,(十喙九尻川)=人多意見多,(十做九不成)=無專一之技就不能成事,(十二生相變透透)=各種行業都做過,(十二月食菜頭、六月才轉嗽)=事過到日後才顯露,(人心牛腹肚)=人貪慾無厭,(人重妝佛重扛)=人重衣穿來修篩,(人未到聲先到)=大聲喉的人,(人食喙水、魚食流水)=口才流利處事要訣,(人愛人皮、樹愛樹皮)=人重面子及外表,(人情世事陪到到、厝內無鼎也無灶)=應酬花費過多、實在應付不了,(入門看人意、入山看山勢)=進門要先觀察                                                                                                     2                           2

人家意見,(女子無才便是德)=女子重女德,(大舌興喋)=口吃的人,却偏愛講話,(大目新娘無看灶)=身邊很近的東西,却看不見,(大丈夫一言說出,駟馬難追)=男人注重言語,不能亂講話,(歹歹翁食袂空)=丈夫雖壞還是可倚靠他生活,(歹家神通外鬼)=將家事洩露外方,(歹竹出好筍、好竹出龜碖)=家破出才子、家好却出敗家子,(牛瘦無力、人散白賊)=說謊話,人窮志短,(水缸拍破壺仔序大)=水缸破了,小壺就代替它,(生米已經煮成飯)=事情已成定局,大勢無可挽回,(目睭皮無漿湆)=眼光不靈活,(古井水雞毋知死活)=見識淺薄,不知天高地厚,(甘蔗老頭甜)=人愈老愈有名聲,(拍狗嘛愛看厝邊兜)=左鄰右舍要相互照顧。另外iau koh有我寫作e兩首歌,第一首是號做「蘭陽好山水」內容是按呢:(1.阮招恁來去宜蘭、佚陶看花欉,咱心情放予輕鬆、沉醉百花芳,龜山島現出嬌媚、風景足迷人,我牽你過去彼爿、欣賞烏石港)(2.蛤仔蘭上蓋出名、好食金棗糕,梅花湖遊山玩水、散步好佚陶,冬山河親水公園、划船別位無,太平山森林青翠、嘛有觀雲閣)(3.蘭花開又芳又媠、礁溪出燒水,泡溫泉美女規堆、包恁袂失悸,咱緊來追求幸福、人生看予開,南方澳船影回歸、蘭陽好山水)第二首是號做「成功著愛靠自己」內容是按呢寫e詞:(1.咱人若有不如意,無啥物通好傷悲,因為你是一个男兒,應該提出咱的勇氣,無論是拄著啥物,困難的代誌,著愛忍受克服一切,人生難免會失意,我來鼓勵你至深的真理,踮在社會上欲徛起,成功著愛靠自己),(2.為著生活不得意,顧三頓離鄉求利,出外親像一个孤兒,金言玉語你著會記,無論是透風落雨,家內的代誌,著愛注心照顧四序,坎坷路途愛注意,我欲祝福你平安閣順序,早日趁著錢回鄉里,才會過著好日子),(3.咱人若有不如意,無啥物通好傷悲,因為你是一个男兒,應該提出咱的勇氣,無論是拄著啥物,困難的代誌,著愛忍受克服一切,人生難免會失意,我來鼓勵你至深的真理,踮在社會上欲徛起,成功著愛靠自己)等以上是小弟所編寫e外籍新娘台語教材,在此袂當用羅馬音標閣共注明詳細,真失禮請原諒。歌曲e部份(蘭陽好山水)曲是暫借台灣最傳統e老歌曲(懷春曲)來填歌詞,iah若另外一首(成功著愛靠自己)是新編e歌曲。

    當時為著欲趕緊編教材起因,將按呢就送出hoo外籍新娘in來做讀e參考冊,

並且加送各位一塊我所做e錄音帶教材hoo in,拈轉厝內家己複習,等in上課日來e時,我tsiah koh重新ka in教一遍,隨後各人提出me問題,一一ka in解釋糾正。因為學生是來自外國,親像菲律賓、越南、印尼、泰國、韓國kap中國內地一帶e人,起初難免會khah歹教淡薄仔,m koh in嘛真認真咧學,in為著欲kap厝內人和睦相處平安過日,只有認份來學攏袂缺席,有時我咧教水果e課程日,我會隨身帶一寡仔水果去hoo in辦識知影一下,順紲hoo in做餘興節目時,試食咱台灣所生產e果類彼種滋味,hoo in更加知影去水果市場是欲按怎買物件,欲按怎講水果。尤其是佇in翁婿相陪送來教室時,我會特別ka in留佇遐陪伴一站仔,hoo in某減輕心理上e壓力kap驚惶種種問題。親像有一位ui韓國嫁過來新娘仔,伊就有發生tsite代誌,逐擺來攏看伊面仔青恂恂,敢若真驚惶

 3

e款,我攏用安慰e方式ka伊慢慢仔教,過一段了後,就袂koh再有tsit款現象發生矣,也有一寡仔新娘仔拄嫁來台灣對生活起居袂習慣,語言聽無koh音質袂適合,變成我對伊發音咬字問題,定定咧咬袂準,尤其是咧開始e時,母音kap子音分袂清楚,鼻音kap喉塞音發袂出來種種因素,致使到進度去hoo拖慢,拖到尾仔我教e時間ia漸漸欲迫近矣,我愛去北投受訓電腦e日子已經到矣,就按呢欲結束進前賰無幾工,姑不而將tsiah拍電話去拜託長能兄來替我鬥跤手做一个修尾,就是有按呢原因我在此想欲大膽借用tsit个園地,順紲來ka央敏兄kap長能兄說一聲多謝,祈望有時間kap恁夫人同齊來寒舍佚陶,絕對以禮泡茶奉陪,暢談咱過去e往事。

 

 

 

 

                                                  寫 佇   宜 蘭 縣   冬 山

 

                    夜暗寫作

三月 09, 2011, 08:43

霜 風 冬 草 / 李啟明 /

Posted by 莊文龍 | 迴響 (0) | 引用 (0) | 閱讀 (532) | 李啟明老師散文 | 推文 (0)

            / 李啟明 /

         霜風降落冷吱吱、孤獨形影心空稀

         出世寒家無塊比、認命自有我長持

    寒冷e冬天,冷風微微,霜雪雨仔霎霎一直落來,佇濛霧中有一台三輪車ui2遠遠e所在慢慢仔駛過來,車伕伊e跤沉重一步一步踏著兩片e跤踏板,無奈e氣力佇載著兩位嬤孫仔e人客,in e目的地是欲去頂福成e遠路,頂福成是倚佇山邊偏僻所在,一路載著兩位人客閣是愛足百山嶺e艱苦路段,車伕這个阿江叔仔嘛愛費真大e氣力,tsiah有才調趁著這筆流汗錢,彼日伊身軀頂穿著一領黑色棕蓑,無情e風雨一直向伊面頭前霎落,這陣雨袂輸置創治伊,考驗伊e意志佮勇氣仝一款,阿江叔仔為何欲食這種苦呢?唉!伊e遭遇真真是講袂完咧

阿江叔仔伊e牽手早著過身去矣,厝內只有留落四个囡仔,一个查某囝、.个後生,伊為著欲晟養這四个囡仔,予囡仔kah人會當相比評,大漢了後看會khah親像抑袂,無可奈何只好忍耐著一切,拖磨忍勞受盡風霜來度生活,逐工伊攏是天袂光,天色暗淡,每家攏當佇入暝e時陣,伊踏著彼台三輪車去火車頭等待人客,當初社會景氣蕭條又閣是佇庄跤所在,車頭(車站)e人客並毋是真濟,平常時攏是主顧客來叫車khah濟,因為伊對人親切,忠厚老實、恭敬有禮,袂濫糝(lam7-sam2)對人客收費傷貴,錢銀真凊彩,所以熟似e人客真愛予伊載。佇彼當時e農業時代拄欲轉向工業時代e時陣,三輪車這个行業算是比較khah先進e交通工具,人客若想欲去khahe路途,著愛坐三輪車khah方便,來來去去嘛比較khah緊淡薄仔,阿江叔仔有這台三輪車也予伊趁袂少錢來維持ine生活補貼,人講:「人生毋驚受苦,一枝草一點露。」苦命人總是有一套伊家己過生活e方法,通去應付日日愛度過e難關。

光陰如流水一年又一年一直過,經過了五年e風霜歲月,伊e查某囝,已經長大成人二十歲e少女,伊e名號做「阿琴」,查某囝孝順不落後人,知影老爸孤獨一人咧為一家拍拚趁錢飼囝兒,實在是真辛苦,查某囝自恨袂當趕緊學一手仔功夫來作穡趁錢,通ka in老爸仔鬥跤手家境。想啊想,拄好in兜斜對面有一間「阿花姨仔」所開e裁縫衫仔店,伊一心一意想欲趁錢,也對阿花姨仔特別尊敬,凡是in兜有需要伊鬥跤手e代誌,伊攏真肯做,作穡閣輕快、伶俐、清氣相、有規則,親像洗衫仔、煮飯、掃塗跤兜伊攏袂輸別人,阿花姨仔伊內面厝e代誌也真需要一位助手,看阿琴仔真佮意,就將伊收起來做司仔(sai a2),將此就逐工按步一項一項教伊,初起先畫衫仔圖、閣來裁剪、釘紐仔、開紐仔空等等工課。阿琴仔伊袂貧惰,有閒e時提起廢用粗紙當做布料,慢慢仔共阿花姨仔所教伊e手藝技術閣再套一擺,予伊會當熟手,日暝攏想欲趁錢e伊,不斷e學習、苦練,過無外久,初步e工夫就去予伊學上手。兩年了後,伊心情依依難捨離開

                             --1--

了阿花姨仔e做衫仔店,轉去in兜開始租厝做衫仔創業e生涯。頭先無本錢只好佮朋友鬥陣開一間細仔間e做衫仔店,起初做事起頭難,事事項項攏khah欠貨,了後tau tau a2存貨,過一漫長e時間tsiah好生意起來,兩人認真拍拚生意也做了真順利錢也趁袂少,家己儉一寡偆e錢提予in老爸鬥相共補貼,加減來減輕in老爸e厝內開消負擔。了後伊想欲擴展khahe事業,將舊店留予伊e朋友,家己轉來厝內重新開店,順紲兼顧厝內穡頭,當時農業時代有園地通種菜猶算袂禾黑,一塊溪埔地著分配予伊e大小弟去菜園仔加減種菜,二小弟去佮人學修理自轉車,in厝內三、四个人合力起來經濟狀況著慢慢仔穩定。過了五年,大姊阿琴仔有媒人來講親情,毋擱伊猶無想欲嫁,伊掛念著厝內猶有一个屘小弟置讀初中,需要人來栽培伊e學業完成,可惜早前in e家境無好,伊e屘小弟李正利讀冊過度用心,致使雙眼一時來失明(致白內症),一段時間經過in大姊細膩e照顧,去一四界求醫問神,結果皇天不負苦心人,將期尾神醫救好苦家人,in小弟e目睭漸漸復原。in大姊拄好仝彼年交著一位男朋友,經過交往一段期間,兩人情投意合,隨年關接近關係也經爸母同意,雙方便作成締結良緣嫁去男方。

           姐弟連籬有時陣、長大成人各自奔

           袂當一世倚靠勻、做人序細守本份

    正利初中三年讀煞畢業,結果無大姊通好援助繼續考高中,只好歇睏一年,蹛厝內療養身體,順紲充實功課,等候瞑年閣再考高中,佇這一年e中間,伊認真讀冊,若有人客叫坐三輪車e時,伊著代替in老爸載人客去外庄頭,去上遠e所在有四、五公里外e壯圍地區抑是過嶺仔一帶,踅倒轉來e時,攏愛到日落西山黃昏時。in老爸看傷暗轉來毋甘丟丟,總是叫伊先入去灶跤間洗身軀、食飯,隨後著叫伊去睏,毋擱,正利攏ka in老爸講伊袂忝,冊猶袂讀完,等若讀到半暝仔愛睏e時著會去睏,順喙請in老爸先去睏,因為in老爸置第二工透早攏愛去火車頭(車站)等人客載in四界去。正利伊是讀冊人,知影奉陪老爸是應該愛報答恩惠,處處攏佇替老爸想,暗頭仔in老爸若入去睏了後,有時陣伊會過去隔壁揣朋友佮in探討一寡仔有關未來應考高中e資料以及升學e課程。因為伊偏愛歷史e冊,愛讀歷史故事,所以時常向我借古冊去看,親像三國誌、水滸傳、戰國春秋等等,尤其是唐詩三百首、四書五經伊特別佮意,三工兩工伊著提來唸唸一下仔,歡喜e時,伊著唸幾首仔詩予我聽,唸著真爽快e款,有時我嘛會綴伊唸,兩人感覺真投合閣心適。第二年e秋天,正利參加頭城高中部考試,結果毋若順利考牢閣是得到頭幾名e成績,欲開學e時陣,問題來啊!厝內散赤無夠錢通繳學費,差一點仔著無法度去入學,隨後in大姊知影伊欠學費袂當註冊起因所致,隨時佇第二工趕緊提一筆錢來替伊補足學費,tsiah順利註冊入學。開學e第一工佇典禮e會場上,老師知影伊有這款困難e情形,同時kae代誌借題宣佈做為表揚楷模,毋擱伊感覺真見笑,毋敢夯頭起來,老師想法無仝款,

                                 --2--

認為這並毋是做歹代誌,是會當啟發學生上進e好模樣,希望學校學生像伊佇困苦e環境中猶原努力拍拚,實在值得呵咾佮鼓勵,宣佈了後全校師生拍噗仔熱烈回響予人真感動。入學e頭一年,因為伊e性質溫純、斯文、有禮貌、親切、樂觀、愛幫助人,課業又閣好,逐家攏佮意佮伊接近,伊真聰明乖巧,考試攏是第一名抑是第二名,受著老師e疼愛佮同學e尊重,稱讚伊是學校有史以來上受肯定e一位模範生。

     正利腦力過聰智、可惜出身苦命理

     寒家奮發求生機、全校師生疼痛伊

  過一年欲升高中二年級進前,伊閣煩惱學費e問題,時常鬱卒在心頭,苦字寫佇伊e頭殼頂,逐日愁眉不展,厝邊隔壁、親情朋友,看in家境這種e情形,不時攏有佇關心,想盡辦法欲來幫助伊,親像有一寡人客需要搭三輪車去外頭辦代誌e時攏走去in兜通知叫車,連半暝仔產婆欲去ka人接生嬰仔需要叫車時,有時拄著風雨暝,in攏袂拒絕,隨時攏會接納客戶叫車,真好央叫,人人呵咾,in兜是一家大善人,上天應該是愛賜予in好過日tsiah著,毋擱人總是能力有限,佇風雨中出出入入趁錢,難免攏會去遭受著身體拍損,受風寒致破病,阿江叔仔著是佇這款環境之下日拖暝磨e生活中,無注意煞去予感冒著,一暫仔期間內變成肺管發炎,嗽kah真厲害,伊一向真儉底,毋甘去予醫生看病,攏是家己蹛厝內煉草藥仔醫治。彼段時仔著放予伊細漢囝正利去發落家事,正利認命真會當受置食苦,工課攏是照紀綱佇做。伊利用這段老爸歇睏療傷e時陣,儘量出去代替in老爸踏三輪車趁錢,順紲加減準備伊家己e學費,暗時轉來tsiah做學校功課。兩、三個月中間平安予伊度過難關,in老爸破病終於好矣,正利家己也進入高中二年級e學業課程,這學期因為伊家己會曉趁錢補貼一寡仔學費,也順利閣繼續讀落去,上課e頭一工同學看伊來e時,逐个攏歡頭喜面佮伊開講拍招呼,歲月總是會累積伊e証明、學識,佇學校伊建立良好e學風典範,師生愈來愈接近,學風氣勢愈旺盛,彼時變成佇校園內產生一股有力e讀冊風氣,也按呢列入全校頭號e名銜。光陰如流水,真緊學業已經過兩年矣,正利人品骨力佮勤儉,過一暫仔予伊儉一寡錢銀,第三年e學費著毋免閣再煩惱,平常時攏按時到學校上課,若下課轉來著是等候人客叫三輪車抑是做家內事,有時陣in兩个阿兄置厝e時,伊著通閒一下仔,行來阮兜開講啉茶,因為伊上進又閣乖巧,真值得阮父母e疼愛,袂棄嫌阮兩人做朋友,內面若有啥物好食e四秀仔攏會加減予阮兩人做啖糝,所以伊真愛來阮兜。日子一工一工漸漸過去,春天過了又閣夏天來矣,阮兩人變成一對真相好忠誠e朋友,會使講是逐工兩人褲頭結相粘仝款,形影不離。

有這个隔壁朋友時常來往交流學術予阮增進袂少e課業學識,老師佇課程上交待e作業伊攏是等到暗時仔內面無空課e時,tsiah開始寫伊e作業,伊腦力真強,做代誌真緊,無外久著予伊寫完成矣,會當講是聰敏過智、不落後人e好學生。

                                --3--

               老爸拖磨為啥物、破病無錢度餘年

           後生勤勞鬥叁拑、寒冬一別爸囝離

    有一工,伊猶照常來阮兜向我借一本古冊,看點外鐘久,伊對我講,冊暫時留蹛伊身軀邊,等待看完時陣tsiah還我,現此時伊愛去壯圍彼爿方面載一位查某人佮一个囡仔,講了後伊將彼本古冊囥入去三輪車後座內底,著趕緊踏三輪車前往去壯圍接人客。當初欲出門e時,天色並無真好,我對伊講,天氣遮爾無穩定,莫去好嘸?伊煞回答我一句話,講這是佇兩工前伊ka in載去e人客,已經答應人客今仔日一定愛閣去載倒轉來頭城tsiah閣搬換火車轉去瑞芳,伊堅持欲去載。自伊出去半點鐘以後,天色著漸漸惡化,烏雲密佈,過無外久變作風雨交加,風颱一陣一陣形成,雨愈落愈大,天氣一時變化kah相當驚人,尤其佇野外無厝e所在,風雨愈強,大約佇下晡三點左右,正利載著人客來到荒郊野外e三抱竹仔地帶,有一座木造橋e橋頭,彼座橋無橋欄,當伊欲駛過e時,風颱當強,橋板滑溜,伊為著欲趕車受人客e要求,愛趕火車班e時間,無可奈何煞來硬闖鬼門關,無去想著生命e危險,結果自身難保無法抵擋強風,連車帶人客三个人全部予風吹落去竹安河溝底,風颱當強,過路e人較少,河底濁水滾絞,一時無人通救,三命全部嗚呼哀哉沉落河底,佇橋頭遠遠e另外一爿所在有一位過路人看見佇濛霧中親像茫茫有一堆黑黑e烏影物件,予風勢吹落去河底,彼e人著趕緊走轉來頭城街仔路通知予人知影,講有看著一台簡若三輪車吹落去竹安河內底,若有人知影ine家屬著愛緊速會當鬥跤手去救人。當彼時正利e二兄聽著消息,伊推算可能是伊小弟e款,過無外久,招一寡人趕去現場探測,果然看了後認為無錯,橋頂有車輪痕跡,毋擱,水濁強勢無法度救人,等到暗頭仔,六、七點時分,看in小弟無轉來,隨後閣再趕緊央人去探望河溝彼方面e狀況,可惜猶是河水真大,只有望天嘆氣,等候另日水退tsiah來收屍著想。過了第三工風停雨靜,河水消退,閣再央真濟人去外港口揣屍體,大約佇中晝二點外鐘,tsiah揣著三具屍體,當in大姊趕到竹安海邊認屍時,姊弟親情已經無法挽回,留落一場陰陽兩隔悲慘局面,小弟屍體倒佇海沙埔面容變白七孔流血,只有悲傷鬰悶在心內含淚依依用手埒in小弟目睭,含目長暝祈禱伊安靜歸往西方極樂世界,真真是神仙難救苦命囝。出山彼一工,學校師生來到喪家拈香時陣,同聲哀哮淚下,傷心痛失一位優秀人才,婉惜伊e為人良好閣肯上進,是學校楷模e好學生,伊e老爸李江波老大人,長嘆爸囝無緣一別永生,從此一生埋怨家己歹命底,恨命莫怨天,只有獨守寒舍度苦日子過終生。

 

 

                                             寫作  于宜蘭 冬山

                                                   

三月 09, 2011, 08:43

草嶺古道秘史 / 李 啟 明 /

Posted by 莊文龍 | 迴響 (0) | 引用 (0) | 閱讀 (590) | 李啟明老師散文 | 推文 (0)

 草嶺古道秘史          / /

 

    草嶺古道佇古早時代是一个ui宜蘭通往基隆、台北方面的唯一道路,依據文獻記載內底當初開發時,是ui清朝時代開始,衙門官府特別派一位重要總兵來噶瑪蘭這方面探視地域人文,這位官員伊是姓劉名明燈,劉官員伊e人品超群、學問高深,人人尊稱伊是一位好官,文筆也寫了真好,筆筆活潑生花、句句精粹流暢,比如講,過去伊所經過開闢e道路上,攏有留落伊e遺跡存在,做為標誌記載,親像一首真雄偉e詩:「雄鎮蠻煙」摩碣佮一塊威嚴的:「虎」字碑,就是伊e筆跡佮詩句,字句生動,予後代e人敬仰惜愛,認定是欽佩難得,文學界個個攏呵咾好文筆,後來這條「草嶺古道」變成唯一通外道路,尤其是過去有一寡仔文學者早期想欲上京赴考,攏是行ui這條路做為交通要道,到了基隆(雞籠)才閣坐船去對岸福州,順路草再往北進京城去考試,因為路途遙遠,一路千萬里程,所以過去佇民間有流傳一句予人感覺真傷心e話:「人若往北行、一旦過草嶺、心頭著掠定、無法想某囝」,這句真言實話,引起扣人心肝穎(inn)仔,真予人滿腹心酸,目屎如珠掰(pue)袂離。

    根據以往彼首「雄鎮蠻煙」摩碣詩句記載,就會當來印證過去事實曾經有名人經由此地做為通路,依照前人也有口述流傳,當初此地

                           1

是無人所到e所在,蠻荒野地,雜草叢生,一四界攏有覕藏毒蛇野獸,土匪到處流竄(tshuan),掠人放火,若欲經過此地非常驚險,人人難以抵擋,防不勝防,尤其是地理環境關係所致,深山溝內、峽谷難行、風雨交加、陰氣寒冷,所以劉官員有帶領一寡仔民兵,當時欲開闢這條路時,困難重重、寸步難行,夜間職守山內兜底驚惶萬分,聽講時常有溪谷陰風、霧氣生冷,四處邪氣沉沉,怪聲嚎響,暗時官兵難以入眠,因故劉官員才想出一个辦法來,將蹛溪谷內底,揣一粒大塊石鼓留落筆跡題詩,寫出著「雄鎮蠻煙」摩碣四字雄偉草書雕刻在此,做為日後辟邪作用,並且有一項是鎮壓邪魔穩定軍心e效率。

    最後山頂道路開闢將近欲完成矣,來到出口e所在,也就是倚佇東海岸大里簡所在(現此時天公廟後山頂),面臨太平洋海邊這方面,因為座標位置,面向東北角海風特別強,風吹山谷溪溝陰冷驚人,一陣一陣寒風殺殺,陰冷刺骨,沿途雜草叢生,陰暗遮天,予人感覺著出口e所在步步驚魂,當時劉官員伊有觀測地理風水e技能,順用著詩筆e手法,寫出一字鎮邪的草字「虎」來雕刻石碑,做為鎮邪收風作用,到現此時猶原立碑佇溪谷之間,雖然看起來是一字真奇怪e「虎」,毋過予後代e人有一種真神秘e推測,這條草嶺古道後來慢慢仔變成一位真莊嚴e聖地,令人敬仰疼惜,永存民間萬世流傳。

                                              宜蘭縣   冬山    寫作

三月 09, 2011, 08:42

冬 山 河 畔 /李 啟 明 /

Posted by 莊文龍 | 迴響 (0) | 引用 (0) | 閱讀 (540) | 李啟明老師散文 | 推文 (0)

         /李 啟 明 /

冬山河畔黃昏時    風搖樹枝帶詩意

 

岸頂小路風微微    若像仙境溫情味

心情輕鬆無塊比    雙人相牽唸歌詩

水鴨泅來閣泅去    雙雙對對永不離

    童玩節又閣開始復辦矣,這个場所是設佇冬山河畔下游e親水公園內,有耍水設施佮各種e活動項目,會通講攏真齊全,予人客耍kah會發狂去,伊e功能是欲帶動整個宜蘭縣e商機,予各行各業發展經濟佮民眾身體健康為目的,所以佇  陳定南縣長執政時代,伊已經著有規劃,做一个觀光景點,會通來配合著冬山 河畔美麗風貌,清幽e景色,通講是相輔相成,真正理想e結合,尤其是這个冬山河兩岸,攏有種植著樹木、花草,予這條河增加了袂少e色彩,岸頂嘛通供應遊客做休閒運動e路線,最近這幾年來也有提供了自轉車仔予遊客做環河旅遊,欣賞著河畔e風光,享受大自然e清幽空氣,到了黃昏時,岸頂小路風微微仔吹,散步佇駁岸頂,望對遠遠仔雲 霧交流e懸低山景,好親 像佇遊仙境仝一款,心情輕鬆無塊比,若看著河面e水鴨仔雙雙對對泅來泅去,袂輸恩愛翁仔某一對一對佇遐互相疼惜,予人感覺有一種溫情味e存在,永遠難忘e情景,感動佇人e心肝內。

                            (1)

             冬山河畔草青青   花蕊清芳送人意

             龍船鼓聲擾亂耳   清亮管弦響四邊

             坐蹛駁頂望海墘   情人相伴倆相依

             涼風吹過阮身邊   滿面春風心綿綿

    一路來冬山河畔攏鋪滿著青翠翠e草仔埔,兩岸互相照應,河水平波盪漾,慢慢仔流出海口,佇河中有時仔也會跳出幾尾仔好耍活寶e魚仔,予遊客看kah笑瞇瞇真心適,坐蹛船仔底e人,想欲伸手簡那強強欲去ka伊揈起來船頂仝一款,趣味kah全船e人攏笑kah嘎嘎叫,大船小船來來去去,交插無歇睏,鬧熱滾滾,有當時仔也有幾仔隻帆布 船仔,佇遐穿來穿去,彼个畫面加了袂少e光彩kah活力,予這个冬山河規个攏活潑起來。佇進前五月中旬e肉粽節時,嘛每年佇這个所在攏有舉辦過宜蘭縣龍船競渡比賽,氣氛也非常鬧 熱,佇兩岸中間人潮爆滿,岸邊草埔觀眾坐kah密tsioh-tsioh,呼 咻喝喊、鼓掌如雷,拍手博仔拍kah袂煞,龍船頂e扒船兄弟姊妹,予in加 了一隊一隊佇比賽e心力旺盛,氣色充滿十足,將扒龍船佇這个河面為著勝敗,吵kah鬧熱tsih-tsha,鑼鼓管弦哢kah pin-piang叫,帶來五日節完滿e結束,男女老幼,挨挨陣陣 看kah毋知通煞,少年人順著這个機會,手牽手蹛駁岸頂散步行到海墘,沿路唱歌訥 曲,風微微來、微微去歡喜叮噹。

                           (2)

冬山河畔風情味   引 阮難忘懷念伊

河面船影穿不離   大 船小船互相辭

森林公園透海墘   傳 藝中心到橋邊

一路美麗好景緻   永 遠記憶思念汝

    冬山河ui山頂開始分做上、中、下三段式e觀 光位置設施,上游是瀑布區,有一位所在號做「舊寮瀑布」,另外一位號做「新寮瀑布」,每一位瀑布各有特色,山間溪水湍流不斷,柴樹仔也非常旺盛,地氣也比 較kah涼爽,熱天欲歇涼是相當適合e好所在,也通耍 水、也通開講納涼,微風清涼、鳥音繞耳、寂靜清幽、心靈安定,予人有一種無煩無惱e感覺。閣落來是中游e所 在,伊設有一位森林公園,內底山崙仔種有真濟種樹仔,特色是樹林e景觀,樹林跤也會通做自轉車仔環河過境e運 動連接山坡地路線,坐過下坡穿過鐵枝路跤,通過了磅空閣踏車過鐵橋,直接通仔到另外一爿駁岸頂,欣賞著冬山河畔e景色,遠遠仔 有一座紅色e鐵橋,遐就是下游e所在,軁過鐵橋跤磅空了後,就是對岸e「親 水公園」,閣再去坐過公園對岸,直線真緊就到「國立傳統藝術中心」,彼時將自轉車仔騎蹛橋頂,目睭望對倒爿去,就有停一隻太陽能遊艇佇遐等候人客上船,是 欲前往「親水公園」彼爿,也若望過正爿e時陣,就有看見細隻e遊艇停佇港內等候遊客

                           (3)

上船,對面岸頂e所在有一座古香古 色e貴族庭園,內面有擺設著古早庄跤農業器具佮貴族e家庭用品,真有古早氣值得回味,了後閣行出外 口,四周圍就有種一寡仔桂竹仔,主要是欲做備患風颱防遮e作用,並且嘛有增加厝外e美景,閣過庭外 出去就是一大片e商店老街,有廟宇、戲台、雜貨仔店、布袋戲尪仔店、蜜餞店、舊冊店、食店,各式各樣攏有,嘛有路邊攤仔佇賣四 秀仔,喝玲瓏賣雜細,予人看kah喙笑目笑、心神清爽,戲台搬戲嘛予人看kah袂記得想欲轉去,真正是好戲留人客。

    紲落一四界若遊煞,閣去坐蹛遊艇內底,慢慢仔予船伕ka咱 載出去港澳外口彼陣,沿途著會通看冬山河畔e景緻,青翠草埔、明亮海口、五彩雲朵、龜山晚霞,彼種難得e美 景,簡那親像一幅真媠e山水圖仝一款,予人欣羨,予人愛慕,定定留佇頭殼內底,永永遠遠懷念伊,這條河是活河「冬山河畔、美景 十足」,是難忘e所在。

 

寫于  宜 蘭  冬山

 

深夜寫作

三月 09, 2011, 08:42

噶瑪蘭e古厝 / 李啟明 /

Posted by 莊文龍 | 迴響 (0) | 引用 (0) | 閱讀 (580) | 李啟明老師散文 | 推文 (0)

噶瑪蘭e古厝         / 李啟明 /

 

     早前若提起噶瑪蘭(蛤仔難)這个族群e名稱,普遍性人人攏會毋捌伊是啥族群,感覺khah青疏一點仔,遮a難免莫怪囉!疑問就是出佇這个族群已經將欲消失去e最大原因,過去in徛跤e所在攏是疏散佇沿海一帶,khah下尾仔庄跤偏僻e地方,難免無人會去注意著,知影這个tsioh數民族e部落,點點滴滴e代誌,真可惜,假使仔若去予伊無去彼就真無彩囉,毋過咱出世佇後一代e人應該加減愛來ka伊了解一个a tsiah著,因為這个族群過去有展現著優秀e做人風範kah生活起居e過程,所以利用這个文藝園地內底來ka in表達一下仔。

     根據古早清朝時代文獻內底所記載e事蹟,這个族群部落原本有形成到36社矣,路尾仔因為這个所在khah下窟,水氾較長難以種作,落尾tsiah慢慢仔遷徙出去,有个遷移去他鄉外里,閣再開墾新e天地,親像現此時佇花蓮長濱e所在,ia有噶瑪蘭e族群,本誠原底in攏是蹛佇蘭陽平原沿海一帶,因長年來受著海風吹襲,佇海岸地區堆積成一道一道平行e海岸沙埔仔,又閣因為冬山河流域定定受著風颱水患災害氾濫,遮个沙埔仔就成做最初聚落發源e所在,四周圍的園埔有真濟通來耕作,討生活ia真方便,了後變成冬山khah下爿勢是平埔族噶瑪蘭人聚落e好地方,這个族群將按呢決定做為長久e定居,蹛落來蘭陽冬山地帶,in e生活ia全部倚靠著務農kah討海掠魚維生過來日子,有閒e時隨人tsiah出去外頭山作穡趁錢加減補貼厝內e費用,民族性真溫柔勤勞,心地真善良,無愛計較東計較西,逐項代誌攏為人設想做代先,敦親睦鄰、互相扶助為原則,外口人真愛倩in來作穡頭,inka人做到真順序閣好勢溜溜,一切生活攏真樸素,自力更生,有啥物物件生產就食啥,物資嘛毋免去外地乞求他人救助,36社每一地頭e衣、食、住、行攏是靠家己氣力來經營,毋管是舖橋造路,砌造茅仔厝,開設水溝,庄內公共設施e項項物件ia是就地取材來裁用,雖然無講真媠、真勇壯,毋過嘛是比較有較好,佇外頭受著風吹雨淋有khah贏淡薄仔,所以久年以來變成有一種民族性e建築風格,親像講in e茅仔厝e厝形所用物件,到現此時看著嘛敢若真有特色,伊e造型下面攏有生柱仔來格跤,厝tsiah砌佇頂懸,厝頂面砌尖峰e形体,聽講khah會瀉水,根據文獻記載咧講,因為宜蘭khah厚雨水e所在,一旦若做風颱起勢,khah下窟e一四界攏會淹水,規个變成水鄉澤國,下爿面ia無法度出入,只有靠著鴨母船仔抑是竹棑仔來做出外代步交通e工具,毋才,厝攏砌佇懸崙仔e地上,有無嘛比較khah安全,目前佇冬山河e岸邊距離四、五百公尺e浮崙仔樹林內底,是台灣僅存e一个噶瑪蘭舊社『流流社』類型遺址,年代是距今約600200Bp 文化遺址,曾經有出土完整e陶罐、陶瓶等器物,並有煉鐵遺跡。居民散居佇平原中央及沿海地區一帶,以漁獵、游耕維生,清代文獻中記載有36社,到今祇賰佇冬山河下游e(加禮宛社)kah(流流社)兩个聚落nia- nia,而今約有30 e人具有平埔族血統,所以這个所在猶是

                                1

 

值得咱來留念。

    噶瑪蘭人聚落攏是佇沙埔仔頂懸,房舍以木樁架懸,厝身用竹木撐起,厝頂崁著茅仔草,規个聚落隱藏佇樹林之間,in e人精神攏象徵著大葉山欖(kasu),大葉山欖原為噶瑪蘭族嗜食e果樹,通常種植佇村社抑是蹛厝e附近,因樹欉懸大,種類特殊,容易形成醒目e地標,具有社樹雄風e功能,這種社樹功能至今漸漸因為噶瑪蘭族勢力e削弱而且消失或是隱晦去,毋過卻是漸漸佇流流社kah南遷e噶瑪蘭族後裔中間,成做本族精神象徵也是特別e記號,意指著凡是有栽種大葉山欖e所在,就是噶瑪蘭族所蹛e地方。

    事過如今已經有幾百年e歷史,雖然賰落來e舊址,遺產留予咱後代人做為古蹟觀光通來堪察,ia算袂baih,現時文建會將冬山河ia整頓到完成矣,兩岸有親水公園kah國立傳統藝術中心e設立,對in『流流社』kah『加禮宛社』兩社有相當e意義,予各地來e遊客加一點仔khah有價值觀光e所在,通a考古遺跡e參觀kah懷舊e体驗。當時佇宜蘭童玩節期間,遊客千千萬萬一直踴躍來到這个所在,順紲通探視古蹟,人數ia不計其數,挨挨陣陣出入該地周圍踏ka強欲袂發草,一時兩社增添袂少e光彩,冬山河兩岸發出了功能,這馬ia變成健康運動e場所,跤踏車來來往往真濟,每逢假日外地人來遮tsit- tho嘛袂tsioh,佇在地生活e噶瑪蘭人已經攏kah漢民族同化去矣,無論啥物人kah in講話攏會通,因為in大部份攏講閩南語(台灣話),久年來種族kah外來種族相配混合,ia漸漸變成宜蘭人為一家,所以這个地方是噶瑪蘭e發源地,各項物件攏真奇巧看著真心適,值得現代人來ka伊行行一个懷念e古厝,看in過去生活e所在。

 

 

 

                                                        佇宜蘭縣冬山

 

                                                                                    夜暗寫作    

三月 09, 2011, 08:41

-- 深秋夜歸人 -- / 李啟明 /

Posted by 莊文龍 | 迴響 (0) | 引用 (0) | 閱讀 (772) | 李啟明老師散文 | 推文 (0)

-- 深秋夜歸人 --    / 李啟明 /

        深夜沉沉、秋風微微、陣陣霜雨、逶天降落

        暗淡月色、青冷街路、三輪車夫、忍勞歸舍

        陣陣e霜雨,逶天頂降落 ,掃過了街路,暗淡e月色 ,青冷黑暗暝 加添袂tsio e寒意,規條路兩爿e店頭,早tioh紛紛收市矣,ti遠遠e所在來了一台三輪車,一步一步接近ua--來,啊 ! 原來伊是平埔仔兄踏tioh三輪車beh轉來厝--e歇睏。伊e身影闌闌珊珊,親像失去喟力hit款模樣,跤步tau- tau- a tau- tau- a踏,將hittue三輪車駛向前行,行過龜樹叔仔e塗籠間hit爿去,彎一斡,踅一輪tiohinain兜厝角頭有搭一間細細e幔坪仔,伊e三輪車tioh駛入去hit 个所在囥。忽然間,有一位年紀大約是八十歲左右e老大人逶厝內行出來,叫一聲,「平埔仔你na會遮呢暗tsiah轉來?」伊越頭趕緊應一聲「阿母啊,你naiau未去睏,hoo你等規暝,真失禮哦,我to是今仔日有khah好生理,人客khah濟,因為有一位顧客, to坐尾班e火車轉來到頭城,紲落伊愛behka伊載轉外澳a,為tioh beh加減趁一寡錢,姑不二將ka伊載轉去in兜,所以我才會轉來khah暗,阿母啊!以後na有這款情形,你tioh先去睏,mai koh等我好bo ? 因為平埔仔兄是有孝心e查甫囝,苦求in老母,in老母煞無答應伊,反倒轉來ka in囝講「戇囝e,你攏m知阿母e心情,逐日你na siunn暗轉來,我tioh目睭目聶目聶看,m敢去睏akoh講哪睏會去呢 ? 平埔仔兄順喙ka in老母應一聲「tannto轉來a,你好thang入去睏囉,我先洗一個身軀to beh來睏,你mai koh等。」,綴後平埔仔兄趕緊入去灶跤洗身軀,當伊身軀洗好a beh入去睏hit時,聽tioh inpe ti後壁眠床內底khuh khuh嗽,聽起聲音kan- na真喘e款,伊聽tioh真艱苦,開喙問inpe「阿爸啊!今仔日天氣有khaha,眠床底我來ka你趨一領khahe棉績被好bo ? na無你會kuann tioh tioh m a。」因為inpe年紀老邁a有八十八歲,身體有致病,袂kham ti受風kuann平埔仔兄是有孝囝,min pe tih hookhuh khuh嗽,隨手tioh走去頂懸格仔夯一領棉績被落來,ka伊趨好勢,順紲請in pe趕緊睏, ia去吊ti壁頂e寄冬袋仔內拈一包嗽藥仔hoo伊食,ia tioh按呢hit暗仔,到深更兩點半左右逐家tsiah倒落眠床去安眠o       

               秋風吹起冷佮寒         青冷凍入阮心肝

             夜鶯啼叫吼無伴         霜雨降落無人看

--1--

           路燈稀微望月寒         跤步沉重欲按怎

         月色暗淡足無伴         孤星伴月傷心肝

    秋天氣候寒冷,霜雪風仔時常teh吹,ti宜蘭地區東北爿e頭城,霜風ia特別khah強,因為ti九彎十八斡e金面山隔壁有一座紗帽山,依據前人傳說:冷風若降落有可能逶西方hit爿掃過來,所以頭城方面比較khah濟西風,西風一旦落來,滿城霜風tioh冷吱吱,街頭冷清清,人車真稀微,尤其是店頭部份偆無kuiteh開店,街頭巷尾ia比較khah暗淡,平埔仔兄伊tioh是每工踏三輪車日出夜歸去載人客趁錢度生活,ti這款歹環境中求生存一年thang天攏是按呢,伊接客親切待人和善,家庭雖然有khah散赤淡薄仔,m- kohe-tang忍受,若到下冬天仔總是ti寒風受苦中間載客維生,有一工伊接tioh一位人客beh去金面里,金面 hia e庄頭是靠ua ti khah山邊,一路若想beh逶山e方面行,tioh愛付出真大e喟力,peh山相當出力,時間ia khah久,所以伊無愛行這條山路,另外選擇逶平路行,m koh平路須要行對頂埔kap金面中間有一條通過墓仔埔e地帶,hit帶位仔有khah淒涼陰冷,尤其是更深夜靜,三輪車踏過hite路程,真真是進入人間地獄烏暗城市。平埔仔兄為tioh beh趁人e錢,只好答應人客要求,拚生拚死ma愛拚過即段難關,咬牢喙齒根拚命ka人客載到目的地,轉來e時,聽伊講是逶山邊hit條路程落嶺khah順,ma khah輕踏,koh m免經過墓仔埔,

擔心teh驚惶!hit暝平埔仔兄轉來到厝已經是半暝三更,in老母猶原iati厝內等伊,老大人本性疼囝e心永遠袂變,真是難能可貴,莫怪,in e厝邊隔壁、親晟朋友攏尊稱in老母是大善人,模範母親e典範,有時tsun- a對隔壁細漢囡仔照顧na孫,親像家己e孫仔koh khah疼,人有teh講,可能性in老母有hit種慈愛e心腸,天公伯仔有tehtsiah會保護in囝身體健康,日日受風受雨,受苦耐kuann平安過日子,古早人講:「種福竹、出好筍」台語有這句美妙e諺語,自早到tann tsann做真實e應驗「做好公德、會得恩果」,平埔仔兄可能性ti這款母愛e環境內生長,無形中賜hoo伊無限e求生毅力,一生中真han- ti發生大病kap其他災難,身體ia tsi- a粗勇。中晝時仔真han- ti睏中晝,有閒etioh走去溪仔墘掠毛蟹kap鰻仔,掠轉來厝內加菜,加減補貼菜食營養,伊會thang- a講是一位標準e孝子,in petiann- tiann ti喙口講:「阮平埔仔是一個歹命囝」,m koh ti in邊仔看e人,攏是認為in兜真安靜,求平安tioh是福,真溫愛e家庭,hoo阮厝邊周圍ethang做一面明鏡袂bai e模樣,永遠留ti眾人e心目中。      

            霜雨掃落心稀微         秋風摧阮葉離枝

          風雲變色無定時         月夜暗淡帶愁眉

-- 2 --                                             

                  楓葉落水漂流去         秋色詩意失了味

          人生親像一齣戲         夢碎今生斷腸詩

    年久月深,歲月不留人,平埔仔兄in pe母年老身體欠安時常破病,經過一段時間ia攏過身去矣!伊e年紀已經進入五六十歲,身體漸漸khah退化,看伊每工teh踏三輪車e情形ia khah無喟hainn,跤踏仔iakhah慢散。有一工伊接tioh一對老翁仔某beh去遠途「三抱竹仔」e所在,一tsua路來去愛踏四五點鐘久,hit工比較khah冷,秋天霜風微微,尤其是ti郊外,路程愛經過竹安舊橋,靠近海邊,河口海風ia特別強,三輪車行過橋頂tiohkhah小心一點仔,橋邊koh無護欄thang檔,需要小心預防萬一強風來襲忽然hoo sak落橋跤,平埔仔兄伊是老經驗者,n若過這條橋伊攏相當小心,聽講hit兩个翁仔某ka伊訶咾kah會觸舌,踏到庄跤有一蔟大竹圍,內底是一座古厝,hit兩个翁仔某請伊入去坐,順紲泡一鈷茶來請伊,了後平埔仔兄伊tsiah知影,原來in是蹛ti遮,平埔仔兄kap in坐一睏仔,隨時愛離開in厝,in某逶灶跤摜一寡吳郭魚出來送伊做伴手,老伯仔in後壁溝有一窟魚池,飼一寡魚仔平常時攏有teh掠吳郭魚起來加菜,所以真方便,老伯講,請平埔仔兄伊免客氣,順紲包一大包魚仔hoo伊帶轉來,平埔仔兄到厝已經是日落黃昏時,伊將吳郭魚pun hoo厝邊隔壁,家己留kui尾仔起來,摜入厝內趕緊伊tioh隨手ka魚仔thai thai好勢,順紲挲鹽,等候明仔再thang好煎出來加菜,處理好了後伊tioh去食暗飯,過一點鐘九sio-khua-a歇睏一下伊tioh koh穿一領khahe棉裘仔,koh繼續出去踏三輪仔車趁錢,伊踏到火車頭等車班hit時,忽然間有人拍電話來叫伊去港口(烏石港koh khah過去淡薄仔)載一位婦仁人來頭城看病,hit暗去回費了三點外鐘e時間,到暗暝十二點外平埔仔兄tsiahtiohe身影逶遠遠ahit台三輪車tau- tau- a進入頭城市街,一步一步歸回伊溫暖e寒舍。一生中伊tioh是按呢度過艱苦辛勞平素待人e日子,令人感嘆伊e為人,使hoo社會人人藉為楷模。

 

 

 

                                    宜蘭縣冬山  夜寫作

 

                                    

三月 09, 2011, 08:40

母 淚 滴 滴 愛 / 李啟明 /

Posted by 莊文龍 | 迴響 (0) | 引用 (0) | 閱讀 (574) | 李啟明老師散文 | 推文 (0)

                / 李啟明 /

          慈母在世顧阮穿、為囝長大做犧牲

          無想家己兮性命、一生有緣萬世情

    日據時代大東亞戰爭彼時陣,阮嘛閣是囡仔nia nia,毋捌世事戇戇嘛毋知天仝地,單單知影顧耍全然無了解老母心,彼時天頂定定有飛行機puepue去,看大人傱出傱入,in是緊張kah欲死,喙口佇喝「較緊、較緊飛機來啊!」阮ia毋知半項予爸母牽入去防空壕底宓牢,叫阮毋通出聲,講是阿啄仔(美國)B-29飛行機真厲害,看著人會ka人掃射拍死,聽著予阮囡仔驚kahkiu去,攏毋敢哭毋敢哀,只有等待阿啄仔飛機pue走才敢出洞口喘一下悸,過無外久閣「陳水螺」(防空警報聲音),趕緊閣宓入去,有時陣宓幾若遍,驚去予飛機下炸彈爆炸著,逐家顧生命kah要緊,規條街仔路攏無人佇行徙,大多數e百姓早就逃e逃、走e走,日子並毋是遐爾仔好過,逐家攏是佇度時機,每工三頓飯總是過kah不接一(不接續)毋成食閣毋成睏,真正是悽慘落魄,這時若閣來想起早前e代誌,心肝頭就真艱難矣,毋閣無講出來,囥蹛心肝底煞愈艱苦。佇當初時五十年前,咱台灣是殖民地被日本統治e時期,庄跤e所在,百姓攏過著非常艱苦e生活,食kah不答不七e物件,日食總是糙米糜參蕃薯簽khah濟,人講號做「蕃薯簽糜」,逐家口仔生活真困難,食kah枵饑失頓,面肉帶黃酸,看起來每一个人生著毋成猴仔阿毋成猴,瘦枝落葉,烏焦瘦仔烏焦瘦,親像營養失調彼款模樣,予人感覺真恐怖,饑荒情形相當嚴重,破病人非常濟,戰亂時期醫藥匱乏,時機又閣無好,日子一工比一工歹度,彼當陣拄著非常時期,為欲顧家己全家大細平安順利袂出代誌,信佛e人真普遍,所以,阮老母逐工透早攏泡一鈷茶佇等候阮老爸起來e時,同齊點芳香敬神拜佛,祈求厝內大細漢身體平安。我會記哩,佇日本爭霸東南亞地區結束彼个時陣,有聽阮老母講起,我有一个大兄予日本仔調去海南島做軍伕,到現此時嘛閣無消無息。因為彼當時大東南亞戰爭非常激烈,海外一四界烽火連連,人心惶惶,每家有囝兒調去充軍e人,爸母攏是真擔心佇咧!想欲早日知影得著一寡海外新聞e消息,會通來安慰心情,尤其是彼陣仔,海外戰情封鎖非常嚴密,欲知影相當困難,因此消息難得著,掛念心情愈重。阮老母暝日思念著阮大兄e心情,每日心肝頭攏佇吊苦瓜,時常目屎佇做飯吞,想kah毋成食,毋成睏,實在予伊真操煩。伊為著欲愛知影囝兒佇海外做兵e消息,想盡辦法,傱東傱西一直探聽消息,總是無能為力,可惜厝內又閣散赤,ia袂當買一台拉而歐(收音機)來聽,姑不而將家己一个人仔,平常時攏行去對面厝,阮阿姑e店頭,(內面鹽缸頂懸有囥一台拉而歐)。伊若去時就請阮阿姑拍開來聽中晝時仔所報告e海外新聞,逐工攏聽真久才有轉來厝的,若看伊行路無元氣閣面色無清采仔無清采,阮著感覺會出來,伊今仔日一定無得著啥物消息,才會遐爾仔鬱卒

                                -- 1 --

咧?厝內e人看到伊這款情形,阮e心肝頭煞綴伊艱苦起來。日子總是一工一工直直過去,到了彼年e大東南亞戰爭結束,有一工e中晝時仔,突然間,阮大兄唯海外轉來,阮老母聽著伊大囝轉來矣,無顧著洗碗,手放落趕緊三步做兩步走,唯灶跤拚出來到大廳,伊目眶仔紅紅紅,歡頭喜面牽著阮大兄e手,久久仔攏毋甘放去,彼工e暗頓,阮老母心情特別清采,撰寡好菜趕緊煮一頓誠青臊e菜色予阮逐家歡喜一下仔,逐个食kah 笑瞇瞇,歡喜噹噹,順紲慶祝一番全家大團圓。

              望囝成年好團圓、逐个平安敖趁錢

          囝兒大漢愛成持、報答母恩鬥參拑khinn                  

    第二年e春天,經過社會善士推薦紹介我e大兄入去頭城農會食頭路,了後予阮家內經濟kah穩定一點仔,紲落我二兄由宜蘭高等科卒業,一時陣揣無頭路,袂當ka厝內鬥相共,一段期間經過朋友e紹介,才去台北e戲班團當會計,拄開始逐工攏嘛愛隨團出去南北奔波,車來車仔去,這項頭路並無外好,有人講:「行船走馬無三分命」真危險,尤其是這種戲團e性質,出門e時攏愛搬戲籠kah布景同齊疊車閣疊真懸,沿路搖搖擺擺,真使人驚惶失色性命真無保障,伊有閒若轉來厝內歇睏,攏毋敢講這款代誌予阮老母聽,落尾仔時間一下久,煞去予阮老母知影,了後著無啥愛予伊閣去,毋過當時無啥物好頭路倘揣,只好罔度時機過日,一直忍耐蹛心內。等到有一工,探聽著郵局閣無外久欲招考郵務人員,阮老母就趕緊通知阮二兄準備看冊應付這擺e考試,隔無外久伊就將彼个頭路辭掉轉來,參加郵務士考試。結果皇天不負苦心人,郵政總局發表錄取人員名單,公佈出來有伊e名佇內底,是第二名,過了一個月郵局就ka伊採用,編列入去頭城郵局辦理郵務空課,然後一路順利繼續一考再考,一直升等到高員級派去基隆做稽(khe)查員為止。

    隔轉年佇舊曆正月時仔,有一工透早拍殕光,阮大姊夫唯福成庄跤拚出來,佇阮兜門跤口雄雄狂狂拍門叫阮老母,阮一家人攏予伊吵精神起來,聽真假若真要緊e款,阮老爸先趕緊出去開門,一下看,伊e面色青筍筍,雄雄講甲袂出喙,阮老母才問伊是按怎,那會遮雄狂無講話,看彼e情形有可能大事不妙e款!伊e目睭仁紅吱吱,手倚蹛門邊疕疕掣,阮老母牽伊手叫伊慢慢仔講,伊才講出:「阿端仔(大姊e名)佇昨暝臨時腹肚痛,可能是起急性盲腸炎,哀叫無幾聲就恬去矣!」一時陣逐家攏憂愁去,阮老母煞暈倒,阮老爸趕緊ka伊扶起來掠痧根,順紲交代阮姊夫趕倒轉去料理後事kah要緊,到七點左右阮老母才醒過來,目睭一下拭金,隨時交代阮老爸趕去庄跤看阮大姊。結果無法度救矣,「人死總是不能復生」,就按呢ka阮姊夫交代辦理喪事,出山了結,做老母e人只有目屎含目墘,無語問蒼天,日思夜念、望女長嘆,恨命莫怨天而已。仝彼年e年尾,阮三兄伊利用學校畢業彼段時間,充實應付考試e課程,去參加鐵路局考試,伊真聰明,結果考牢第一名,第二年就隨時分配入去服務,伊唯最基層做起,翻過

                                 -- 2 --

第三年:鐵路局閣再舉辦升資考試,伊真認真看冊,想著家內散赤愛拍拚,才有法度幫助家計生活ka內面鬥參拑(khinn),不斷e努力做空課,結果受著頂司疼惜,安排khahe職務予伊做,亦真順利一直考試進升到站長e職位。當時嘛閣真少年,做代誌真有魄力,頂司攏呵咾伊是可取人才,同事真愛kah伊做朋友,事事項項攏真關心別人,因為有這點予阮老母比較khah放心,毋免去煩惱三囝e出路。紲落換阮四兄唯軍中退伍拄轉來,佇厝內一時陣無頭路,好佳哉阮二兄有一位朋友佇開大拍賣雜貨店,暫時性ka伊引去遐作穡,過了第二年e夏天,店e方面生理真好,愛ka客戶做一个服務,決定買一台鐵牛仔三輪車送貨,亦按呢倩阮四兄做司機,順紲加倩一个人來鬥跤手,逐工攏愛載貨出去遠路梗枋彼爿,當時梗枋方面路線全是石頭仔路無外平,坎坎坷坷鐵牛仔三輪車閣無好駛。有一工,車駛到一欉大榕(tshing)樹仔邊,想欲先閃予別台車過,無疑誤,彼段e路基傷軟,規台三輪車煞去予伊翩過,兩个人坐佇車頂攏跋落去,予車硩牢佇車跤,車頭有一箱燒滾水,潑對阮四兄e腹肚邊kah跤大腿去,ka伊下半身燙kah熟熟破皮去矣。好佳哉,就近有一寡好心人kah過路人看著,趕緊ka in兩人扶起來,查出地址報消息轉來予阮厝內面e人知影,阮老母一時聽一下心肝頭磅磅採,隨時叫阮老爸趕去店的探聽狀況。過無外久,阮四兄予別人用計程車載轉來送去病院治療,隨後我kah阮老母同齊趕去病院ka看,彼時阮老母看一下險險仔昏倒去。因為阮四兄伊e身軀下半身予滾水燙kah紅吱吱,有一部份破皮矣,連我嘛看kah會著驚,莫怪做老母e人,看囝兒按呢去予受傷著,伊會毋甘,袂輸佇割伊肉仝款,伊e目屎一點一點一直滴落來,滴kah予阮做序細e人毋知欲安怎勸伊才好,逐工伊攏是愛去病院照顧阮四兄半工以上,伊才會放心轉來厝,紲落才換阮去替顧。經過三個外月傷痕才漸漸治好一寡,隨後院方講通辦理出院,阮四兄才掣轉來厝內療養,隔轉年,伊身體慢慢仔才回復健康,做老母e心才看伊安靜落來。過一段時間,身體完全復原了後,才閣經朋友紹介,前往台北縣政府做臨時工,經考試才晉升正式員工,一直到退休。

              人講紲尾食無奶、兄弟相共鬥牽成

           母心付出伊一生、囝兒協助報恩情

    有一年e春天,經我三兄指引教導,叫我平時愛看冊充實家己智能訓練,等候有機會來時應付公家機關考試,因為我三兄真疼惜我,時常攏佇注意我e未來前途,我攏照起工聽伊c話看冊,拄好彼年鐵路局欲閣向外招考路員,彼時欲揣頭路仝款真困難,經我三兄紹介去參加鐵路局考試,好佳哉,榮幸予我得著錄取。可惜無外久,我接著做兵e通知單,不得已鐵路方面就暫時來保留牢,等候服完兵役轉來才閣做決定。佇做兵二年陸軍服役期間,真佳哉,分配入去第一軍團部工程組做文書e空課,時常受著長官e疼愛真順利佇遐蹛到退伍返鄉,彼段期間內,khah無去予序大人煩惱著,逐工攏嘛像佇上班仝款,寫一寡長官擬稿予我抄

                                 -- 3 --

e公文,有時陣阮部隊調我轉協助寫部內文稿e空課。其實阮指導員真愛我轉去kah伊開講,伊看我親像兄弟咧,三不五時仔借用機會載我轉參加in e加菜月餐或者其他康樂活動,每禮拜日歇睏就轉來走走一下看阮爸母,彼段期間ia就按呢真順利做完二年e兵期,做完兵轉來,早前考牢公家e頭路,鐵路局無隨時通予我入去上班,只好去台北方面私人公司揣頭路,暫時罔度日子,順紲家己趁錢閣再進修讀夜校高商部到畢業。因為職務過勞,有一工中晝時仔我唯外口踏自轉車仔欲轉來公司,佇半途上感覺真喙焦,想欲啉一杯滾水又閣無塊啉,拄好艋舺菜市仔邊擺幾落擔柑仔,我ku落去ka伊揀三粒,買過頭隨手扒兩粒食落去止喙焦,偆一粒留蹛褲袋內,延路趕轉來公司。我到公司門跤口e時,頭殼感覺暈暈一直想欲吐,趕緊ku蹛水溝仔邊,ka腹肚內e物件吐吐出來,哇呀!這馬就害矣,吐出來e並毋是水果e雜物,那會是一塊一塊烏血角e物件,我驚一下,今慘仔趕緊足百起來,想欲行入去公司內底歇睏一下仔,無疑悟,彼時我規身軀煞接載袂牢,行到亭仔跤就去予伊倒落去仔,我人毋知了了。經過第二工透早醒來e時,我人已經是睏佇台大醫院e病床頂。越過頭時,看著阮老母e手提著一條綿巾仔一直佇ka我拭面,伊e目睭眶仔紅紅,帶著一寡仔目屎,喙內毋知佇唸啥物話,聽起來假若佇唸神佛保庇e聲仝款。彼時,我知影伊e心肝頭一定真艱苦,本晟是想著我做查甫囝e勇氣,男人珠淚不輕彈,這時我嘛忍袂牢煞哭出來,佇暗中向阮老母說一聲「失禮了」,那會用得予老母來傷心呢?佇彼時陣我ka伊講:「阿母,我e身體這馬有醫生佇看顧,醫療費用阮頭家可能會ka咱付,汝免閣煩惱了,感謝!予汝唯遐呢遠來顧我。」阮老母聽我講了後煞講:「戇囡仔,我若無來看汝敢會放心咧?汝e身體遮呢仔虛弱佇咧,若閣過一段仔時間有khahe時陣,想欲tsha你轉來厝的療養,以後e代誌才閣以後拍算。」真正過無外久,我就予tsha轉來厝內休養一站仔。第二年e春天,為著欲報答頭家看顧e恩情,我準備一寡衫仔穿e行李再度前往台北去阮頭家e公司作穡,過三年了後有一个秋天頭仔,我接著一張批是阮厝e人寫來予我,講叫我佇八月中旬愛趕轉去宜蘭鐵路局運務段報到,若無者,錯過這擺e機會無閣再有的,你著慎重來考慮才好,一時陣,想著真為難,雙跤踏雙船、心頭亂紛紛,毋知欲按怎來做決定khah會好勢?若是閣留蹛台北繼續食頭路是比較khah有出路,假使仔轉去故鄉食公家頭路,著愛忍耐一站仔艱苦e適應生活,毋過若比較起來,欲照顧爸母khah會著,khah溫暖淡薄仔,想閣再想,最後e日子總是來臨矣,我就決心ka頭家請辭,轉來故鄉報名,隨後入去鐵路局食頭路。

           老母在世晟咱大、人生慈愛留一寡

           模樣做予序細看、親像演戲彼一般

    鐵路局宜蘭運務段當初分配我佇福隆站,,逐工攏當日班,每暗七點才會通轉到厝,阮老母自從我轉來食公家頭路以後,逐工總是等我到厝e時,才會放心

                                 -- 4 --

同齊去食暗頓。有一暗,因為我ka別位同事替做khah暗一下仔,到厝的已經是十一點外鐘仔,佇規路暗唆唆e街仔路頂,只有遠遠仔看著一道電火光影佇等我,我三步做二步走,趕轉到厝的,看著阮老母猶閣佇遐坐等候,我規个心頭攏酸起來,望著伊e頭毛一頂白色色,老大人猶閣遐爾有精神佇等囝兒轉來厝的,我感覺親情可貴啊!尤其是佇下冬天仔,霜風冷冷、夜色沉沉,留著彼道柑仔黃色e燈光,予我感受著母愛e甜蜜kah溫暖,我講:「阿母你na會毋khah早去睏,等到這个時陣呢?」伊反講:「阮睏袂去,順紲留電火光予khahe過路人倘行路khah好勢,反正你亦袂轉來到厝的,做一寡公德嘛真好。」聽了這句話,予我深深e領悟著序大人e人生哲理。隨然我e老母伊是做人養女仔,khah無機會通去接受著正統e漢學仔教育,毋過伊是一位逐家尊重kah敬愛e老大人。平常時攏有督責阮兄弟姊妹,做人e道理kah出入社會應該按怎來kah人鬥陣,謙虛待人,禮貌恭敬e訓言。予阮踮蹛社會上kah人鬥陣攏受著真大e好評kah回應,這亦是上好報答伊序大人e禮物,予伊有一絲絲e精神補償,表彰回報伊做老母佇一世人當中所付出心血e代價,並無了時。

    如今,人海茫茫、世事蒼蒼,伊e一生亦過去矣,做人e囝兒佇世間上只有懷念e心,知影伊佇這个過程當中,伊是一个三從四德e查某人,相夫教子盡心盡力,度過一段慢長真艱難e日子,忍受著風霜勞苦e慈母角色,生阮這陣囝兒來這个世間負責晟阮大漢e任務,現此時只有留落阮kah厝邊頭尾大大細細難忘e回憶,偆著永永遠遠袂當放袂記伊予阮偉大e母愛親情。

 

 

                             李 啟 明   寫 作

 

                        2008年3月12  于宜蘭 冬山

 

三月 09, 2011, 08:40

蘭博館e誕生 / 李 啟 明 /

Posted by 莊文龍 | 迴響 (0) | 引用 (0) | 閱讀 (611) | 李啟明老師散文 | 推文 (0)

 蘭博館e誕生          / /

 

    一座相當雄偉輝煌e蘭陽博物館,今年已經佇宜蘭縣頭城鎮e外圍「烏石港」邊誕生a,這座有藝術感e五、六棧樓建築物,佇遠遠仔看起來,予人感覺有真奇怪e形體,宛然袂輸佇前幾年,有經過921大地動災害受損,規座樓仔siang3落去一窟水蓮花池底,佇遐半浮半沉,予遊客形容ka真趣味,其實,代誌並毋是按呢生,伊e造型完全是一座真媠e博物館,有前瞻性,外觀是經過一位相當有名e建築師,精心設計規劃e傑作,因為伊模仿著佇附近沿海岸邊,攏有奇形岩石生做一層一層斜出海口e模形,設計師將按呢造形模式,借樣移來到烏石港做一種藝術e構想建築物,真自然e排囥蹛水蓮花池邊,配合著池中數粒烏石e景緻,算起來是十全十美,有達到成功e藝術建築境界,予遊客看ka會觸舌,歡喜ka記牢佇頭壳底,念念不忘。

    蘭陽博物館是縣府上注重e地標,因為伊是ui濱海線外來入門e要衝,第一站e指標,ia會通代表著宜蘭縣農漁業e出產地,館內底設計完全是符合著古今時代,農村佮漁村e生活,原始由來、人文環境,親像佇庄跤有真濟戶養鴨人家,到播稻時,收冬了後,趕鴨落田抾粟青仔,通節省飼料,鴨仔陣所排瀉e屎尿,予田底增加了有機e肥料作用,翻種時,有肥份存在蹛田塗內底,彼種作穡e過程,攏全部展現佇館內排設。尤其是漁業部分,有魚船出海掠魚e情形,作業形式、鏢魚形態,攏有做模型出來予人看,遊客攏看ka如癡如醉,無想欲離開轉去e款。另外,有一樓是專門佈置深山林內,森林區e樹種,自然生態,親像佇太平山e原始樹木,有松羅、楠仔、樟仔樹、山毛櫸、九芎仔等等,猶閣有真濟講袂tsiaue樹仔種,攏一一佈置佇各位角落,嘛有小型e生態裝玻璃櫥內,有各種水蛙,十花五色e細尾魚仔佇溪溝仔內底生活,抑有野生e動物仔,親像有果子猫(ba5)、山猐(kionn)仔、猴山仔、鯪鲤(la5-li2)、山豬等等,講不盡e奇形怪狀e動物標本,欲講起來,看ka猶有真濟,記袂tsiau牢佇頭壳底,予li2想嘛想袂tsiau出來。

    人文方面相當e濟,有圖字e解說,親像古早佇蘭陽地區是按怎開墾來eui頭城e烏石港講起,伊這个所在本晟是有港底,港口通對外通商e一條好港路,因為佇早前e甲子年代有一擺發生天災地變,做風颱所引起e水災,將山頂e規座山塗石lu落來,溪水kong-kong流,ui山坑門衝落來,流落平洋了後,規个港底煞去予伊屯滿沙石,港路ia煞變無去,一寡仔時常有佇遮出入通商e船隻,ia就按呢煞變成無港喙通進入,了後經過久年e消沉,這个所在煞變做無人所到,真稀微。雖然「港口」有一个地名,卻是無親像早前有港口之實,予後代e宜蘭人tiann-tiann佇數念,後來到今馬民主e開放,有一陣熱心e人士,才提起這个烏石港e代誌,欲來閣開港e討論,將過去事實e地名,重新閣再來呈獻佇眾人e面頭前,予人知影,這个人文事跡e故事,一一攏記載蹛館內予人看,早前佇

                                 1

遮農漁業佮商業e由來發展史,各所在壁肚頂有排設圖文,古早時代佇港口出入e船隻狀況,予人有一種回想e感覺,早前e情景,船隻e形體,漁村e生活,標題文句說明ka一清二楚。閣再行上頂樓就是農業館,館內有佈置一寡仔早前農家用e工具,親像磟碡(na5-tak8)、割耙(kuak4-pe3)、犁頭、風鼓、鋤頭、鐮歷仔(liam5-lik8-a2)、畚箕、米籮、粟耙等等,猶有奇奇怪怪講不盡e農具用品,嘛有一坵一坵牛佇駛田,人佇播稻仔各種e模型,岸邊閣有配合著一窟水池仔真自然e景觀,予白鴒鷥佮水鴨仔佇遐泅水討食,模樣造型做到完全像真e仝款,予遊客看ka醉茫茫,若親像坐落去水池邊e石頭頂,欣賞著對面e蘆葦草,袂輸簡那看見一遍野外e風景,爽快e心神飛出十三天外,清爽無塊比,予人有一種親像家已進入去大自然e境界,享受著難得有錢無凍買,真媠e好所在。

    一樓一樓看完,行到一館有古早味e氣氛所在,忽然有一个老阿伯仔,徛佇對面亭仔跤前,佇彈古早e月琴,身穿破爛褸襤e薄衫,留著頭毛白白、閣喙鬚長長,目神專心佇注意去伊彼支月琴e琴線,認真佇彈彼首有古早味「月夜愁」e歌詩,彼落模樣仝一款,閣來隔壁倚佇亭仔跤e厝內,有一个阿婆仔,佇遐賣碗粿、九層炊、芋粿蹺,閣過彼爿有一个歐巴桑佇開布莊賣布料,沓沓仔行,閣出外面來,有一个歐吉桑,排一擔雜細籠,跍佇遐喝玲瑯賣雜細,探頭ka伊詳細看一下,原來雜細籠擔仔內底,閣囥一寡仔查某人所愛用e胭脂、水粉、雪文、針黹、蓬絲線,各種細項物件,應有盡有,予人感覺真古錐閣真巧趣,踅過後面嘛有人佇弄獅、拍拳頭賣膏藥,鬧熱滾滾,遠遠仔望過去,遐嘛有設一座頭城上介出名e古早味孤棧(koo-tshian2),形體簡那有一寡中年人,佇柱仔中央當拍拚mooh孤柱,拚命想欲足百起去棚頂,採彼支竹篙尾e順風旗,爭取著最後勝利e名譽,予庄頭逐家平安順利,好過日子,遐个孤棚佮這个所有一切e人物景觀,真予人回想著早前e情景,有懷念e感覺,真值得人去追思。

    館內所有物件看煞了後,沓沓仔ui頂懸搭電梯落來,下面有一片真大規模e宜蘭縣各鄉、鎮、市e圖景,排佇下跤,欲予人了解,這是佇蘭陽博物館內底有一个宜蘭e整體面貌,做觀後一切e心得。行出大廳門口,面前著有一粒烏石e大石鼓佮一遍真媠e水蓮花,佇等待li2 e光臨佮觀後e暢樂心情,予遊客通得著滿腹e歡喜,予逐家轉去喙笑目笑,一路行過,猶有一寡仔景色,留佇沉底送禮,人講:「好酒沉甕底、待客隨人貯」e意思,這就是欲等li2家已去翕伊e全貌,閣有對面e烏石港佮背後紗帽山做屏障e美麗遠景,予li2有價值通翕相紮轉去做永遠e紀念。

 

 

                                                   宜蘭  冬山  夜暗

                                                 201011    寫作

三月 09, 2011, 08:39

鳳凰花開夏令紅 / 李 啟 明 /

Posted by 莊文龍 | 迴響 (0) | 引用 (0) | 閱讀 (523) | 李啟明老師散文 | 推文 (0)

 鳳凰花開夏令紅     / /

             

     

    舊年e夏令敢若無遐爾仔熱,忽然間煞氣候e變化到予人真難以預料e情形,經過一年中間,到了今年e熱天,彼就全然無仝款囉!氣溫上升熱kah會驚死人,m管是佇街路頂行e人抑是佇庄跤所在作穡e人,in攏嘛咧喝熱,翕kah強欲死,每工平均溫度攏達到三十五、六度以上,莫怪若到歇睏日彼幾落工,無論郊外e溪仔邊抑是有水e山谷溝底,攏是有一陣一陣人山人海e游客佇遐耍水僻涼,來這个所在比較khah涼爽,若依照醫學來解說,嘛有淡薄仔對咱人e身體上會較有幫助健康閣袂去予熱著e作用。事實講,熱天嘛有熱天e好處,親像遊山玩水ia真方便,通出外去踅一四界,看一寡仔野外e景緻嘛khah會清楚,美感性嘛khah有,尤其是佇這个時段季節內,上媠e鳳凰花正咧當開e時陣,佇庄跤e所在遠遠仔ka伊望去,若佇樹仔尾頂看會著一葩一葩真媠朱朱紅e花,大部份彼欉花樹一定就是鳳凰樹,若倚近去ka觀測khah詳細一下,閣較看會出伊e樹形曲線規欉e美感深度,生做枝骨赤白仔赤白,紅花青葉,彎曲姿態宛如盆栽內所彫成e一欉高級品質e藝樹仝一款,予人看著由內心會發出一種無限e涼爽kap心思意境,人人看人人佮意e夢幻,這就是夏令天氣所產e景色留予人一種難忘e憶念

    佇七月十五彼一工e透早,天頂真清朗,風和日暖,我招阮牽手同齊出去郊外運動,兩人散步行到冬山國中時,佇阮e目睭前看著學校e牆仔內有一欉鳳凰樹,樹仔頂有朱朱紅e花蕊開kah滿滿是。彼當時,我kap阮一半停跤落來,心情真清爽相招倚去ka伊看較詳細,會用得講,阮兩人目睭看kah攏無目聶,心內一直感覺真佮意彼欉樹仔,因為阮攏有喜愛盆景e心向,我咧講:「閣過兩工仔有khahe時陣,我一定欲提翕相機來ka伊翕起來做紀念。」阮一半咧滾笑講:「你像痟e,這幾落工e氣候攏遮爾燄熱,會熱倒人咧!你嘛等khah無日一下仔tsiah去翕。」我ka阮一半講:「M過咱愛知影,欲掠準鳳凰花當開e盛景時陣,著愛愈熱e天氣愈會開花,咱愛配合著中晝日頭光度,掠準光線去翕,tsiah會翕著完美e樹形kap花蕊e色彩。」所以佇這幾落工內我愛趕緊去ka伊翕起來,m管阮某按怎咧阻擋,我一定愛去完成這个願望,tsiah袂予我怨嘆一世人。過兩工仔果然真正予我翕著兩、三張真媠意愛e鳳凰花美景,相片留予我無限e安慰kap心願,佇我心靈上有一種永生難忘歡喜叮噹e感覺,當我ui翕相舘將相片拈轉來到厝裡,雄雄傱入去內面隨時就ka阮某展一下,「玉麗仔你看覓一下,這幾張仔相片你看著有佮意無?」伊接過手未看清楚就先對我來一句「消氣散」e話,「痟人翕e相,哪會媠咧,假使仔翕會媠嘛會驚死人,天氣遐爾仔熱嘛強強欲出去翕,恁查甫人喔!真無法度,講袂聽入耳去。」M過伊e喙唸罔唸嘛是真愛看,伊順手勢拈目鏡來掛好勢,就斟酌看一遍,忽然間,「喔」!一聲,「看袂出阮翁

                                1

這馬閣遮爾敖,鳳凰花閣予伊翕kah遮毋成猴喔,痟人痟了有價值矣。」我隨喙應伊:「若無你m通看貓e無點。」唸kah袂煞,伊笑笑一下:「有影貓kah足大點e,袂見笑,家已褒khah袂臭臊。」

   等閣過第三禮拜,有一工我想欲去頭城彼爿辦理一寡代誌,等啊等到彼一工我順紲紮一台翕相機囥踮機車e尻川座仔內底,佇冬山ui七點出發,一路向北爿一直駛,東望西望,看有啥物好光景通翕無?無疑悟沿途煞無成樣e景色通好翕,車駛啊駛,駛來到二城e所在,我會記得佇舊年來二城國小佚佗(tshit-thoe時陣,散步e中間,佇牆圍仔邊有發現一欉鳳凰樹足大欉,伊e形體骨格真媠,予我想著順勢彎路入去探一个看覓,果然無錯,彼欉鳳凰樹e花規欉開kah當咧紅,點點朱朱紅配佇樹仔尾頂,日頭光線照射著伊,規欉樹仔加添了伊袂少e光采,規个樹仔e形體,彎曲自然,宛如人工去造化e藝術品仝一款,真可惜下爿e部份煞去予牆仔壁遮牢咧,欲翕伊e角度真歹調整,只好將景就景,大其約仔調較好一个角度,就ka伊翕起來,m管伊三七、二十一先翕轉來洗相看覓一下tsiah閣講。不出所料,隔第二暝我將相片拈轉來看了後,果然袂禾黒,樹形體態真正媠,紅花青葉婀娜多姿,假使仔這欉鳳凰樹若是當做盆栽來講,m知欲偌爾仔好你敢知咧!M tsiah鳳凰樹若到夏令e時陣,就是一種會當講是樹仔e樹王之王,媠kah予人感覺會觸舌,萬分e欣羨一種e喜氣,永遠記憶蹛人e心肝頭,真正好,連睏e時就會帶微微仔笑咧。

    佇今年e熱天有一陣朋友來到我厝泡茶,逐家攏是老朋友仔,真好鬥陣,有啥物話就講啥,口林茶開懷暢飲是阮e娛樂,你一杯我一杯,口林kah爽快ni-ni,其中有一位先開喙就講起:「這e茶真好口林、潤喉閣會甘喙舌尾,老李仔這e茶是去佗位買e,一斤是偌濟錢咧?」,我回應講:「無啦,是朋友相送,若依照送予我彼位朋友咧講,這種e茶若佇外面買,可能性是愛二、三千箍以上tsiah買會著,m過伊無咧賣,這位朋友伊彼工是送我一寡仔nia-nia,恁若佮意口林e話,今仔日恁儘量口林免客氣。」一時in逐个同齊開喙講:「按呢好啦著愛共伊口林予夠氣,tsiah袂無彩」,in逐个半口林半開講,其中一位朋友提出一个問題來,伊講:「今仔日遮爾仔爽快,咱逐个來講一項仔家已上愛e物件閣有趣味e代誌啥物款?」阮攏講:「好啊,啥人有欲先開喙無?有一位老陳e伊講欲先講,阮攏笑伊厚話大舌閣興喋,袂輸伊e社會經驗真豐富咧,別人攏袂曉講,好啊,阮著講欲喋逐个攏來喋較有一个仔,歕看啥人e月圭較大粒,橫直,今仔日是歇睏日蹛厝內做一个答喙鼓e議量嘛袂禾黒。阮朋友開喙就講:「親像你厝內有遮濟粒所排e藝石,一粒生一款,逐粒有伊e特色,抑若對面彼粒ni-ni liau-liau龜甲石有像一尾魚仔佇水底跳起來仝款,我看著真活寶,m知你有提出去kap人展覽無?」我講:「我猶無kap人參加樹石會,哪有可能kap人參加展覽咧!」伊講:「老李仔,真可惜矣!你有遮濟e石頭,形體攏袂歹看,內底有玫瑰石、花紋石、鐵釘仔石、砂眼石、黑石膽,每一粒攏真媠有達到藝品e水準呢,你哪會無愛提出去展寶一下,真無彩囉!像我抾無幾粒仔就kap人參加,佇舊年我有六粒參加樹石

                                2

會藝品比賽,結果得著兩粒佳作入選獎,偌爾仔歡喜咧,今年初春嘛有閣去山頂抾一寡仔鐵釘仔石,提轉來將內底塗肉沖洗出來,形體嘛袂偌歹看,其中有一粒欲kap咱台灣e形體仝款,這馬有準備明年欲kap人參加比賽,到時陣恁tsiah來看,看我e寶貝。」「老陳e,你遮爾仔拍拚,對雕刻方面閣有相當e經驗,應該是無問題tsiah著,明年我一定會招阮某同齊去ka你捧場,看你e大作,請你放心免掛意。」「好啦,若按呢將做明年e決定囉!」伊講,「到時陣mka我黃牛去喔。」「免煩惱啦,佗一擺我會講假e,尤其是石頭e藝品阮兩翁仔某上愛閣足有趣味e物件,哪會使去予伊錯過機會咧,一定會去大開眼界,看一个較有咧,你免驚啦!閣來,紲落換老吳e來講看覓一下。」我問伊e趣味是啥物,老吳e就應聲:「ok,我e趣味是愛足百nia-niam管伊好足百抑是歹足百e山我攏愛去ka伊試探看覓一下,因為我興趣冒險,嘛會通仔訓練出我本身e體力kap意志呢。」「喔!莫怪仔莫怪,你e事業tsiah會做kah彼爾仔好閣順利咧!」「喔!」伊閣講,這就是我調養身體e好秘訣,可能性ia無其他較好e步數通好展,若有機會e時陣,我tsiah招恁來去足百山,這是一項真好e運動呢!親像恁有興趣種盆栽,若想愛欲樹仔較老頭e體形,本山人就攏知影,山頂e石岩壁就足濟矣,奇奇怪怪e形體攏嘛有,看愛大欉e iah是細欉e,由在恁揀攏揀袂完咧。依我看著有幾落擺行過一條彎彎斡斡e溪崁對面,彼个山坪攏滿遍生出杜鵑樹仔,花蕊開kah紅葩葩,其中內底iau有藏幾欉仔白色kap粉紅仔色e花,規遍山發kah足媠e,真予人意愛e大自然風景,看久也看袂膳你感知。喂!老李e你來建議嘛通招老蕭kap老郭in兩个同齊去挖幾欉仔轉來種蹛盆e做盆景,假使仔若予恁提轉來種會活e話,一定是真媠閣一度讚e,這是愛靠恁e經驗就有影。」老郭e講:「著矣,老蕭e伊有彼隻足百山虎鐵甲車,老李e你也有種盆栽e經驗真豐富,咱就相招一日仔來去山頂挖看覓啥款?」老蕭e應喙講:「嘛好,等候明年e春天較涼冷e時陣tsiah請老吳e來帶路入山去挖寶。」一時逐家笑kah哈!哈叫,有夠趣味a,就按呢結束今仔日e開講會,有閒加減吐憐涎(thoo-lian-sian)嘛袂禾黒

    阮幾落个趣味性真相仝,就約束閣過第二禮拜歇睏日出去野外活動,老郭伊做主東,彼工駛一隻自家用e驕車,內面載著inkap老蕭e、老吳ia駛一隻載in某同齊來阮兜相招阮兩翁仔某坐伊e車出去野外佚佗(tshit tho)看光景,沿途ui南爿駛過到北爿,庄跤路一條軁(nng)過一條,彼工真好勢駛車,天氣閣清朗,有風微仔勻勻一陣一陣吹來,清涼無塊比,啊!逐家感覺真好,彼時忽然間老吳e問我:「老李e今仔日沿途樹仔遮爾仔濟,你有去注意著佗一種生做較媠e樹仔無?」我隨時反問老吳e:「你e觀感呢?」老吳e講:「若依照我定定咧看e路樹嘛,猶是袂走置彼種鳳凰樹,因為鳳凰樹伊e枝骨,彎勢攏真媠款,閣會開花tsiah心適,規欉樹仔形體攏配合kah真調和咧,紅花青葉、白色枝骨,整體ka伊看起來,比較別款樹仔別有風味呢,所以我看著較佮意,iah老李e你呢?」我嘛kah你仝意思啦,毋但佮意nia-nia閣真欣羨今年花蕊開kah特別濟,我定定嘛走出去揣這種樹仔,便若有較媠閣有造型奇妙,我就攏ka伊翕相起來做紀念。」

                                3

彼時我歡喜到塊仔,叫老吳e:「喂!你若有興趣看鳳凰這種樹仔,譕咱今仔日將車駛對山邊來去,彼爿有真濟e鳳凰樹,我會記得,佇真早e時陣,倚佇拔雅林彼角勢e吉祥路e路邊,兩爿就有種規排e鳳凰樹,咱同齊來去看覓一下,好無?凡勢這馬已經真大欉矣,有媠花通好予咱看咧!」阮兩台eia一直駛來到頭城e福德坑口,對面落嶺就是吉祥路矣,穿過福德坑橋了後,阮就開始望著朱朱紅e鳳凰花生佇樹仔尾頂,阮將車停落來,逐家足百起去駁岸(poh-huann)頂,去欣賞對面彼遍難得e花海,逐个看kah如癡如醉,一時煞m甘離開彼種迷人e景緻,予阮逐个人煞難分難離依依不捨e心情,m過一段時辰過後,日頭ia漸漸欲落山矣,佇彼工ia不得意隨人著愛歇睏矣,阮看過癮矣就相招來轉去家已e厝較有影。

    今年e熱天ia漸漸欲過去矣,這馬風颱期ia差不多欲進入咱台灣猶閣無偌久e進前,利用我有閒e時間,相招我e牽手同齊坐機車出去撈撈一下,彼工阮就踅去庄跤看看家已故鄉e景色,等風颱猶未來進前,趕緊通欣賞一寡仔大自然e風光景色,蹛庄跤有田野園埔曠闊e所在,一四界鳥隻飛來飛去滿滿是,尤其是白翎鷥特別濟,若徛佇遠遠e所在就通望去伊e影跡,有白白幾落隻e身影,頭犁犁佇田底啄物件討食,有e是歇佇樹仔尾頂歇睏、有e是佇天頂飛來飛去,真予人會感動出自由e天地任in遨遊無牽無掛e暢樂。啊!一遍e美麗風光增添了袂少e心靈安慰呢,雖然咱台灣庄跤猶是比較有較冷靜一點仔,m過伊e景觀是相當e自然,真值得咱人來欣賞kah呵咾e,親像佇野外鳳凰樹有開花這段時期,歇佇樹仔頂e白翎鷥iah是佇遐附近飛懸飛下彼種快樂e模樣,彼號(hit-

lo)優雅e情景,會予咱人去感覺著心情無比e清爽kah解開一切e心悶,無論是拄著啥物款重大煩惱e代誌,一時攏會通拋憂忘煩,放開萬難e感覺,佇逐年夏令鳳凰花當開e時陣,m tsiah是我上愛去欣賞花季e季節。佇遮希望咱同仁有所同愛e朋友,會通仔去喜愛花蕊e精華,珍惜鳳凰花是一種享受咧。

 

 

 

 

                                             筆者   寫於 宜蘭縣冬山

 

                                             20107        敬筆

三月 09, 2011, 08:38

-- 鶼 鰈 情 深 -- / 李 啟 明 /

Posted by 莊文龍 | 迴響 (0) | 引用 (0) | 閱讀 (836) | 李啟明老師散文 | 推文 (0)

-- --      / /

 

 

              

               、 相 依 扶 持 家 興 旺

    過年初一彼工e透早,是咱台灣上蓋有紀念性e大節日, ia就是新春第一工,滿街小巷家家戶戶攏咧放炮仔慶賀喜氣,一大陣e囡仔兄姊傱出傱入,歡頭喜面笑咍咍,穿新衫出來咧看鬧熱,春節早時仔e氣候清新涼爽、和風暖日,對遠遠仔彼爿來一對真四配e翁仔某,手牽手,好親像真恩愛彼款e模樣,兩人有講有笑,慢慢仔行對阮兜e門跤口停落來,真歡喜咧喊:「火生仔嫂、火生仔嫂毋知有佇厝無?」我有聽著雄雄傱出來一看,喔!原來是阮嬸婆e囝,榮伍仔叔kah榮伍仔嬸兩翁仔某欲來揣阮老母,講是欲來拜年,我ka in應講:「有啦,阮阿母佇後爿灶跤,我去ka喊,請恁小等一下仔。」過無偌久,我kah阮老母同齊行出來,阮阿叔kah阿嬸行倚來,一聲就真親切e kah阮老母拍招呼,雙手合恭:「火生仔嫂你好,新春恭喜喔!」阮老母趕緊回應一聲:「恁兩位翁仔某tsiah有心來看我,感謝囉!請恁tsia坐一時仔,我入去泡茶,隨時著出來,等我」,阮老母趕緊三步做兩步走斡入去灶跤,順喙叫我陪伴in兩位,彼時,阮阿嬸利用我kah in咧罔話這个中間,伊問我:「現此時你有咧創啥無?」我講;「無矣!因為我這馬拄初中畢業,攏蹛厝內加減看冊,準備將來應付高中考試。」阮榮伍叔仔隨後應一聲:「按呢真好ah,著khah拍拚一下。」過無偌久,阮老母對灶跤捾一沽茶,手捀一盒餅,講是欲請in兩位,阮阿叔in兩位翁仔某ia真客氣對阮講:「歹勢啦,閣坐一睏仔就欲去廟仔拜拜,火生仔嫂毋免啦。」毋過,阮老母隨手倒兩杯茶捀過予in,順紲講:「真感謝恁tsiah有心過年來拜年,莫怪啟明in老爸tiann- tiann掛佇喙- - e,真呵咾恁兩翁仔某,做人真標準,善良仁慈,平常時仔我若有閒去到恁兜kah恁老母開講,伊就講,阮囝伊ia真好運去娶著一个好牽手予我做新婦,真敖拑家(khinn-ke)閣會煮食,逐頓攏攢kah好勢、好勢,免予伊操煩,佳哉,阮囝伊ia真乖,對我真有孝,對某嘛真會曉體貼,榮伍仔伊若去上班,人伊(新婦)就蹛內面摒東摒西,物件整理kah真四序(su- si)。」彼時,榮伍嬸仔回答阮老母講:「無啦,火生仔嫂,你真敖ka我褒獎,哪有影按呢?」榮伍嬸仔真謙虛回應一聲,阮老母紲落閣ka伊講:「有影啦,這毋是我愛ka你呵咾,iah是講白賊話,事實就是按呢,你查某人生做媠閣賢慧,項項攏會曉替人想,若我假使仔阮囝娶有你這款人予我做新婦,毋知欲偌好咧。」彼時,我坐佇椅條邊仔聽kah真欣羨,我看in兩翁仔某同齊捀茶起來敬阮老母,講一句說謝話:「火生仔嫂予你真多謝囉!今仔日來ka你拜年,你予阮tsiah爾好e金言玉語,阮十二萬分e感謝,ka阮安慰kah鼓勵,賜予阮兩翁仔某無限e精神,以後若有閒e時,阮才閣來,這馬阮欲去佛祖廟拜拜,你若有閒才來阮兜kah阮老母開講。」隨後in兩位就向阮拜謝行出去,過無一時仔我就一直咧想,這擺看in兩翁仔某tsiah爾仔恩愛,相敬如賓,對人態度斯文有禮、溫柔恭敬,實在是予我序細後輩人做一面真清楚e鏡仝款,永永遠遠留佇我e心肝穎仔。

                翁 某 和 合 前 世 修 、 這 世 才 免加 憂 愁

                世 間 若 有 這 款 樣 、 予 咱 借 鏡著 愛 想

 

                                   1

 

    我這个叔仔是阮叔公仔生e囝,雖然有一點仔隔腹關係,毋過,伊對阮爸母看若親像家己e親兄嫂閣kha親仝款咧,時常若有啥物代誌攏來揣阮爸母參詳,有困難時阮爸母ia會替in鬥跤手解決,阮叔仔是一个斯文人,忠厚老實,佇公家機關食頭路,伊生有一个後生、兩个查某囝攏真優秀,當初,大後生iau咧讀醫科大學時,兩个查某囝咧讀高中一、二年,食頭路人難免經濟這方面加減會khah欠氣力,(當時食頭路人趁無啥錢)。有一擺我看伊來ka阮老母借一支電風,伊講是欲借轉予in囝吹涼,in兜內面到中晝時仔有西照日khah熱,in囝這ku當咧拚大學考試,愛照顧囡仔e身體khah要緊,阮老母聽著按呢有道理,趕緊夯一支電風予伊接手提轉去。隔轉工,in兩翁仔某相招來阮兜會多謝,阮阿嬸手捾一項禮品欲來答謝,毋過,阮老母無ka in接受,阮老母講:「哪有人按呢?袂使按呢做,會予人笑死!電風ia毋是會食去矣,另工恁會當閣提還阮,無要緊毋通囥蹛心e,恁這時陣當咧落囝坑,當然項項攏嘛會欠缺去遇著種種困難佇咧!毋好客氣,恁毋通想袂過就提物件欲來送我,我袂ka恁收啦,緊提轉去。」阮阿叔in兩翁仔某無意無意ia照聽話提轉。

    有一工欲暗仔,我kah阮四兄欲去海墘仔掠鰻仔栽,經過阮叔仔in門跤口,兩翁仔某當拍拚咧洗門口埕,阮兩兄弟仔kah in拍一下仔招呼,in兩人隨時越頭過來,問阮欲去佗位,阮應in講:「阮欲去海墘仔。」阮叔仔隨喙回答應講:「恁兩个先去,我等一下,tsia- - e洗好勢,我就會kah恁嬸仔同齊綴恁後爿去海墘仔做運動。」因為阮這个叔仔是佇頭城鎮公所民政課當課員,做一个公物人員身體khah死痠,所以伊真注重身體健康,逐工下班轉來到厝,衫仔褲換換起來,先足尞落去替in某鬥做一寡仔厝內面e穡頭,做完了後,到暗昏仔攏有招in某鬥陣出去外口撈撈一輾仔,順紲作運動一下,in某才慢慢仔綴後爿行倚去,予in翁筋骨小可仔輕鬆一下,解消伊佇辦公e壓力,清除伊會通回復頭腦e活動,佇這个過程中,伊捌ka我講過,咱人若活佇這个世間上,身體健康上重要,身體是家己e,時時刻刻攏嘛愛靠家己照顧予好,才有活力通來持家和樂,若無者,欲按怎安搭一家,講嘛有影有道理,總是人生在世,萬事求平安欲過好日子,愛有健全e查甫人,才有法度維持一个溫暖e家庭,尤其是阮彼个嬸仔,ia真會曉照顧翁婿,tiann- tiann攏咧燖(tim)雞顧大細ia順紲ka伊補養,遐个囡仔嘛顧kah真勇健閣真古錐,免予阮叔仔煩惱著,阮嬸婆tiann- tiann嘛呵咾伊,講伊這个新婦真乖巧,ka in厝內面大大細細發落(huat-lohkah誠好勢,一四界攏整理kah清氣溜溜,予伊老歲仔人食穿攏免煩悩,阮嬸婆伊e人,面貌生做豐脂慈祥,講話真實在,予人kah伊接近時,有感覺一種慈愛可親e老大人,對伊囝兒kah新婦攏一律看做仝一家伙仔人,無去區別著你我之分,所以,in e家庭攏真安祥平靜,逐工過著庄跤人求實彼種平凡樸素無憂無慮e生活。

               一 家 祥 和 難 求 來 、 何 必 計 較啥 物 代

               人 生 在 世 沉 苦 海 、 好 歹 自 有神 佛 知

    榮伍叔仔in兩翁仔某平常攏是食素齋,有時陣出外去無方便,攏是榮伍嬸仔款一份厝內家己做e素食便當予伊紮出門,因為彼當陣榮伍叔仔對課員慢慢仔升到做課長,工課有khah無閒,攏是過晝過暗才有食飯,所以in某真關心伊e身體,有時仔,捾一寡仔家己煉e青草茶去予伊食退火,in某就是有這款善良慈愛e心腸,翁某時常相敬如賓、溫情入深,予in課內e同事tiann- tiann咧提出來講,課長翁仔某是in逐个翁某相敬e模範良師,上蓋有台灣味e溫愛夫妻一對,會當予in學習e風範,阮榮伍叔仔真謙虛,做人閣真仁慈,攏是ka in同事講:「ia是伊前世修來e福,才有今世得來e緣,這完全是in某想會到、做會到,送予伊e福份,無欲哪有通按呢?」古早有一句話:「翁某攏是相欠債,出世才來還伊- - e。」翁某本是同林鳥,阮叔仔in就是有彼種認同e概念,才有平凡e過日子。

 

 

 

                                          2

 

    日子ia真緊過去,一觸久仔就經過五、六年仔,in e大漢囝ia對醫科大學畢業,當初是分配去台北大病院做實習生,後來過一段實習e訓練,才考牢醫師執照開始進入正式做醫生e階段,彼時,對阮榮伍叔仔兩翁仔某來講,是一項上大e向望,期待足久矣囝兒有了頭路閣是咧做醫生,in內面e經濟狀況就慢慢仔改觀穩定,in e生活一工比一工好起來,過無偌久inia結婚矣,同時,兩个查某囝ia對高中一个一个畢業,大查某囝自畢業了後佇厝內歇睏一年外,有時kah in老母學做煮食兼學一寡查某人應該做e室內工課,因為阮阿嬸真注重查某人愛負起理家e責任,將來查某囝是愛嫁去人兜,到時通替in翁婿kah大家官照顧家內事,萬項代誌加減攏嘛愛學,才會通予人疼惜,得著查某囝本身e幸福,這點,阮榮伍嬸仔攏會kae查某囝雕琢,教kah好勢好勢,一點仔都袂精差去,伊是一个真伶俐閣標準e台灣女性,人講:「嫁翁著愛三從四德」,伊就是彼種有理想e家庭主婦。日子真緊過一年半了後,伊e查某囝有媒人婆來佇欲講親事,對方是一位有食頭路e人,名號做「坤池」,算起來ia禾黑e查甫囡仔,是佇港務局當職,有合意e體材,阮榮伍叔仔兩翁仔某嘛有去ka in對方探聽過,囡仔真老實閣真拍拚肯上進e青年,所以,媒人婆仔來講幾若tsua,才答應伊,將按呢決定in查某囝「慧君」e婚事,第二年春天順利嫁出。紲落第二查某囝ia綴後爿高中畢業,伊生做真媠真精光,人看人人佮意,聰明竭性、講一知二,kahe名字有一點仔仝款,號做「勵君」智慧雙全,清秀美貌e氣質,伊畢業無偌久,有一間公司就來物色去ah,請伊去辦事務做in公司e看板,彼當時in公司e人攏嘛呵咾kah會觸舌,彼幾年仔予in公司趁了袂tsio錢,帶來公司相當旺盛氣氛,年年增收,這段期間阮這个叔伯小妹有熟似一位男朋友幾若年仔,這个中間ia有真濟个查甫囡仔欲來講親事,結果攏無答應,落尾仔才嫁予伊e男朋友,完成伊e終身大事,到現此時翁某真恩愛,親像鴛鴦一對,同出同入、夫唱婦隨,兩人佇仝一个公司上班。阮榮伍叔仔in兩翁仔某自從二查某囝嫁出了後,煞厝內面ia比較有一點仔空虛,tiann- tiann咧講予阮老母聽,查某囝若未嫁時,就煩惱in兩姊妹仔將來會變啥物款?這馬已經嫁出門矣!顛倒感覺厝內底敢若有欠啥仝款,煞khah無鬧熱去,若無當初有查某囝佇厝,加減會kah序大人t i - t i答答講一下話,啊!總是人生就是按呢生,有好有怨才會予人來操煩,阮老母回答in講:「人若無煩惱,食飽kann會一箍變成阿不倒咧!嘿,到時就真好笑ahmai ka想遐濟矣。」阮榮伍叔仔in兩翁仔某就是遐爾仔有互相體諒對方,相依為命過日子,in e一生中真有一套前瞻性e安排,佇無形中,感覺神佛攏有咧ka in鬥扶助仝款,予in一家得著平安順序,清靜度過日子。

              人 來 世 間 若 佚 佗 、 寬 宏 大 量有 福 報

              夫 妻 著 愛 相 照 顧 、 全 家 才 會結 好 果

    紲落閣來講,阮榮伍叔仔e大後生,伊e名號做「李鏡明」,人品一流、生做將才,有理想遠見e查甫囝,自伊對台北大病院轉來故鄉,一心一意想欲為家鄉盡一份綿薄之力,為民濟世,將伊一生中所學e醫術貢獻於世,佇羅東火車站落去無偌遠e公正街開一間小兒科e醫生館,名號做「李鏡明診所」,伊少年抱負崇高e理想,專心欲為地方百姓做好醫德,醫藥費用儘量替患者減免,時時聽命in爸母訓言:「身為醫生愛獻菩薩心、救苦救難救世民、人來世間若佚佗、寬宏大量有福報。」伊到現此時,逐工患者攏真濟看袂離,有時我欲去kah伊講話都無時縫通來講,in兩翁仔某無閒嗤喳(tsih- tsha),內底閣有倩兩位護士咧鬥跤手,ia是仝款,因為有這種緣故,阮榮伍叔仔對公所退休了後kah阮阿嬸一直想欲去ka in囝遐鬥顧孫仔,經過一年兩老e才同齊搬過羅東彼爿蹛,順紲照顧孫仔,ia通講是去享受老人晚年該得e子孫滿堂之歡樂心願,閤家平安e快樂日子。有一工禮拜時仔,我欲去野外做運動,佇冬山河堤岸kah in兩爸仔囝相tng著,in囝鏡明緊捷快ka我叫一聲,「阿兄你去佗位?」

 

 

                                           3

 

我對面ka in回應講:「我欲去環河一遍,順便通踅一輾仔做健康運動,我順喙問in,「Ah恁兩爸仔囝今仔日哪有閒通出來遮?」 in講: 「嘛是出來做運動走走一下,看一寡咱庄跤e景色,尤其是佇咱台灣家己e鄉土內底,感覺khah有庄情氣味存在,行過田庄所在,風景親像詩畫、到處鳥語花香,白翎鷥飛起飛落,親像活動e影畫仝一款,予咱佇頭殼底不時有浮現一種永遠放袂掉e記憶,拄著庄跤人攏是充滿著人情味,有講有笑a袂有生疏e感覺,親像我這馬已經退休矣,tiann- tiann招恁阿嬸出國去旅遊觀光,看一四界e風情人物,轉來咱台灣了後做一个比較,才知影外國e月娘ia無比咱國內khah圓,只不過是風聲而已嘛。若依我e親身體驗來講,iau是家己e故鄉khah好咧。」紲落阮叔伯小弟閣贊一聲,「毋才講嘛,伊無愛搬出去外國蹛e原因就是佇遮,咱家己e庄頭一四界攏予咱留著一種無限e回想kah懷念佇咧,咱愛疼惜著故鄉e親情才著,敢毋是?」,有了這種予阮阿叔e啟示,賜予我無限e感慨kah領悟,阮阿叔in一家人會tsih爾仔溫暖和合e家庭各種原因,可能性就是有tsiah爾好e教養,這完全是有一種宏觀慈悲e心腸才會通得著翁仔某永久「鶼鰈情深、夫妻恩愛」,彼種風範,有這種e好模樣過程,一生攏留佇我e心目中,久久都袂去予放掉去咧。

 

 

 

 

                              - -              - -

 

                                  寫於 宜 蘭 縣 冬 山

三月 09, 2011, 08:37

-- 母語伴阮二十冬 -- / 李啟明 /

Posted by 莊文龍 | 迴響 (0) | 引用 (0) | 閱讀 (611) | 李啟明老師散文 | 推文 (0)

-- 母語伴阮二十冬 --      

                               / 李啟明 /    

                           

             調               

    算起來經過有二十冬用心栽培e5花欉,卻是一直無法度hoo7伊莩出真媠e花蕊,一欉一欉強欲失調去,tsie si7啥物原因ti7作怪呢?咁講內底生蟲ti7出問題,或者有其他因素存在?阮攏m7知影無去發覺,這種e5原因 tiann7- tiann7 ti7e5頭殼底想袂清楚,到底beh用啥物方法來ka7伊花欉顧hoo7媠起來,thang e7 kap 人比樣,等候`有一工e7凍開出好花,湠滿清純e芳味,phang出來hoo7逐家欣賞kah鼻芳,he si7外好你感知?                                                        

    回憶二十冬前,tongti7中年奮發e時代,ti7台灣鐵路局食頭路,每工to si7無閒tshih- tshah,一方面愛作穡,一方面koh趣味台語,有閒etiam7 tiam7 a2訓練家己學寫台語詩詞e5文章,有時ti7上班時,等無人看tioh hit tsun7加減偷寫一寡仔,若無tioh8 si7等到暗班空課做完e5時,兩、三點khah更深淡薄仔tsiah開始寫,hit tsun7 ma7 khah夜靜,khah e7有靈感來,ia避免hoo7同事ki2- ki2- tuh8- tuh8講一寡閒仔話,ia7比較khah好寫順手,to7安呢ti7 hit種環境中不斷e5磨練,了後tsiah koh慢慢學寫童言、散文,詩歌等等。

    雖然tsit段期間寫無真好e5文章,m7- koh ia7 hoo7我寫袂tsio2e作品,可惜m7敢露面提出來hoo7人看,驚袂見眾哩,等到有一工,去台中參加桃園茄苳社所舉辦e5母語推展協會開會,hittsiah熟似tioh8林央敏、吳長能in兩位前輩,in順紲ka7我紹介「台語世界」試刊號雜誌,內面有一寡台文作品,hithoo7我看tioh8 kui落篇袂 bai2 e5文章,親像林央敏先生所寫e5「台語文是根治台灣民族e5藥頭」kah張春凰姐仔e5「母語樹欉e5養份kah湠根」、廖炳惠e5「語文著是生活方式」、吳修能e5「台灣語言e演進」、董育儒e「半條蕃薯e5悲哀」。in所寫e5文章攏袂 bai2,高雅koh深度,內容寫kah真深刻,富有吸引力真厚e5台灣味胃口,tsit本雜誌suah引導我袂tsio2 e5思想kap啟發,一時tsun7 m7知影佗一條神經根去hoo7刺激tioh8,第二工ui台中趕轉來到厝內,等上班時趕暝班寫一篇「政治陰影下e5台灣歌曲」,然後經過細心核對一遍koh一遍,到第五工tsiah敢將tsit篇散文大膽寄出門,投入台語世界雜誌社。日子一工一工過去,ia7真緊到了第二個月,忽然間ti7中晝時仔接tioh8郵差先生送來一包郵件,拍開一下看,內底是台語世界寄hoo7e第二期雜誌,我抽出一本先ka7伊看hoo7詳細,果然我hit篇散文刊登ti7內底,hit時百感交集,內心一tsun7燒一tsun7冷,燒e5情形是歡喜心,冷e5是驚惶心,想袂到有tsit種代誌e7發生,想ia7想,到底我tsit篇文章是e7值得眾人看無?ka- ti7想袂清楚,sua3koh看所刊出e5文章一一ka7伊做一番對比,啊!錯了真見羞,m7kap人比評,我e5文筆尾iau2- si7無夠強,需要koh再認真拍拚tsiah綴人e7 tioh8

                                -- 1 --

        過了一段時間e思考,到第三個月運用ka- ti7 e5信心提起勇氣,koh繼續寫落去,果然無錯,依照 長能兄鼓勵e 話是無m7 tioh8lu2寫會lu2滑溜,各種文章寫出來suah lu2有味,連紲hoo7我寫一寡童言、散文、詩詞、詩歌種種,後來寄hoo7 in攏有刊登ti7雜誌頂kuan5tsie完全是長能兄提拔助我勇氣進入台語文寫作e5機會,M7- koh有寫二、三十首e詩歌到現此時iau2 koh m7敢寄出門,因為有tsite5經驗,suah lu2lu2好膽想欲寫 khah有深度e散文thang hoo7人篩選,結果ti7、三年中間iahoo7我寫五、六篇對咱母語寄望心聲e文。

        Hittsun,對台語文寫作感覺suah 有興趣,我考慮一冬外tsiah下定決心beh犧牲tioh8鐵路局高薪,提早三冬退休,專心一意想beh奉獻母語e5傳承空課,奉獻一切微薄之力,看e7凍加減扶助救母語ti7咱台灣來生機be7kohtioh8 長能兄kap央敏兄e5指引輔導,tsiah開始足尞落去台語界e5行列,參加2002年國內母語支援老師師資考試,結果總是皇天不負苦心人,hoo7我考牢。Hit年宜蘭縣總共考椆九十外名(依照各縣市比較並無濟),m7- koh in tsit班人增加了我無限e5信心kap希望,我想ui3 tsia e5母語e5教師thang做阮宜蘭縣發展母語e5生力軍。ti7眾人合力kap林錦賢、陳玉華in兩翁某協助之下,互相招募溪南、溪北兩爿同仁,成立宜蘭縣母語推展協會,經過開會程序選舉結果in推選我做創會主任委員,一時真歹勢我m7- bat擔任tsit款任務,比較khah生疏做了無真好。ti7會內tsiah開始熟似一寡對母語熱心e5朋友,親像 劉麗華、楊晉平、黃淑玲、莊文龍、許秋月、吳水同、鄭麗真、許宗義、魏連治、鍾茂樹、張錦、謝廷忠、楊文通、吳明一、林月霞、張明花、賴淑玲、邱淑媚、朱嘉莉、朱瑞雲、黃秀枌、黃麗葉、林明義、周文靜、王進生、林淑華、廖素蓮、林淑貞、陳美惠、林汶鴻、吳士郎、王端品、吳佳靜以及花蓮縣來e5郭子銘、王佩玲、林淑霞等,iau2- koh有真濟唸袂完e5新朋友,其中尤其是魏連治女士in 翁仔某上kap我逗跤手,hoo7我順利完成tsit件重要e5代誌。

    同時,宜蘭縣各鄉鎮市母語老師成員聯名夠額,由吳水同老師kap我同齊將申請書送往宜蘭縣政府申請登記,了後經過半年時間開過五次會議程序記錄,討論,經由一再詳細協調,將宜蘭縣母語推展協會改為宜蘭縣台灣語文學會,後來tsit項學會名稱to7安呢定案,逐家ia7認為比較khah妥當,被免期後另出支節,to7安呢我ti7 tsit段期間擔任主任委員任務。因為tu2開始運作總是有一寡答答滴滴e5代誌愛負起責任,比如,開會借場所,通知幹部以及會員開會,連絡外縣市資深e5教師,對羅馬字音有經驗e5先進來宜蘭指導阮e5師資班傳教學員,安排教室koh集訓教師beh入去學校教冊e5學前受訓。有了各別e5煩事,可能ia7是我過頭操煩求好完美e心理作怪,hih工當ti7受訓中間,我身體不支suah來暈倒去,經過數十名e5老師同仁合齊ua2來跤亂手忙,有e5掠痧根,有e5 iat8風,有e5thin5滾水hoo7limti7我迷惘中tau7- tau7- a2 tsiah醒來,逐家tsiah吐一口喟,歡喜kah peh起來跳,向我握手,祝福我平安無代誌,我順喙ka7 in

                               -- 2 --

逐家會一句多謝,hoo7 lin疼愛tsiah- lin深,實在真歹勢,勞力lin囉。過第二

禮拜由林錦賢、陳玉華兩位翁仔某kap楊晉平、吳水同、鄭麗真等五位作為幹部代表會員來我厝探訪行禮,我ti7 in眾人面頭前會一聲多謝,hoo7逐家來關心kap照顧我e病情,所以tsit點恩惠hoo7我一直囥ti7心肝內記牢牢。                                                

    歲月ia7真緊經過五冬外atsit e5 中間我有一寡任務未完成,ti7各位老師e5協力之下,攏一一接承去辦,因為 tsit e5 學會內底人才濟濟,真順利將宜蘭縣台灣語文學會愛辦e代誌做到真好勢,無發生問題,有一件我最擔心e5代誌是需要分配到各學校擔任教冊e5老師,是m7e7凍平衡分配,是一件難題。首先batsio2- khua2- a2(稍微)糾紛出事,m7- koh經由各位同仁理性e5接洽,然後一一解決順序,hoo7我囥ti7心頭e5一粒大石鼓tsiah 安呢 tau7- tau7- a2搬開,減輕一寡壓力 e5負擔,身體ia7一工一工好起來。後來tsit e5會開始舉辦頭一擺各學校學童台語演講比賽,參加人數有三十四名,邀請六位評審,in攏真客氣,謙虛賢讓推我當總評審,ti7互相推讓不決之下,我ia7大面神來ka7 in接納,結果演講學童各有絕巧,經過各位e評審,認為逐e學生攏真gan5講,演講題材真有內涵,充分發揮鄉土味e5意境kap深思,可能ia7有老師認真ti7背後指導e5關係,tsiahtsiah好圓滿e5收場,hoo7阮各位評審順利來選出六名e5優秀學童,儲備後進台語人e5基本新秀種籽。演講完畢順紲舉行自由交談活動,ti7活動中有kui位名人,親像 立委林建榮先生、縣長夫人田秋瑾女士、以及台語界前輩邱`文錫先生、洪瑞珍小姐攏kap in一一交談一段往事,隨後順便說謝,koh另有一位ui3台北方面來e5熱心朋友行倚來kap我握手,伊是相當有名望台語社e5會長 李尚賢先生,ti7短短e5時間內親切e5寒暄一段良言蜜語,順口講in最近需要完成一期雜誌做最後留存e版本,問我是m7是有寫新e5作品thang提供hoo7 in助一寡光彩,當時我有ka7伊講,有lahm7- koh寫無真好e5文,大約有六、七篇nia7- nia7,現此時無ti7 tsia thanghoo7你,等你轉去台北我tsiah綴後寄去hoo7你過目看覓一下,想袂到伊suahhit七篇「鳳凰花吱吱紅」、「桑海斷魂人」、「寒冬草」、「慈母淚痕」、「滿山春色」、「泡茶e滋味」、「來去拉拉山」等e5散文一一刊登出來,一時hoo7我驚一趒,隨後我趕緊kha電話去ka7sueh多謝,答謝伊e5疼惜kap用心,順紲交談一寡做為台語人e5辛酸淚影e5以往事蹟,綴後謝意拜別。

    Ti7 hit年我to7開始接受各學校e邀請去擔任教學生囡仔e課程,因身體上並無真健全,ia7 m7敢接受siunn濟位學校e5邀請,親像羅東國小、公正國小、宜蘭黎明國小、以及二結興中國中等,我順紲ti7 tsia ka7 in會一e5多謝,看我tsiah nih有起,疼惜我真失禮,因為hit暫仔我已有答應 朱瑞雲老師去in哥哥 朱校長e5學校擔任十二班e5學課,安排一年級到六年級各有兩班,總共有三百外名學生,無可奈何只好拜謝致意,一意想欲專心去教好tsio8e5學生比較khah適當,未免失去教育意義,tsiah 袂誤人子弟,教歹了學生囡仔heh toh罪魁禍首難於消彰。親像 朱校長伊平常時攏有ti7注意我教冊e方式kap教材e引導(因

                                -- 3 --

為有一寡教材是我ka- ti7篇寫),ia7有經過各教室e5導師kap學生e5反應,in

講並無siunn差,總是無人嫌tioh8好,菜脯根罔咬鹹,學生囡仔ia7真愛讀koh真熱門,因此,朱校長比較khah放心ia7 khah信任。有時bat tiann7- tiann7 kap我討論羅馬字定案e5問題,我回答伊,咱免煩惱hiah- nih濟,上司教育局方面ia7真關心tsit項代誌,船到橋頭自然直,一切順其自然tioh8 ho2。隔轉年  朱校長升遷到羅東公正國小,有人透過 林淑華老師來邀請,因hit時我另有其他

空課,無法度接聘,只好禮讓紹介 林義明老師去替我接班hit份課程。       

    光陰似箭、日月如梭,日子ia7真緊過去,回想tioh8早前be7進入台語界去寫作e5時一心攏想beh盡一份使命來為母語效勞,挽救母語避免失落去,看e7-tang3 kua2傳承hoo7下一代e5志願nia7- nia7。啊!歲月不饒人一目睨a2有十外冬loh,社會變遷ia7真快,多元e5變化,囡仔為beh入去各層學門求進,suahkhah重視考試課業,專攻向國語,外文課程功課,台語suah無注重去,真怨嘆,顛倒suah hoo7外籍新娘khah beh想愛學台語。想起tsitto7懷念前輩 林央敏先生

三月 09, 2011, 08:34

滿 山 春 色 / 李啟明 /

Posted by 莊文龍 | 迴響 (0) | 引用 (0) | 閱讀 (598) | 李啟明老師散文 | 推文 (0)
滿         / 李啟明 / 

    早前廣播電台時常佇播送e台灣e名歌『滿山春色』這首歌曲,伊e歌詞、伊e曲調,意義充滿著熱情溫暖、懷念e鄉土味。伊e內底含意攏是描寫著咱台灣e山川水色,真媠e風光景緻,聽起來真會予人感動想欲去遊山玩水e心意。事實上,咱台灣是真好e地理,每一个所在攏有自然e秀麗風景,咱家己e土地值得來疼愛,這塊土地四周圍有曠闊e海洋、有美麗e海岸、有翠綠e山脈、有彎曲e河川、嘛有國家指定e自然公園,猶閣有人工造化e公園、遊樂區,會當講是一四界講袂完攏真媠e所在,尤其是佇四季春、夏、秋、冬e內底景觀攏有特色e變化,到處鳥語花香,山間幽靜,真正予人值得去欣賞,予人來關心伊。

    頂一年,我利用休假e時陣佮阮牽手,招阮隔壁厝邊同齊駛一台驕車出去北台灣踅一遍,出發彼一工,天氣非常清朗,風和日暖,會當來比喻著一首詩:「碧麗青空、萬里無雲、遨遊四方、任我獨行」e意景,彼日阮四个人心情特別清采沿路看光景,沿路破豆開講,無所不致,有啥講啥,當時車駛入北關風景區e所在,正爿e海邊仔,景色非常迷人,青藍e海湧,一波一波沖對奇形怪石e岩壁,變化白色e波浪,噴出水花e光彩,佇一海哩外e海中,有一座神秘e龜山島,更加多采多姿,海水點點閃爍,真正是一處人間天堂,予人值得欣賞難忘e景色,隨後阮就沿途無歇睏,直接駛過澳底e漁港路,港口船隻出出入入,船仔e機器聲,一陣一陣袂輸音樂e節奏,遠遠仔一排小山崙,浸入去海岸彼爿,景色有夠媠e,過了後,阮e車就繼續行向基隆港口,沿路山勢懸懸下下,樹仔青黃翠綠,山間中有參插著一座一座富麗e建築物佮廟寺,濟濟e車輛軁來軁去,看甲目睭花嗄嗄,一路歡喜e心情恬恬仔佇ka伊欣賞。

    到了中晝十二點左右,阮歇睏蹛一位桃園休息站,彼个所在建築物真特色,規个場地曠闊外觀親像故宮式,古典美景十足,內面有供應台西式餐食,隨在你任選點用,尤其是台灣味真厚特別有,中晝飯用了後,阮就趕車繼續閣往中部地區遊覽,頭一站是亞哥花園,入園進前,阮蹛大門前就翕一張做紀念相,照in園內所指示e路線圖,按順序步行觀賞百花果樹,人工奇景美妙入神,果然是滿山遍野,人山人海遊客滿滿是,通講是人佮花佇爭艷e境界,十分迷人。彼日為著欲趕去南投日月潭歇暝,也無時間看傷久,踅一輾(lian)就出來,趕到日月潭時已近黃昏日頭欲落山矣,當暝有一位叫客e歐巴桑帶路去in民宿潭仔山頂e旅社,彼暗仔阮四个人坐蹛旅社e陽台頂,一面泡茶一面欣賞著明潭e夜景,聽微微仔優美e迷人音樂聲,心神如醉,真真是人生一大享受咧!第二工去潭邊踅踅一下,隨後就閣駛車去九族文化村看原住民生活e起居佮舞蹈文化e活動以及建築物,佇樹林內鑽來鑽去,費了三點外鐘久,看袂少原住民e特有文化,留予阮一種無限e深思。第二站來到梅山,看一寡梅花當開e盛景,真正是滿山春色,閣紲落去到溪頭遊樂區,溪頭內底沿路山風清涼,杉木參天、鳥語花香,行過一遍針葉。                         1

e樹林感覺真清爽,閣來這站是竹山,眼中看去兩爿e竹海,山坪種滿無數e孟宗竹,孟宗竹節節巧妙生媠,氣派麗質、婀娜(o-lo)多姿,阮抑有落車去共種竹仔e主人買一寡竹筍來做為手信留念,時間也真緊過去,彼暗阮趕到阿里山山頂去過暝,到位e時,有一个大約是五十左右歲仔e婦仁人,行來佮阮拍招呼,問阮有欲蹛旅社無?佇山頂e民宿有佮意無?因為阮本來就拍算欲蹛較懸e所在,方便佇第二工透早通行去山邊看雲景,所以就共伊定落,彼暝阮蹛遐領悟著高山寒冷凍霜e滋味,第二工天色拍phue時陣,阮就趕緊起床,招同齊去山邊看一四界e杉林佮聽鳥仔e叫聲,隨後閣趕去搭阿里山觀光車前往山頂看日出e美景,車路e全程,兩爿攏種針葉樹e松羅佮杉仔,樹仔e年齡攏真久矣,看著真予人懷古e感念,過無偌久,車行到山頂,停車場是規座紅色e建築物,配合著對面一遍白色e櫻花海開滿了山邊,媠甲予人看著呵咾甲會觸舌,阮一路行一路欣賞,行到上頂e觀日台彼爿遐看日出e光景,慢慢仔等到日頭光線射對櫻花欉e時,配合著紅色e觀光列車,這時e情景予阮規个腦海內回想著:早前彼首懷念e老歌『滿山春色』,彼種e詩情畫意美景永遠留踮阮e心幕中。

    彼下晝仔落來旅社e停車場,阮車對北勢方向一直駛轉來,一路駛到谷關e溫泉區,順紲落去泡溫泉水,將有兩、三工e疲勞共伊解消掉去,滿身攏輕鬆起來,閣遊街去買一寡在地e特產品,隨後就開車閣再向梨山方面趕回宜蘭老故鄉,沿途山路空氣清新,一望無窮e山巒風景,有時陣猶閣看會著路邊樹仔頂跳來跳去e一陣猴山仔,真心適。佇無意中車也駛到梨山賓館,眼前滿遍青山綠水,梨花開甲滿滿是,梨山賓館館舍氣勢非凡,親像古典式e樣體,四周百果齊排,果子攤位規街路,任君挑選甜頭十足,過了梨山沿途落崎,兩爿路邊山櫻花開甲紅吱吱,風吹搖動,花瓣飄飄,如詩如夢,美妙無比,通講是一遍世外桃園,無限e好景色,這逝(tsua7)旅遊路程毋但予阮得著無限e快樂心涼脾吐開,嘛留落了無限e回憶(ik)。

 

                                           李啟明  寫於  宜蘭縣冬山

 

                                           2009121     夜瞑

三月 09, 2011, 08:16

【 囡 仔 詩 】作者:李 啟 明

 

 

 

 

         【 囡 仔 詩 】

 

 

 

 

1. 水果                    8. 溜樓梯                  15. 田蠳仔官

2. 羊仔                    9. 鉸刀、石頭、布          16. 模田螺

3. 鳥仔                   10. 雞母                    17. 囡仔兄

4. 花                     11. 狗                      18. 點玎璫

5. 蹌跤雞                 12. 烏鶖佮水牛              19. 新娘真正媠

6. 粘田蠳                 13. 搖金龜                  20. 天才囡仔

7. 拍干樂                 14. 水雞                    21. 火車

 

 

 

 

              (1)

-- 水 果 --      1.

 

          甘 蔗 好 食

 

           雙 頭 甜

 

          弓 蕉 好 食

 

           芳 四 邊

 

          王 梨 好 食

 

      喙 瀾 流 甲 滿 喙 墘

 

 

 

        --李 啟 明 寫作--

         

                   (2)

          -- 羊 仔 --       2.

 

          一 隻 羊 仔

 

            兩 枝 角

 

          喙 鬚 長 長

 

            愛 相 觸(tak)

 

    觸 甲 挵(long)著 磚 仔 角

 

 

 

 

 

          --李 啟 明 寫作--

 

                  (3)

          -- 鳥 仔 --        3.

 

        雀 鳥 仔 叫 聲

 

       「口就-口就-口就」

 

          烏 鶖 叫 聲

 

       「咬 - 咬 - 勼」

 

          黃 鶯 笑

 

         「啾 - 啾 - 啾」

 

 

 

        --李 啟 明 寫作--

 

              (4)

          -- --         4.

 

      春 天 花 開 素 清 芳

 

      花 蕊 開 甲 媠 噹 噹

 

      愛 花 著 愛 惜 花 欉

 

      好 花 伴 阮 心 輕 鬆

 

 

 

 

 

 

 

         -- 李 啟 明 寫作 --

 

                  (5)

         -- 蹌 跤 雞 --     5

stiang7  kha     ke

 

         正 跤 假 跛 跤

 

      倒 跤 放 佇 拖 塗 跤

 

            蹌 一 个

 

            叫 阿 爸

 

            蹌 兩 个

 

            笑 哈 哈

 

 

 

         -- 李 啟 明 寫作 --

 

                  (6)

       -- 粘 田 蠳 --     6.

 

            粘 田 蠳

 

            粘 田 蠳

 

      來 去 菜 園 粘 田 蠳

 

         田 蠳 撲 撲 飛

 

            真 笑 詼

 

      挵 著 匏 仔 甲 菜 瓜

 

 

 

         -- 李 啟 明 寫作 --

 

                  (7)

       -- 拍 干 樂 --     7.

 

              干 樂

 

         圓 圓 真 古 錐

 

      跤 手 結 結 做 一 堆

 

         頭 殻 尖 髓 髓

 

            拍 一 輪

 

      笑 甲 喙 仔 開 開 開

 

 

 

         -- 李 啟 明 寫作 --

 

                  (8)

      -- 溜 樓 梯 --      8.

 

           足百 懸 懸

 

           心 花 開

 

           一 兩 三

 

          溜 落 樓 梯

 

      目 睭 笑 甲 眯 眯 眯

 

 

 

 

 

          -- 李 啟 明 寫作 --

 

                  (9)

  -- 鉸 刀、石 頭、布 --  9.

 

        一 的 出 鉸 刀

 

        二 的 變 石 頭

 

        三 的 放 水 流

 

        四 的 布 來 鬥

 

     五 的 輸 甲 嗎 嗎 吼

 

 

 

 

 

         -- 李 啟 明 寫作 --

 

                  (10)

        -- 雞 母 --        10.

 

             雞 母 生 卵

 

               叫 唂 雞

 

                 跳 懸

 

                 跳 下

 

           歡 喜 報 逐 家

 

 

 

 

 

         -- 李 啟 明 寫作 --

 

                  (11)

          -- 狗 --         11.

 

            一 隻 狗

 

            汪 汪 吼

 

         愛 跳 閣 愛 走

 

            來 來 來

 

       你 上 乖 毋 通 吼

 

         乖 乖 顧 門 口

 

 

 

         -- 李 啟 明 寫作 --

 

                  (12)

-- 烏 鶖 佮 水 牛 --   12.

 

  烏 鶖 咬 啾 叫 出 聲

 

水 牛 仔 兄  水 牛 仔 兄

 

我 欲 騎 佇 你 的 尻 脊 骨并

 

     你 著 毋 通 驚

 

       你 來 駛 田

 

     我 來 唱 歌 予 你 聽

 

 

 

      -- 李 啟 明 寫作 --

 

               (13)

      -- 搖 金 龜 --      13.

 

     金 龜 身 軀 金 鐺 鐺

 

     飛 來 歇 佇 相 思 欉

 

     相 思 開 花 黃 芒 芒

 

     大 頭 真 愛 變 猴 弄

 

     足百  起 樹 頂 搖 搖 動

 

     搖 甲 金 龜 飛 空 空

 

 

 

         -- 李 啟 明 寫作 --

 

                  (14)

        -- 水 雞 --       14.

 

       水 雞 母 唂 唂 叫

 

       水 雞 公 嗶 嚗 趒

 

    趒 去 菜 園 仔 偷 放 尿

 

       看 著 人 驚 一 趒

 

       捙 畚 斗 四 跤 搖

 

      予 人 看 甲 真 好 笑

 

 

 

         -- 李 啟 明 寫作 --

 

                  (15)

     -- 田 蠳 仔 官 --    15.

 

    田 蠳 仔 官  田 蠳 仔 官

 

      牽 羊 牽 牛 入 後 山

 

         後 山 無 飼 草

 

 牽 過 阿 伯 仔 兜 門 跤 口

 

    拄 著 三 隻 狗  汪 汪 吼

 

    驚 一 趒 起 跤  就 緊 走

 

            牛 起 挵

 

      羊 仔 煞 來 咩 咩 吼

         -- 李 啟 明 寫作 --

                  (16)

      -- 摸 田 螺 --      16.

 

          嘿  嘿  嘿

 

     田 底 一 陣 少 年 家

 

        頭 殻 激 犁 犁

 

        又 閣 戴 草 笠

 

     毋 知 咧 創 啥 物 貨

 

       目 睭 看 一 下 睜

 

    嘿 嘿  是佇 模 田 螺

 

         -- 李 啟 明 寫作 --

 

                  (17)

       -- 囡 仔 兄 --     17

 

囡仔兄、囡仔兄,老師點著你的名。

 

你就千萬毋免驚,大大共伊喝出聲。

 

心頭就愛掠予錠,拍拚讀冊認真聽。

 

決定得著第一名,金榜題名就知影。

 

前途光明有名聲,獅陣弄到恁前庭。

 

牌匾掛甲規大廳,爸母呵咾你乖囝。

 

 

 

   -- 李 啟 明 寫作 --

 

(18)

-- 點 玎 璫 --     18.

 

點恁點玎璫,啥人點著大閹公。

 

閹公媽夯鐵鎚,點著啥人後尾腄。

 

伊就趕緊足百起追,追、追、追也追。

 

想欲佮恁來做堆,

予人點著毋通叫剋虧。

 

 

 

 

 

 

         -- 李 啟 明 寫作 --

 

                  (19)

-- 新 娘 真 正 媠 --   19.

 

新娘新噹噹,頭前落一空,後爿開店窗。

 

手摜木盛籃貯米香,米香真好食。

 

木盛籃結木屐,木屐真正媠。

 

媒人婆仔畫山水,金言玉語講甲一大堆。

 

新娘膨皮閣古錐,目睭激眯眯。

 

新郎一時心花開,共伊抱來親做堆。

 

嗯...新娘實在有影媠。

 

         -- 李 啟 明 寫作 --

 

                  (20)

     -- 天 才 囡 仔 --    20.

 

天才天才大箍呆,足百懸懸對頂溜落來。

 

跋一倒無叫唉,予人笑甲攬肚臍。

 

褲底拌拌閣再來,心內有主裁。

 

招朋友做陣來,手牽手連規排。

 

正跤踢過界,倒跤伴過來。

 

搖來搖去逐家笑咍咍。

 

 

 

         -- 李 啟 明 寫作 --

 

                  (21)

         -- 火 車 --      21.

 

火車火車欲起行,陳一个螺真大聲。

共恁提醒恁著毋通驚。

請恁逐家坐予錠咱就欲起行。

快快樂樂一陣囡仔妹兄,載恁來遊台北城。

嘟嘟衝衝足百山嶺,火車喘氣真大聲。

逐家恬恬恁來聽。

予咱知影讀冊親像火車咧拚命。

細漢認真就愛拚。

將來考牢大學你就門風清高好名聲。

 

 

 

 

 

 

 

            原作者:李 啟 明

            Guan-tsok-tsiah:Li -  khe - bing

 

          <鄉 土 語 言 教 師>

 

            Hiong-thoo   gi-gian    kau-su

       

.

                  (22)

三月 09, 2011, 08:11

【台灣唸謠佮蘭陽詩謠】

台灣唸謠佮蘭陽詩謠

『台灣唸謠』欣賞-/ 李啟明 /────  

台灣唸謠

 

蘭陽詩謠

*台灣唸謠*              *台灣唸謠*              *蘭陽詩謠*

1. 菜園剷草               10. 歹命囝                19. 龜山朝日

2. 絪草絪                 11. 玫瑰花媠              20. 烏石帆影

3. 菜脯豉                 12. 金言說盡              21. 北關海濤

4. 洗蔥仔                 13. 杜鵑花開              22. 石燭參天

5. 拍草索仔               14. 銀柳花開              23. 金面大觀

6. 深夜月色               15. 梧桐開花              24. 五峰瀑布

7. 娘心懷春               16. 情路歹行              25. 雙連埤水

8. 水牛望明月             17. 泡茶                  26. 太平山林

9. 茶花若開               18. 古榕                  27. 梅湖晨鐘

                                                      28. 武荖春景

                                                      29. 冷泉秋波

                                                      30. 港澳漁燈

『台灣唸謠』欣賞-/ 李啟明 /────    

9.

        tshai3  huinn5  thuann2 tshau2

            

tsit8   phian3  tshai3 huinn5  hia   ni2  khuah4

me5  jit8   ti5 tshau2 phah4 piann3 thuann2

sionn7 bueh4 thuann2 tshau2 hoo7  i  khuann3

gueh8 niu5  tshio3 guan2 gong7 sim  kuann

                                       (1)

-『台灣唸謠』欣賞-/ 李啟明 /──────

        in1  tshau2   in1

       絪 草 絪

tiu7 tshau2  tsit8   tui  uinn5  gim2 gim2

稻 草 一 堆 黃 錦 錦

siang   kha1  khu5  loh4  in1  tshau2  in1

雙 跤 跍 落 絪 草 絪

a   kun   bo5  thang  tau3  sio   thing2

阿 君 無 通 鬥 相 挺

 thau5  khak4 kiong5 beh4  oo   am3  hin5

頭 殼 強 欲 烏 暗 眩

                                       (2)

-『台灣唸謠』欣賞-/ 李啟明 /────

       tshai3  poo2  sinn7

       菜 脯 豉

jit2     tui   tshai3   poo2  suinn  kam  tinn

一 堆 菜 脯 酸 甘 甜

niu5   a2  sionn7  tso3 tshai3  Poo2 sinn7

娘 仔 想 做 菜 脯 豉

it4   sim   it4    i3   tan2   kun  tshi3

一 心 一 意 等 君 試

bang7   i   tsai  iann2  tshui3 kinn5 kinn5

望 伊 知 影 甘 喙 墘

                                       (3)

-『台灣唸謠』欣賞-/ 李啟明 /-───────

                  se2   tshang  a2

                         洗 蔥 仔

tshai3 koo2  khau  khi2  tshang  a2   ki

菜 股 摳 起 蔥 仔 枝

khau  ho2  khn3  tua3  kau   a2   kinn5

摳 好 囥 蹛 溝 仔 墘

niu5  lai5   se2  tshing loo7  peh8   si

娘 來 洗 清 露 白 絲

siann5  kun  tham3  i   kui2   hun   i3

唌 君 探 伊 幾 分 意

                                       (4)

-『台灣唸謠』欣賞-/ 李啟明 /────────

                  phah4   tshau2   soh4   a2

                 拍 草 索 仔

Nng7   pe2  tiun7 tshau2  uinn  jip8  khang

兩 把 稻 草 軁 入 空

bueh4  phah4 tshau2 soh4  kat4   kui  ang3

欲 拍 草 索 結 規 甕

niu5  a2    jit    lang5  tshui  bue7  an5

娘 仔 一 儂 摧 袂 緪

ng3  bang7  kun  lai5   tau3  sann  kang5

向 望 君 來 鬥 相 仝

                                       (5)

-『台灣唸謠』欣賞-/ 李啟明 /──────

              tshim   ia7  gueh8   sik4

                 深 夜 月 色

tshim  ia7  gueh8  sik4  tsio3  lau5  thang

深 夜 月 色 照 樓 窗

gueh8  niu5 tshio3 guan2  koo  tsit8  lang5

月 娘 笑 阮 孤 一 儂

siong2 bueh4  sim  su7   tui3  kun  pang3

想 欲 心 事 對 君 放

tsi2  khiam3 tong  hong  lai5 tsiap4  song3

只 欠 東 風 來 接 送

                                       (6)

-『台灣唸謠』欣賞-/ 李啟明 /──────

              niu5   sim   huai7  tshun

             娘 心 懷 春

sin  phainn7 te5  khah  liang2 ping5  tshio

身 揹 茶 籱 兩 爿 肖鳥

tshiu2 theh8  ma5  liang5  ha5 puann3  io

手 提 麻 綾 縖 半 腰

niu5   sim   ai3   kun  kinn7  be7  tioh8

娘 心 愛 君 見 袂 著

ke2  iann2  khoo  ke  huah  lai7  hioh8

假 影 呼 雞 喝 鴟 鴞

                                       (7)

-『台灣唸謠』欣賞-/ 李啟明 /──────

            tsui2   gu5   bang7  bing5 gueh8

            水 牛 望 明 月

koo  niu5  tshing tshun  tng  phong3 phue5

姑 娘 青 春 當 膨 皮

uan2   ju5   gik   san  kui3  tiang3 hue

宛 如 玉 山 貴 中 花

hiann3  ko   i7   ai3  bueh8  phit  phue3

兄 哥 意 愛 欲 匹 配

na2 tshiunn7 tsui2  gu5  bang7 bing5 gueh8

若 像 水 牛 望 明 月

                                       (8)

-『台灣唸謠』欣賞-/ 李啟明 /──────

               te7    hue   na7   khui

              茶 花 若 開

te7   hue   na7  khui  sui2  tang  tang

茶 花 若 開 媠 噹 噹

niu5   a2   iam   le7   be5   to3  lang5

娘 仔 艷 麗 迷 倒 儂

phang  hue   ua2  ti2  puann3 lau5  thang

芳 花 倚 置 半 樓 窗

sin5  hun5  hoo7  I    kau   jip   pang5

神 魂 予 伊 鉤 入 房

                                      (9)

-『台灣唸謠』欣賞-/ 李啟明 /──────

               phainn2  mia7  kiann2

                         歹 命 囝

pe7   bo2  senn guan2 thong2 phainn2 mia7

爸 母 生 阮 倘 歹 命

puinn7 uann2  pang3 loh8  tioh8  ai3  kiann5

飯 碗 放 落 著 愛 行

kiann5  kah   kha   te2   sio  jiat8  thiann3

行 佮 跤 底 燒 熱 痛

bak8  sai2   lau5  loh8 muua2 suann phiann5

目 屎 流 落 滿 山 坪

                                       (10)

-『台灣唸謠』欣賞-/ 李啟明 /──────

              mue5   kui3   hue   sui2

                玫 瑰 花 媠

mue5  kui3  hue   sui2  kut8  senn  tsi3

玫 瑰 花 媠 骨 生 莿

niu5   a2   kau   tai7   ai2   se2   ji7

娘 仔 交 代 愛 細 膩

tshak8  tioh8  huat  hong5 tsiah  kiu5   i

棘 著 發 癀 才 求 醫

siann2 liang5  kio3  li2  gong7 bueh   si2

啥 儂 叫 你 戇 欲 死

                                      (11)

-『台灣唸謠』欣賞-/ 李啟明 /──────

               kim  gian5  sue3   tsin7

       金 言 說 盡

        kim  gian5 sue3  tsin7  tshian ban7  tiau5

    金 言 說 盡 千 萬 條

       ting  ling5  lang5  ai2   oh8  kuai  khiau2

    叮 嚀 儂 愛 學 乖 巧

       sionn7 kong2 tsha5  sim  siang7  ho5  liau7

    想 講 柴 心 上 好 料

        bo5   gi5   au3   hue3  khi2 huan2  hiau

    無 疑 歹奧 貨 起 反 梟

                                       (12)

-『台灣唸謠』欣賞-/ 李啟明 /──────

              too7   kuan   hue   khui

       杜 鵑 花 開

       too7  kuan  hue   khui puann2 suann  io

    杜 鵑 花 開 半 山 腰

        jit   thau5  tsio3  loh  luinn   io5  io5

    日 頭 照 落 軟 媱 媱

        kun   a2  tshun  tshiu2 bong  be7  tioh8

    君 仔 伸 手 摸 袂 著

        niu5  sim tshiunn7 tiann2  ti2  hue2  sio

    娘 心 像 鼎 佇 火 燒

                                       (13)

-『台灣唸謠』欣賞/- 李啟明 /──────

              gin5   liu2   hue   khui

       銀 柳 花 開

        gin5  liu2  hue   khui  kim tshang tshang

    銀 柳 花 開 金 蒼 蒼

        kim  hue   su3  phue3 peh8  hui5  ang3

    金 花 四 配 白 瓷 甕

       mue5  po5  in2  suann3  khan  jip  pang5

    媒 婆 引 線 牽 入 房

       kiam  tiap8 tsiann5 tshim  thau3 bue2  ang5

    鶼 鰈 情 深 透 尾 紅

                                      (14)

-『台灣唸謠』欣賞-/ 李啟明 /──────

            goo5   tong5  khui  peh8   hue

      梧 桐 開 白 花

       mua2  suann goo5  tong5 khui   peh8  hue

    滿 山 梧 桐 開 白 花

       kuan  bong7 tong   kin  luan7  sia7  hue7

    觀 望 當 今 亂 社 會

        lam5  li2   bo5  koo3  bin7  the2  phue5

    男 女 無 顧 面 体 皮

       tsing5  poh8  su   iok8  oo   peh8  ue7

    情 薄 私 慾 烏 白 畫

        siau  kong5 hong  thai   na7  tso3  kue3

    痟 狂 風 颱 若 做 過

        hue  hioh8  li7    ki   put  tsai3  hue5

    花 葉 離 枝 不 再 回

                                       (15)

-『台灣唸謠』欣賞-/ 李啟明 /──────

              tsing5  loo7  phainn7 kiann5

       情 路 歹 行

       suann tiang2  tsioh8 kham2 kuan5 ke7  hian2

    山 頂 石 崁 懸 低 搟

       bueh4  khi3  niu5  tau   tsin phainn2 lian2

    欲 去 娘 兜 真 歹 撚

       tsing5 loo7  puah8  to2   kui2  na7  pian3

    情 路 跋 倒 幾 若 遍

        be7   su  tshui3  lai7  kam5 uinn5  lian5

    袂 輸 喙 內 唅 黃 連

        kian  sim   hu3  ioh4  ing2  put  pian3

    堅 心 赴 約 永 不 變

       siann2 lang5 tsionn7 gun2  tsia2  kho2  lian5

    啥 儂 像 阮 迮 可 憐

                                       (16)

-『台灣唸謠』欣賞-/ 李啟明 /──────

                phau3          te5

        泡     茶

       kiong tshann2 kui7  kheh  jip  thiann  tsie7

    恭 請 貴 客 入 廳 坐

       bin7  tsing5 beh4  phau3  soo3 hiang  te5

    面 前 欲 泡 素 馨 茶

       soo3  hiang phang  te5   ti3   tshiu2  ge7

    素 馨 芳 茶 佇 手 藝

       tshoo lang5  kong2  ue7  khah4 than2  peh8

    粗 儂 講 話 較 坦 白

        m7   si7  guan2  tsia  gau5  tsing2  te5

    毋 是 阮 遮 敖 種 茶

        tng5  ni3  khoo2  sim  iong7  tsin  tsie7

    長 年 苦 心 用 真 濟

       phang  te5   lim  lok8   na5  au5   te2

    芳 茶 啉 落 嚨 喉 底

       kang   hu  tiam2  phua3 bo5  siann2  hue3

    功 夫 點 破 無 啥 貨

                                      (17)

-『台灣唸謠』欣賞-/ 李啟明 /──────

              koo2          iong5

       古     榕

       koo2  iong5 tshiu7  ling5 tsionn5 ni3   hue3

    古 榕 樹 齡 上 年 歲

       tshiu7  sin  jiau5  hun5 tshionn7 pit  phue5

    樹 身 皺 痕 像 毖 皮

        lau7  lai5   kui  kang   bo5  su7  tsue3

    老 來 規 工 無 事 做

        koo  tuann  khu  leh8  pok4  hun  tshue

    孤 單 跍 咧 噗 薰 吹

        m7  kuan2 siann2 lang5   ti7   tsia  kue3

    毋 管 啥 儂 佇 遮 過

       long2  e7    kah   i   phah  tshio3 khue

    攏 會 佮 伊 拍 笑 詼

        sui   jian5  ni5   ki2   u7  khah  tsue7

    雖 然 年 紀 有 較 贅

       siau  liang5  tak8   ke   beh   to5  tshue7

    逍 涼 逐 家 欲 佗 揣

                                      (18)

-『蘭陽詩謠』欣賞-【勝景詩文】/ 李啟明 /─────

                ku   suann  tiau5  jit8

        龜 山 朝 日

       hiok4  jit8  tiau5  ionn5  ku  suann  to2

    旭 日 朝 陽 龜 山 島

       tsio3   sia7  hai2  tsui2  siam  kim  pho

    照 射 海 水 閃 金 波

        hi5  iann2  ti7   lai7   ai3   keh4  so5

    魚 影 佇 內 四 格 趖

        hai2   ti   kun3  iok8  siong2 uah8  po2

    海 豬 滾 躍 上 活 寶

        ─ 佇頭城鎮 ─

                                       (19)

-『蘭陽詩謠』欣賞-【勝景詩文】/ 李啟明 /─────

               oo   tsioh8  phang5 iann2

       烏 石 帆 影

        oo  tsioh8  kang2 kau2   te   hing  ho2

    烏 石 港 口 地 形 好

        iau5 bang7  tui3  bin7   ku  suann  to2

    遙 望 對 面 龜 山 島

        ku  suann  tiau5  jit8  tsio3  kang2  o3

    龜 山 朝 日 照 港 澳

        phang5  iann2   tshut4   jip8    kai   siong5   ho5

    帆 影 出 入 皆 祥 和

         - 佇頭城鎮 -

                                      (20)

-『蘭陽詩謠』欣賞- 【勝景詩文】/ 李啟明 /─────

              pak4   kuan  hai2   duo5

       北 關 海 濤

       hong5  hun  jit8  thau5  beh4  loh8  suann

    黃 昏 日 頭 欲 落 山

       pak4  kuan  hai2  duo5 tahiong gam5 huann7

    北 關 海 濤 沖 岩 岸

       uat8  thau5  bang7 huang3 tang ping5 khuann3

    越 頭 望 向 東 爿 看

       mua2  thinn  hun5  ha5  khan  kim suann3

    滿 天 雲 霞 牽 金 線

         - 佇頭城鎮 -

                                      (21)

-『蘭陽詩謠』欣賞【勝景詩文】/ 李啟明 /─────

            tsioh8  tsik4  tsham  thian

      石 燭 參 天

        sin  hong  phok8 poo3  khenn bun5  hian3

    新 峰 瀑 布 坑 門 現

       tsioh8  tsik4 tsham  thian  tsin  han2  kian3

    石 燭 參 天 真 罕 見

       tsit8  tsang5 tshiu7  bok8  ju5  sin5   sian

    一 欉 樹 木 如 神 仙

       tok8   tso7  tsik4  ting2 tshian  ban  lian5

    獨 坐 燭 頂 千 萬 年

         - 佇頭城鎮 -

                                        (22)

三月 09, 2011, 07:59

台語語文文學【第一冊】目錄

Posted by 莊文龍 | 迴響 (0) | 引用 (0) | 閱讀 (597) | 李啟明老師大作 | 推文 (0)

鄉土文學叢書

       台語語文文學

                     【第一冊】

               啟明台語教室編輯

            2007年10月24日 製作

 ..........(序)..........

                台 語 是 一 種 生 活 的 語 言 , 也 是 台 灣

          

最 通 用 的 話 語 , 內 涵 有 伊 的 優 雅 、 美 妙

、 典 故 … 等 聲 音 存 在 , 因 故 有 需 要 咱來

用 文 字 加 伊 記 載 , 所 以 值 得 咱 來 學 習 。

      學 習 台 語 毋 是 干 焦 欲 學 話 爾 爾 , 嘛

著 愛 會 曉 文 字 書 寫 , 將 所 有 的 語 言 記 錄

落 來 , 並 運 用 拼 音 的 方 式 來 了 解 台 語 文

的 字 詞 才 有 意 義 , 若 學 會 曉 拼 音 著 有 法

度 去 寫 作 你 家 已 所 愛 的 台 語 文 學 作 品 ,

寫 咱 台 灣 祖 先 所 留 落 來 的 優 秀 文 化 。

      依 我 本 身 經 歷 台 語 二 十 外 冬 的 實 際

教 學 探 討 過 程 中 , 這 套 台 灣 教 育 部 所 訂

的 台 羅 拼 音 法 , 並 無 毋 著 , 真 好 使 用 ,

用 足 短 的 時 間 內 , 就 學 曉 台 語 的 聲 韻 調

, 會 曉 讀 兼 寫 出 羅 馬 字 , 而 進 入 台 語 的

境 界。

                            2011年3月1日  序 文

                     

【一】詩文篇:

   台灣唸謠           * 台灣唸謠 *           * 蘭陽詩謠 *

  1. 菜園剷草               10. 歹命囝               19. 龜山朝日

2. 絪草絪                 11. 玫瑰花媠             20. 烏石帆影

3. 菜脯豉                 12. 金言說盡             21. 北關海濤

4. 洗蔥仔                 13. 杜鵑花開             22. 石燭參天

5. 拍草索仔               14. 銀柳花開             23. 金面大觀

6. 深夜月色               15. 梧桐開白花           24. 五峰瀑布

7. 娘心懷春               16. 情路歹行             25. 雙連埤水

8. 水牛望明月             17. 泡茶                 26. 太平山林

9. 茶花若開               18. 古榕                 27. 梅湖晨鐘

                                                   28. 武荖春景

                                                   29. 冷泉秋波

                                                   30. 港澳漁燈

【二】散文篇:

1. 滿山春色            7. 深秋夜歸人           13. 外籍新娘教學e過程

2. 母語伴阮二十冬      8. 冬山河畔             14. 龜蛇把海口

3. 鶼鰈情深            9. 噶瑪蘭e古厝         15. 童玩回春想當年

4. 鳳凰花開夏令紅     10. 霜風冬草             16. 有心拍石石成磚

5. 母淚滴滴愛         11. 草嶺古道秘史         17. 彙編鄉音苦行者

6. 蘭博館e誕生       12. 台語認證彼段前後     18. 母語e心聲

【三】囡仔詩篇:

  1. 水果                    8. 溜樓梯                15. 田蠳仔官

 2. 羊仔                    9. 鉸刀、石頭、布        16. 摸田螺

 3. 鳥仔                   10. 雞母                  17. 囡仔兄

 4.                      11.                     18. 點玎璫

 5. 蹌跤雞                 12. 烏鶖佮水牛            19. 新娘真正媠

  6. 粘田蠳                 13. 搖金龜                20. 天才囡仔

  7. 拍干樂                 14. 水雞                  21. 火車

 

 

三月 08, 2011, 17:41

恭喜!

Posted by 莊文龍 | 迴響 (0) | 引用 (0) | 閱讀 (419) | 一般 | 推文 (0)
如果你可以看到這篇文章,表示註冊過程已經順利完成。現在你可以開始blogging了!